उपनिर्वाचको नतिजाबारे राप्रपा प्रवक्ता श्रेष्ठको टिप्पणी- संकेत सकारात्मक भएनन्, रणनीतिमा समीक्षा गर्छौँ

काठमाडौं । राष्ट्रिय प्रजातन्त्र पार्टी (राप्रपा)का प्रवक्ता मोहन श्रेष्ठले इलाम र बझाङका चुनावी संकेतहरु सकारात्मक नभएको टिप्पणी गरेका छन् । इलाम र बझाङमा राप्रपाका उम्मेदवारहरुले अपेक्षित मत कटाउन नसकेपछि प्रवक्ता श्रेष्ठले यथास्थितिमा देश अघि बढ्न नसक्ने बताए ।

उनले भनेका छन्, ‘तथापि परिणामको प्रारम्भिक संकेतहरुबाट यथास्थितिमा देश अघि बढ्न सक्दैन, बदलिनैपर्छ र बदल्छौं भन्ने हाम्रो संकल्प कमजोर भएको छैन । यो उपचुनावले हामीलाई हाम्रो रणनीति र कार्यनीतिको समीक्षा र पुनरावलोकन गर्ने मौका दिएको छ । हाम्रा प्रयत्नहरु जारी रहनेछन्, कुनै क्षेत्र विशेषमा भएको चुनावबाट निराश हुने कुरै छैन ।’

जनता जनार्दन मतदाताबाट व्यक्त अभिमतलाई स्वीकार गरेर अघि बढ्ने उनको भनाइ छ ।

उनले थपेका छन्, पछिल्ला जुनसुकै चुनावहरुमा मतदाताको ठूलो संख्याले मतदान नगर्ने अवस्था यसपटक पनि देखिएको छ । यो वर्तमान राजनीतिक प्रणालीप्रति मतदाताहरुको निराशाको सामुहिक अभिव्यक्ति हो, यसलाई नजरअन्दाज गर्न मिल्दैन ।

देशको सुदुर भविष्य, दीर्घकालीन हित, एकता र समृद्धि राप्रपाले लिएको बाटोबाट मात्रै सम्भव रहेको उनको दाबी गरे ।