बजार क्षेत्रमा पनि बजेन घण्टी, ‘कोर एरिया’ मा मुढा नै अगाडि

विराटनगर । इलाम २ को जारी गणनामा बजार क्षेत्रको आशामा रहेको रास्वपालाई झन् निराश बनाइदिएको छ ।

‘कोर एरिया’ भनेर प्रचार गरिएको इलाम नगरपालिकामा पनि मिलन लिम्बूले खासै भोट पाउन सकेनन् । वडा नम्बर १ र २ को अन्तिम मत परिणाम सार्वजनिक हुँदा लिम्बूले जम्मा २०८ मतमात्रै ल्याएका छन् । उनको १ मा १२७ र २ मा ८१ भोट आएको छ ।

यी दुवै वडामा एमालेले पहिलो मत पाएको छ । एमालेका सुहाङले १ र २ बाट १४२८ भोट ल्याएका छन् । उनले १ मा ८९९ र २ नम्बर वडामा ५८३ ल्याए ।

कांग्रेसका डम्बर खड्काले १३१५ मत पाए । वडा नम्बर १ मा ८०० मत पाउँदा २ बाट उनले ५१५ मत ल्याएका छन् ।

पहिचानवादी उम्मेदवार डकिन्द्रसिंह थेगिमले भने २५० मत पाएका छन् । उनले १ नम्बर वडामा १४५ र वडा नम्बर २ मा १०४ मत ल्याए ।

रास्वपाले देउमाई नगरपालिकामा पनि अपेक्षाकृत मत पाउन सकेन । देउमाई नगरपालिकाको केन्द्र मंगलबारे बजारमा मिलनले १५८ मतमात्र पाए ।

रास्वपाले ग्रामीण क्षेत्रबाट मतगणना सुरु भएकाले आफूहरू पछि पर्नु अपेक्षित रहेको बताउँदै शहरी क्षेत्रबाट ह्वात्तै बढाउने बताएको थियो ।

इलाम र मंगलबारे (देउमाइ नगरपालिका) मा मिश्रित जनसंख्या छ ।