सलमान खानको घर अगाडि फायरिङ प्रकरणका आरोपी जेलभित्रै मृत भेटिए

काठमाडौं । बलिउड अभिनेता सलमान खानको घरमा गरिएको ‘फाइरिङ’ प्रकरणमा पक्राउ परेका अभियुक्त अनुज थपनको मृत्यु भएको छ ।

भारतीय सञ्चारमाध्यम हिन्दुस्तान टाइम्सका प्रहरी हिरासतमै आत्महत्या प्रयास गरेका अनुजको उपचारको क्रममा अस्पतालमा मृत्यु भएको हो ।

रिपोर्टका अनुसार अनुजले हिरासतको शौचालयमा ‘बेडसिट’ ले पासो लगाएर आत्महत्याको प्रयास गरेका थिए ।

घटना बारे थाह पाउँदा बित्तिकै अस्पताल पुर्‍याएका अनुजलाई उपचारको क्रममा चिकित्सकहरूले मृत घोषणा गरेका थिए ।

को हुन् अनुज थपन ?

अनुज सलमान खानको ग्यालेक्सी अपार्टमेन्ट बाहिर गत अप्रिल १४ मा भएको ‘फाइरिङ’ प्रकरणमा पक्राउ परेका एक अभियुक्त हुन् । अनुज र सोनु सुभाष चन्दर भनेर चिनिने अर्का अभियुक्तलाई मुम्बई प्रहरीले पन्जाबबाट पक्राउ गरेको थियो ।

उनीहरूमाथि सलमानको घर अगाडि गोली चलाउने शुटर विक्की गुप्ता र सागर पाललाई बन्दुक उपलब्ध गराएको आरोप थियो ।