‘बझाङमा एमाले हराउन नेकपा एसका नेता लागे, मुख्यमन्त्रीलाई विश्वासको मत नदिन जनादेश छ’

कैलाली । सुदूरपश्चिम प्रदेशका मुख्यमन्त्री दीर्घ साडोरीले शुक्रबार विश्वासको मत लिँदै छन् । अहिलेसम्म सुदूरपश्चिम प्रदेशमा सत्ता गठबन्धनभित्रै पनि पावर सेयरिङमा ठोस सहमति नभइरहेको बेला मुख्यमन्त्रीले विश्वासको मत लिन हतार गरिरहेको एमालेको टिप्पणी छ ।

एमालेबाहेकका घटकका दलहरू भने विश्वासको मत दिने तयारीमा छन् । यसअघि सोडारी सरकारमा तत्काल एमाले सहभागी नहुने निर्णय गरेको संसदीय दलले विश्वासको मत दिने निर्णय गरेको छैन ।
बझाङ उपनिर्वाचनमा पनि नेकपा एसले समझदारी उल्लंघन गरेको भन्दै विश्वासको मतका विषयमा सोच्न बाध्य हुने अवस्था सृजना भएको एमाले नेता कर्ण थापा बताउँछन् । थापाले नै बझाङ उपनिर्वाचनको कमाण्ड सम्हालेका थिए ।

भीम रावलसँग संवाद गर्न बनाइएको कार्यदलको सदस्य पनि हुन् थापा । प्रस्तुत छ, एमाले स्थायी कमिटी सदस्य थापासँग उपनिर्वाचनको नतिजाले देखाएको संकेत, विश्वासको मत दिने सन्दर्भ र भीम रावलका विषयमा गरिएको कुराकानी नेपाल टकमा-

– उपचुनावको परिणामपछि मिसन ०८४ को संकेत भन्दै एमाले निकै हौसिएको देखिन्छ । दुई क्षेत्र जित्दैमा देशभरिको भविष्य अनुमान हुन्छ र ?

निर्वाचन क्षेत्रको हिसाबले दुई वटा क्षेत्रको मात्रै निर्वाचन हो । यी दुई क्षेत्रको परिणामको बारेमा विश्लेषण गर्ने हो भने यो एउटा कोशी प्रदेशको मेचीको किनार र अर्को सुदूरपश्चिम महाकालीको किनारको निर्वाचन हो । यसले सिङ्गो नेपालले के चाहिरहेको छ भन्नेको लागि यो निर्वाचनको विश्लेषण गर्न सकिन्छ ।

वैज्ञानिक, राजनैतिक र सैद्धान्तिक सबै प्रकारले यो निर्वाचनको परिणामले नेपाली जनताले के सोचिरहेका छन् भन्ने कुरा प्रस्ट भएको छ । नेकपा एमालेले भनेको लक्ष्य र उद्देश्यलाई नेपाली जनताले समर्थन गरेको सवालमा हामीले यसलाई बुझेका छौँ ।

– इलाममा एमाले अध्यक्ष ओली दुई पटक पुग्नुभो । अन्य नेताहरूको पनि बाक्लो उपस्थिति भयो । तर, बझाङमा त पदाधिकारीसम्मका नेता पनि आएनन् नि !

पार्टी र पार्टी नेतृत्वले त्यसो गरेको होइन । यो निर्वाचनमा प्रत्यक्ष मतदातासँग, पार्टीको पङ्क्तिसँग बढी जोडिएको र प्रभाव पार्न सक्ने ती नेताहरूलाई खटाउने पार्टीको मूल नीति रहेको थियो । त्यसैले इलाममा इलामसँग बढी निकट र सम्बन्ध भएको नेताहरूलाई मूल जिम्मेवारी दिइएको थियो ।

बझाङमा पनि त्यहाँ प्रभाव पार्न सक्ने नेता कार्यकर्ताहरूसँग जोड्न सक्ने नेतालाई पठाउने भन्ने कुरा थियो । पार्टीको नीतिअनुसार मलाई त्यहाँ पठाइएको हो र मैले त्यहाँ जिम्मेवारी लिएको हुँ ।

पार्टी अध्यक्षलगायत नेताहरूको इलाम आसपासकै भूगोल हो । त्यस कारणले उहाँहरू धेरै त्यहाँ लाग्नु भएको हो । यहाँ विभेद भएको होइन । इलामलाई र बझाङलाई पार्टी नेतृत्वले र अध्यक्षले महत्वका साथ हेर्नुभएको थियो ।

दुवैको बीचमा सहमति भएर समाजवादीको उम्मेदवारको भोलि व्यवस्थापन गर्ने कुरा हामी गरौँला । त्यहाँ एमालेले जित्नु पर्छ । त्यो जितका कारणले गर्दा प्रदेशमा सरकार बन्छ भन्ने कुरा उहाँसँग स्पष्ट सहमति भएको हो । त्यो सहमति भएपछि हामीले तल जानकारी गरायौँ ।

– निर्वाचनभन्दा पहिले ‘चुनाव जिताउनु होस् दमन भण्डारी प्रदेशको मन्त्री बन्नुहुन्छ’ भन्ने चर्चा थियो । चुनाव त जित्नु भयो । अब उहाँले कुन मन्त्रालय पाउनु हुन्छ ?

नेकपा एमालेले सरकार बनाउने प्रकारको परिस्थिति भयो भने मलाई लाग्छ पार्टीले उहाँलाई राम्रो जिम्मेवारी दिएर अगाडि बढाउन सक्छ । पार्टी नेतृत्व र सम्पूर्ण पंक्ति उहाँको विषयमा सकारात्मक छ ।

– तत्काल प्रदेश सरकारमा सहभागी नहुने एमालेले निर्णय गरेको छ । यस्तो अवस्थामा मुख्यमन्त्री दीर्घ सोडारीले २१ गते विश्वासको मत लिँदै हुनुहुन्छ । अब एमालेले के गर्छ ?

२१ गते नै विश्वासको मत लिने विषयमा एमालेलाई कुनै जानकारी छैन । एमालेको केन्द्रीय नेतृत्वलाई पनि जानकारी छैन । हामी नेतृत्वमा रहेका कसैलाई पनि जानकारी छैन । उहाँले कसरी विश्वासको मत लिनुहुन्छ ? नेकपा एमालेले पछिल्लो संसदीय दलले जे निर्णय गरेको छ त्यो निर्णय यथावत् छ । त्यसपछि कुनै प्रकारको निर्णय भएको छैन ।

– मुख्यमन्त्रीले विश्वासको मत नपाउने सम्भावना हो ?

कसरी पाउनुहुन्छ ? हामीसँग सल्लाह नगरेको हुनाले मलाई त्यसबारेमा जानकारी छैन । पार्टीलाई पनि जानकारी छैन ।

– बझाङमा जित्ने दाबी गरिएका नेकपा एसको उम्मेदवारको धरौटी जोगिएन, इलाममा पनि रास्वपाको त्यस्तै अवस्था । एमाले पंक्तिमा पार्टी विजयी भएको भन्दा बढी यी कुरामा उत्साह देखियो नि !

त्यस्तो होइन, हामी हाम्रो सफलतामा केन्द्रित छौं । मतदाताहरूलाई धन्यवाद दिइरहेका छौँ । हाम्रो विजयले राष्ट्रिय सन्देश दिएको बुझिरहेका छौँ र बुझाइरहेका छौँ । अर्को कुरा, राजनैतिक दलहरू कति सतहमा छन् ? कति उडन्ते छन् ? कति जनताबाट टाढा छन् भन्ने कुरा नबुझीकन सञ्चार माध्यममा जे पनि बोलिदिने र आफूले भने पछि सबैले पत्ताउँछन् भन्ने गलत कुरालाई जनताले स्पष्ट पारेका छन् । त्यसैले आफ्नो शक्ति अनुसारको माग गर्नु पर्छ । अपिल गर्नुपर्छ ।

– बझाङमा नेकपा एसले एमालेलाई समर्थन गरेको भन्दै निर्वाचनको अघिल्लो दिन निकै चर्चा भयो । पछि उक्त पार्टीका जिम्मेवार नेताहरूले खण्डन नै गर्नु परेको थियो । निर्वाचन जित्नको लागि तपाईँहरूको रणनीति थियो त त्यो ?

सहमति गर्ने जिम्मा नै पार्टीको नेतृत्वले मलाई दिएको थियो । म र नेकपा एकीकृत समाजवादीको स्थायी कमिटी सदस्य संघीय मन्त्री भानुभक्त जोशीको बीचमा छलफल भएको थियो । हाम्रो महासचिव र नेकपा एसको महासचिवको बीचमा पनि छलफल भएको थियो, कुरा भएको थियो । त्यो छलफलको बीचमा नेकपा एसको महासचिव घनश्याम भुसालजीसँग पनि मैले कुरा गरेँ, भानुभक्तजीले पनि कुरा गर्नुभयो ।

दुवैको बीचमा सहमति भएर समाजवादीको उम्मेदवारको भोलि व्यवस्थापन गर्ने कुरा हामी गरौँला । त्यहाँ एमालेले जित्नु पर्छ । त्यो जितका कारणले गर्दा प्रदेशमा सरकार बन्छ भन्ने कुरा उहाँसँग स्पष्ट सहमति भएको हो । त्यो सहमति भएपछि हामीले तल जानकारी गरायौँ । त्यो बीचमा हाम्रो पार्टीको केन्द्रीय सदस्य ऐन महरजीले ‘बझाङको समाजवादीलाई धन्यवाद सहमति सहकार्य र एकता भनेर उहाँले हाल्नुभयो ।’

जसले हामीसँग सहमति गर्नुभयो उहाँहरूले हामीलाई धोका दिनुभयो । उहाँहरूबाट कुनै सहयोग भएन । हामीलाई हराउने कांग्रेसलाई जिताउने गरी त्यहाँका सबै नेताहरूले भूमिका खेल्नुभयो । भएको सहमतिलाई होइन भनेर सुदूरपश्चिमको इन्चार्ज गरिमा शाहले विज्ञप्ति निकाल्नुभयो । त्यहाँको सचिवको विज्ञप्ति आयो । भानुभक्तजीको आफ्नै फेसबुक स्ट्याटस पनि आयो । भने पछि यो धोका हो । यो षड्यन्त्र हो । यो षड्यन्त्र बझाङी जनताले राम्रोसँग बुझेका छन् ।

– भनेपछि नेकपा एसले एमाले हराउनेगरी भूमिका खेलेको तपाईँको आरोप छ । नेकपा एकीकृत समाजवादीको सरकार जोगाउन एमाले भूमिका खेल्छ ?

यत्रो लडाइँ लडेर, संघर्ष गरेर जितेको आफ्नो प्रतिनिधिले हाम्रो भावना विपरीत कुनै पनि ढंगले प्रयोग नहोस् भन्ने मतदाताहरूको आग्रह छ । हिजो मलाई त्यहाँबाट बिदाई गरेर पठाउने बेलामा सयौँ कार्यकर्ताहरूले ‘हाम्रो भावना विपरीत काम नहोस् , हाम्रो मतको कदर होस् , हामीलाई हराउन लाग्नेहरूलाई साथ भएपछि हाम्रो मर्ममा चोट लाग्छ हामी त्यो सहन गर्ने पक्षमा छैनौँ’ भनेर मतदाता र कार्यकर्ताहरुले भन्नु भएको छ ।

– अन्तिममा, एमाले नेता भीम रावलसँग संवादका लागि तपाईँसहितको कार्यदल तयार भएको थियो नि ! खै त कार्यदलको काम ? उता भीम रावल डिलमा पुगेको भन्दै पार्टी छोड्ने संकेत गर्न थालिसक्नु भयो ।

हामीले कार्यदलबाट सम्पूर्ण काम सम्पन्न गरिसकेका हौं । पार्टीको अध्यक्षसँग उहाँको भेट पनि भएको हो । कुराहरू पनि भएको हो । अब पार्टी अध्यक्ष र उहाँबीच छलफल भएर उहाँले के जिम्मा प्राप्त गर्नुहुन्छ त्यो दुईजनाले टुंगो लगाउँदा हुन्छ ।

यसमा मेरो सुझाव के छ भने, भीम रावललाई उहाँले कुनै पनि अप्रिय निर्णय गर्नुहुँदैन । अत्तालिएर, आवेग र उत्तेजनामा आएर गरिएका निर्णयहरू सही हुँदैनन् । त्यस्तो बेलामा कुनै निर्णय गर्नुहुँदैन ।
नेकपा एमालेभित्र उहाँको स्थान छ । एमालेका नेता कार्यकर्ताहरूले भीम रावल एमालेभित्रै रहिरहेर काम गर्नुहोस् भन्ने भावना मैले पाएको छु । हामी पनि उहाँले यहीँ रहेर काम गरेर अगाडि बढ्नुहोस् भन्ने पक्षमा छौं । अरू कुरा चाहिँ पार्टीका नेतृत्व तहबाट जे निर्णय हुन्छ त्यही निर्णयअनुसार अगाडि बढ्नुपर्छ । उहाँले पार्टी अध्यक्षसँग गएर मलाई कामको जिम्मा दिनुपर्‍यो, तपाईँसँग कुरा भइसकेको हो भनेर आफैँ गएर त्यो भन्नु उचित हुन्छ जस्तो मलाई लाग्छ ।