जाे खेल्दैछन् टी-२० विश्वकप -१

टी-२० विश्वकपअघि कुशलको खराब फर्म नेपालको चिन्ता (भिडिओ)

नेपाल प्रेस

२०८१ वैशाख २१ गते ११:१५

काठमाडौं । नेपाली क्रिकेट टीमका ओपनिङ ब्याट्सम्यान कुशल भुर्तेलले टी-२० विश्वकपको ठीक अगाडि आफ्नो लय गुमाएका छन् । पछिल्ला केही खेलहरुमा उनको व्यक्तिगत प्रदर्शन दयनीय छ ।

लामो समयदेखि आसिफ शेखसँग ओपनिङ गर्दै आएका भुर्तेल सम्भवतः नेपालका सबैभन्दा सफल ओपनर हुन् । सुरुबाटै बलरमाथि हावी भएर आक्रामक अन्दाजमा खेल्न रुचाउँछन् उनी । कुशल क्रिजमा टिके भने विपक्षी खेमामा तनाव सुरु हुन्छ । तर, कुशल चाँडै आउट हुँदा नेपालको सिंगो ब्याटिङ पंक्ति दबाबमा पर्ने गरेको छ ।

एसिया कपमा कुशलले विश्व क्रिकेटको महाशक्ति भारतका फ्रन्टलाइन बलरहरुमाथि गरेको आक्रमण नेपाली फ्यानहरुले सायदै कहिल्यै भुल्नेछन् । यसैगरी, टेस्ट राष्ट्र जिम्बाबेविरुद्धको ९७ रनको इनिङ पनि एउटा ‘मास्टरक्लास’ थियो । एसोसिएट्स राष्ट्रहरुविरुद्धका थुप्रै खेलमा उनले म्याच विनिङ पारी खेलेका छन् । त्यसैले पनि कुशलको ब्याट चल्नु टी-२० विश्वकपमा नेपालका लागि असाध्यै महत्वपूर्ण छ ।

तर, पछिल्लो समय लगातार खराब प्रदर्शनले कुशल उच्च मनोबलमा छैनन् । हिजो वेस्ट इन्डिज ‘ए’ विरुद्ध उनी ५ बलमा १ रन बनाएर आउट भए । यसले नै उजागर हुन्छ कि उनी कति खराब फर्ममा छन् । त्रिवि मैदान, जहाँ उनले करिअरको पहिलो टी-२० अन्तर्राष्ट्रियमा लगातार ३ अर्धशतक हानेर विश्व कीर्तिमान राखेका थिए, त्यही अहिले कुशलले खुलेर खेल्न सकिरहेका छैनन् ।

वेस्ट इन्डिज ‘ए’ विरुद्धको पहिलो म्याचमा कुशलले १२ बलमा १६ रन बनाएका थिए । दोस्रोमा उनी ८ बल खेल्दा २ रनमात्रै बनाएर आउट भए । तेस्रो खेलमा उनलाई ड्रप गरिएको थियो । चौंथोमा कमब्याक त गरे, तर फर्म भेट्टाउन सकेनन् ।

यो प्रतियोगिता अगाडि नेपालले ओमानमा खेलेको एसीसी प्रिमियर कपमा कुशलको प्रदर्शन झन् बिर्सनलायक थियो । उनले लगातार तीन खेलमा डकआउट भएर खराब कीर्तिमान राखे । समूह चरणको अन्तिम खेलमा साउदी अरबविरुद्ध २ बलमा कुनै रन नजोडी आउट भएका कुशल नेपालका लागि सबैभन्दा महत्वपूर्ण यूएईविरुद्धको सेमिफाइनल खेलमा गोल्डेन डकआउट भए । तेस्रो स्थानका लागि हङकङविरुद्ध भएको खेलमा पनि उनको ब्याटबाट रन निस्किन सकेको थिएन । उनी २ बलमा कुनै पनि रन नजोडी आउट भए ।

एसीसी प्रिमियर कपको समूह चरणका सुरुवाती तीन म्याचमा कुशलले क्रमशः २४ (२४), १२ (११) र ३२ (१९) रन जोडेका थिए ।
त्यसभन्दा अगाडि आयरल्यान्ड ‘ए’ विरुद्ध नेपालले घरेलु मैदानमा खेलेका खेलमा कुशलले औसत प्रदर्शन गरेका थिए । पहिलो म्याचमा उनी ३२ बलमा ३७ रन बनाएर नटआउट रहे भने दोस्रोमा १६ बल खेल्दै २५ रन बनाएर आउट भए ।

कुशलले अन्तिम पटक नेपालको हङकङ टुरमा अर्धशतक हानेका थिए । पपुवा न्यूगिनीविरुद्ध उनले ३९ बलमा ५९ रन बनाउँदै नेपाललाई जीत दिलाए । त्यसपश्चात भने उनको ब्याट सुस्ताएको सुस्ताएै छ ।

नाजुक फर्मका बाबजुद पनि कुशलले विश्वकपको स्क्वाडमा स्थान बनाएका छन् । यो अनपेक्षित पनि थिएन । नेपालसँग उनलाई रिप्लेस गरिहाल्ने अर्को खेलाडी पनि छैन । उनलाई केवल एउटा उत्कृष्ट इनिङको आवश्यकता छ ।

आफ्नो उच्च फर्ममा रहेका बेला कुशलले शानदार सटहरु खेल्न सक्छन् । उनीसँग थुप्रै प्रकारका सटहरु छन् र त्यसमध्ये पनि उनको पुल सट र हुक सट निकै दर्शनीय हुन्छ । एसिया कपमा भारतका मोहम्मद सिराजलाई हानेको हुक सट निकै चर्चित भएको थियो । कुशल स्कुप पनि राम्रो खेल्छन् । तर, उनी यसको आवश्यकताभन्दा बढी प्रयोग गर्न खोज्दा बारम्बार आउट पनि भएका छन् । कुशलमाथि यही आरोप छ कि उनी अनावश्यक रुपमा जोखिमपूर्ण सटहरु हान्छन् । प्रायः उनी आफ्नै गल्तीले आउट भएको देखिन्छ ।

ब्याटिङमा लगातार फ्लप भइरहेका कुशलले बरु बलिङ कुशलता देखाउन थालेका छन् । उनको लेग स्पिन पछिल्ला केही खेलहरुमा नेपालका लागि निकै फलदायी बनेको छ । सन्दीप लामिछानेको अनुपस्थितिमा नेपालको स्पिन आक्रमणलाई धेरै हदसम्म अलराउन्डरहरुले नै धानेका छन्, जसमध्ये कुशल एक हुन् ।

हिजो वेस्ट इन्डिजविरुद्ध पनि उनले उत्कृष्ट बलिङ गर्दै ४ ओभरमा २३ रनमात्र खर्चेर तीन विकेट लिएका थिए । यदि ब्याटिङमा सफल भएनन् भने बलिङबाट कम्पेन्सेट गर्ने अवसर उनले आफ्नो लागि सिर्जना गरिरहेका छन् । यसैले गर्दा पनि उनी नेपाली टीममा हम्मेसी छुट्न नसक्ने खेलाडी बनेका हुन् ।

नेपालले वेस्ट इन्डिज ‘ए’विरुद्ध अन्तिम टी-२० भोलि खेल्दैछ । विश्वकपअघि आफ्नो फर्म फिर्ता ल्याउने यो अन्तिम मौका हो कुशलका लागि । त्रिवि मैदानमै खेलेर राष्ट्रिय टीममा आफूलाई स्थापित गरेका कुशलले यही मैदानबाट आफूलाई फेरि जगाउन सक्लान् त ?

कुशलका पछिल्ला १० टी-२० स्कोर

१ (५), २ (८), १६ (१२), ० (२), ० (१), ० (२), ३२ (१९), १२ (११), २४ (२४), १६ (२५)

नेपाली क्रिकेट खेलाडीहरुबारे नेपाल प्रेसका थप सामग्री पढ्नुहोस्-