फिल्म ‘फर्की फर्की’ को गीत सार्वजनिक

काठमाडौं । फिल्म ‘फर्की फर्की’ को नयाँ गीत सार्वजनिक गरिएको छ। नरेन लिम्बुले ७ वर्षअघि कम्पोज गरेको चर्चित पपगीत ‘अन्तिम माया’ लाई रि–एरेन्ज गर्दै निर्माण टिमले शुक्रबार गीत सार्वजनिक गरेको हो।

बुद्ध जयन्तीको अवसर पारेर जेठ १० गतेबाट प्रदर्शनको तयारीमा रहेको अनमोल केसी स्टारर चलचित्र ‘फर्की फर्की’ मा समावेश सार्वजनिक गीतमा नरेन लिम्बुको स्वर छ। गीतको शब्द र संगीत पनि उनी स्वयंमको हो। गीतलाई कम्पोज पनि उनैले गरेका हुन्।

भिडियोमा अभिनेता अनमोल केसी र अभिनेत्री जसिता गुरुङ फिचर्ड छन् । नरेन र अनमोलबीच यो दोस्रो सांगीतिक सहकार्य हो । ९ वर्षअघि रिलिज भएको अनमोल स्टारर चलचित्र ‘जेरी’मा पनि नरेनकै हिट गीत ‘भन्न आउँदैन’लाई पुनः एरेन्ज गर्दै समावेश गरिएको थियो ।

चलचित्र ‘फर्की फर्की’ लाई सुयोग गुरूङले लेखन एवं निर्देशन गरेका हुन्। रोहित अधिकारी फिल्मको प्रस्तुति रहेको यस चलचित्रको निर्माता रोहित अधिकारी र ओमप्रकाश अग्रवाल हुन्। टाइम ट्राभलको कथालाइ उठान गरेको चलचित्रमा अनमोल र जसिताका साथमा रवि काफ्ले र समृद्धि अर्याल पनि शीर्ष भूमिकामा छन्।

चलचित्रमा नरेन्द्र मैनालीको डिओपी, अष्ट महर्जनको द्धन्द्ध, किरण थापाको कोरियोग्राफी र सुरेन्द्र पौडेलको सम्पादन छ। चलचित्रलाई काफिया फिल्मस र कुबेर फिल्मले वितरण गर्नेछन्।