शंकर पोखरेल भन्छन्- नयाँ समीकरणले पनि देशलाई चमत्कार गर्छ भन्ने विश्वास छैन (भिडिओ)
रास्वपालक्षित टिप्पणी- इलामको नतिजाले जान्नेलाई छान्ने भन्नेहरू काम लाग्दैनन् सन्देश दिएकाे छ
नेपाल प्रेस
२०८१ वैशाख २२ गते १२:५३
काठमाडौं । नेकपा एमालेका महासचिव शंकर पोखरेलले नयाँ समीकरणले अहिले नै देशलाई चमत्कार गर्छ भन्ने विश्वास आफूहरुलाई नभएको बताएका छन्। एमाले प्युठान काठमाडौं सम्पर्क मञ्चको कार्यक्रमलाई सम्बोधन गर्दै देशको ओरालो यात्रा रोक्न एमाले गठबन्धन भत्काएको जिकिर गरे।
उनले भने, ‘नेपाली समाजमा चरम अराजकताको अवस्था छ, अर्कोतिर नेपालको आर्थिक अवस्था दयनीय अवस्थामा गुज्रिरहेको छ। यही अवस्था लामो समयसम्म गयो भने सम्हाल्न नसक्ने अवस्थामा पुग्छ भन्ने मान्यताको आधारमा मिसन ०८४ भनेर पर्खिएर बस्न हुँदैन, सार्थक हस्तक्षेप गर्नुपर्छ भनेर हामीले एमालेविरुद्ध बनेको गठबन्धनलाई तोड्न सफल भएका छौं। अहिले हाम्रो सहभागीतामा नयाँ समीकरण निर्माण गर्न सफल भएका छौं। र, यो नयाँ समीकरणले अहिले नै देशलाई चमत्कार गर्छ भन्ने विश्वास छैन। हाम्रो विश्वास भनेको मुलुकको ओरालो यात्रालाई रोक्न सकिन्छ भनेर सरकार सहभागी भएका छौं।’
उनले अहिले पनि एमाले अर्जुनदृष्टी मिसन ०८४ नै भएको बताए। उनले थपे, एमालेलाई बलियो राष्ट्रिय शक्तिको रुपमा स्थापित गर्नको लागि आआफ्नो क्षेत्रमा जनमत विभाजित गर्ने साना दलहरुलाई विभाजित गर्न नसक्ने अवस्थामा पुर्याउनुपर्छ।
उनले उपनिर्वाचनको परिणमले आफ्नो पार्टीको पक्षमा ल्याउन सफल भएकाले मिसन ०८४ को सन्देश दिएको बताए। उनले भने, उपनिर्वाचनमा हामीले चाहेअनुसारको परिणाम ल्याउन सफल भएका छौं। सुदुरपश्चिममा एक सीट निर्णायक बन्न पुगेको थियो, हामीले जित्दा केन्द्रको समीकरण अनुसार सरकार बन्नसक्ने थियो। त्यहाँ सफल भएका छौं।
उनले इलामको चुनावी नतिजाले रवि लामिछाने नेतृत्वको रास्वपा काम लाग्दैन भन्ने सन्देश दिएको जिकिर गरे। उनले भने, इलामको निर्वाचनले धेरै प्रश्नहरुको उत्तर दिनुपर्ने थियो। नेपालको राजनीतिमा अब पुराना दल होइन अब नयाँ दल, जान्नेलाई छान्ने भन्ने नाममा, अस्थिरता सिर्जना गर्नखोज्ने शक्तिहरु अब काम लाग्दैनन् भन्ने कुराको सन्देश दिन आवश्यक थियो।
नेपाल प्रेस
प्रकाशित: २०८१ वैशाख २२ गते १२:५३
प्रतिक्रिया
सम्बन्धित खवर
