राष्ट्रियताका लागि दबाब दिन माइतीघर पुगे नेकपा एस समर्थित युवाहरू

काठमाडौं । सत्तारुढ घटक नेकपा एकीकृत समाजवादी निकट युवा संघ नेपालले माइतीघर मण्डलामा राष्ट्रियताका लागि युवा दबाब कार्यक्रम गरेको छ ।

नेकपा एसका युवाहरुले राष्ट्रियतालाई बलियो बनाउन, जनजीवनलाई सहज बनाउन र भ्रष्टाचार तथा बेथितिको विरोधमा प्रदर्शन गरेका हुन् ।

प्रदर्शनमा सहभागी युवाहरुले ‘हाम्रो नोटमा हाम्रै देश-आन्तरिक मामिलामा नगर हस्तक्षेप’, ‘नेपालको पश्चिमसम्मको भेग, लिम्पियाधुरा र लिपुलेक’, उठौं युवा एकै साथ, रोकौ भारतीय विस्तारवाद’ ‘एमसीसी के हो ? व्याख्यात्मक टिप्पणी के भो ?’लगायतका नारा लेखिएका प्लेकार्ड बोकेका थिए । प्रदर्शनअघि युवाहरु मोटरसाइकल र्‍याली गर्दै माइतीघरमा पुगेका थिए । प्रदर्शन कोणसभापछि समापन गरिएको थियो ।

नेपालले १०० रुपैयाँको नोटमा नेपालको चुच्चे नक्सा राख्दा भारतले अतिरञ्जना गरिरहेको कारण नेपालको स्वाभीमानलाई उच्च राख्न युवा दबाब कार्यक्रम गरिएको युवा संघका नेता विशाल लामाले बताए ।

माइतीघरमा भएको कोणसभामा युवा संघका अध्यक्ष कृष्ण विक, प्रवक्ता सञ्जीप राईलगायतले आआफ्नो धारणा राखेका थिए ।