उपेन्द्रलाई विगतको धोकाधडी सम्झाउँदै ठाकुरको जवाफ- मधेशमा तत्काल सहकार्य असम्भव
![](https://www.nepalpress.com/wp-content/uploads/2020/11/nepalpress-logo-n.png)
![](https://www.nepalpress.com/wp-content/uploads/2021/05/upendra-yadav-and-mahanta-thakur-jasap.jpg)
जनकपुरधाम । जनता समाजवादी पार्टी (जसपा) नेपालका अध्यक्ष उपेन्द्र यादवले मधेश प्रदेश सरकार बचाउन लोकतान्त्रिक समाजवादी पार्टी (लोसपा) को सहयोग नपाउने भएका छन् ।
मधेश सरकारबाट नेकपा माओवादी केन्द्र र नेकपा एमाले समर्थन फिर्ता लिएपछि जसपा नेपालका मुख्यमन्त्री सरोजकुमार यादव अल्पमतमा परेका छन् । सरकार जोगाइदिन सहयोग माग्दै उपेन्द्र आज बिहान लोसपा अध्यक्ष महन्थ ठाकुर निवास पुगेका भेटेका हुन् ।
उपेन्द्रको भनाइ उद्धृत गर्दै एक नेताले भने, ‘मलाई कमजोर पार्न खोजियो । मधेश सरकार बचाउन तपाईँको पार्टीको समर्थन चाहिएको छ ।’
उपेन्द्रले सहयोगको याचना गरेपनि विगतको धोकाधडी सम्झिदै लोसपा अध्यज्ञ ठाकुरले सहयोग गर्न नसक्ने प्रष्ट्याएका छन् ।
‘हाम्रो अध्यक्षजीले मधेश प्रदेश सरकारबारे निर्णय लिने जिम्मेवारी नेता जीतेन्द्र सोनललाई दिएका छौं । उहाँसँगै छलफल गर्नु होला । निर्णय उहाँले नै गर्नुहुन्छ भनेर फर्काइदिनुभयो’, लोसपाकै एक नेताले सुनाए ।
ती नेताले भने, ‘कैयौं पटक उपेन्द्रजीले धोका दिनुभएको उहाँले बिर्सनुभएको छैन । आफूलाई अप्ठ्यारो पर्दा खुट्टा ढोग्ने र काम फत्ते भएपछि पछाडिबाट वार गर्ने पुरानो बानी छ उहाँको । त्यसैले सहकार्य असम्भव छ ।’