कान्तिपुरबाट निस्किँदै कांग्रेस सांसदले भने- सिराेहियामाथि गृहमन्त्रीले अनैतिक हमला गरे, हामीलाई सैह्य छैन (भिडिओ)

काठमाडौं । प्रमुख विपक्षी दल नेपाली कांग्रेसका सांसदहरूले कान्तिपुर मिडिया ग्रुपका अध्यक्ष कैलाश सिरोहियालाई भेटेर ढाडस दिएका छन् ।

नागरिकता किर्ते गरेको अभियोगमा अनुसन्धान गर्न आवश्यक रहेको भन्दै जिल्ला प्रहरी कार्यालय धनुषाले जिल्ला अदालतबाट मंगलवारमात्र सिरोहियाविरुद्ध पक्राउ पुर्जी लिएको थियो । सिरोहियामाथिको पक्राउ पुर्जीविरुद्ध तत्कालै   संसदमा आवाज उठाएपछि कांग्रेस सा‌ंसदहरु कान्तिपुर पब्लिकेसन्समै पुगे। उनीहरुले सिराेहियासँग सामूहिक भेट गरेका थिए ।

कान्तिपुर पब्लिकेसन्सको कार्यालयबाट बाहिरिँदै कांग्रेस सांसदहरूले गृहमन्त्री रवि लामिछानेले सिरोहियामाथि पूर्वाग्रही साँधेको आरोप लगाए ।

सांसद रामहरि खतिवडाले भने, ‘पक्राउ पुर्जी जारी भएको समाचार थाहा पाएपछि त्यो के रहेछ भन्ने जानकारी लिन आएका हौं । केही पुलिसहरू यहाँ भएको थाहा पायौं । कसैलाई पूर्वाग्रही तरिकाले थुन्ने मुद्दा चलाउने पद्धतिमा सरकार लागेको हो भने घोर आपत्ति छ । कसैका दोहोरो नागरिकता दोहोरो पासपोर्ट तीन/चारवटा श्रीमती हुँदा छुट्कारा पाउने । कसैलाई ठ्याप्प समाइहाल्ने सरकारको प्रवृत्ति हो भने हामीलाई सैह्य हुँदैन ।’

तर्साउने र थर्काउने हिसाबले सरकार गएको हो भने कांग्रेसको आपत्ति रहेको खतिवडाले बताए ।

‘यसको हामी विरोधमा छौं । नागरिकता दोहोरो छ कानूनसम्मत् छैन भने त्यसको भागीदार हुनुपर्छ । उहाँले म दोषी भए कारबाही भोग्न तयार छु भन्नुभयाे  । सहकारी ठगीकै समाचार लेखेको भरमा पक्राउ गर्न खोजिएको हो भने यो आपत्तिजनक छ’, उनले थपे ।

कांग्रेस सांसद राजेन्द्र बजगाईँले गृहमन्त्रीले सिरोहियामाथि प्रतिशोध ठानेर अनैतिक हमला गरेको टिप्पणी गरे । उनले आफूहरू स्वतन्त्र प्रेसको समर्थनमा ऐक्यवद्धता जनाउन आएको बताए ।

‘हामीले उहाँको नागरिकताबारे अलिकति अध्ययन गर्‍यौं । उहाँको दुईवटा नागरिकता होइन । प्रतिलिपि भनिएको छ । प्रतिलिपि त मैले पनि लिएको छु । डेटहरू फरक गर्ने प्रशासन सरकारको त्रुटि होला । स्वतन्त्र प्रेसले उठाएका चिजलाई प्रतिशोध ठानेर उहाँले अनैतिक हमला गर्नुभएको छ । स्वतन्त्र प्रेसको समर्थनमा हामी ऐक्यवद्धता जारी गर्न आएका हौं । पक्राउ पुर्जी माध्यममात्र हाे’, बजगाईँले भने ।