जसपा नेपालमा उम्मेदवारको दस्तुर निर्धारण, कुन पदमा उठ्न कति तिर्नुपर्छ ?

काठमाडौं । जनता समाजवादी पार्टी (जसपा) नेपालले महाधिवेशनमा उम्मेदवार हुनेहरुलाई दस्तुर निर्धारण गरेको छ। पार्टीले तयार पारेको निर्वाचन निर्देशिकामा अनुसार पदाधिकारी र केन्द्रीय सदस्यको उम्मेदवारको दस्तुर निर्धारण गरेको हो।

अध्यक्ष, सहअध्यक्ष र उपाध्यक्ष पदको उम्मेदवारलाई ७ हजार, महासचिव, उपमहासचिव, सचिव र कोषाध्यक्ष पदका उम्मेदवारका लागि ५ हजार शुल्क निर्धारण गरिएको प्रचार विभाग प्रमुख पूर्ण बस्नेतले बताए।

उनका अनुसार केन्द्रीय सदस्यमा उम्मेदवार हुन २ हजार तिर्नुपर्नेछ। जसपा नेपालको राष्ट्रिय महाधिवेशन जेठ २८ देखि ३० गतेसम्म जनकपुरमा हुँदैछ।

जसपाले यसअघि नै महाधिवेशनमा पेस हुने राजनीतिक प्रतिवेदन पारित गरिसकेको छ। हालै अशोक राईले ७ सांसद लिएर पार्टी विभाजन गरेर हिँडेपनि उपेन्द्र यादवले तोकिएकै समयमा महाधिवेशन गर्न लागेका हुन्।