एमालेको एकल बहुमतको सरकार बनाउने गरी लाग्न नेता अधिकारीको जोड

कैलाली । नेकपा एमालेका स्थायी समिति सदस्य तथा सङ्गठन विभाग प्रमुख काशीनाथ अधिकारीले आगामी निर्वाचनमा एकल बहुमतको सरकार बनाउने गरी अगाडि बढ्न पार्टी नेता कार्यकर्ताहरू लाग्नुपर्नेमा जोड दिएका छन् ।

कैलालीको धनगढीमा आयोजित सदस्यता नवीकरण तथा अनलाइन अभिलेखीकरण विषयक अन्तरक्रियात्मक अभिमुखीकरणमा नेता अधिकारीले तीनै तहको सरकारमा एमालेको एकल बहुमतको सरकार बनाउने गरी अगाडि बढ्नुपर्नेमा जोड दिएका हुन् ।

एमाले नेतृत्वको एकल बहुमतको सरकार गठन भएपछि राजनीतिक अस्थिरता अन्त्य हुने उनको भनाइ थियो । उनले अहिले एमाले मुलुककै सबैभन्दा बलियो, लोकप्रिय र सर्वाधिक रुचाइएको पार्टी रहेको जिकिर गरे ।

‘अहिले पार्टी केन्द्रले सदस्यहरूको शुद्धीकरणबाट अगाडि बढाउने लक्ष्यसहित यो अभियान चलाइरहेको छ’, उनले भने, ‘पार्टी सदस्यता शुद्धीकरण अभियानलाई अगाडि बढाउन पनि यहाँ उपस्थित भएका हौं । सदस्यहरूको विवरण र अभिलेख अब अनलाइन पद्धतिबाट लैजान्छौं ।’

पोलिट ब्युरो सदस्य तथा पूर्वमुख्यमन्त्री राजेन्द्रसिंह रावलले एमालेप्रति जनमत बढ्दै गएको भन्दै अझै जनता केन्द्रित कार्यक्रम र गतिविधि बढाउनुपर्ने बताए ।

अहिले तत्काल सुदूरपश्चिम प्रदेश सरकारमा एमाले सहभागी नहुने भए पनि नीति तथा कार्यक्रम र बजेटका लागि सरकारलाई सुझाव दिइएको उनको भनाइ थियो ।