‘ह्रस्व दीर्घ’को प्रदर्शन मिति हेरफेर

काठमाडौं । फिल्म ‘ह्रस्व दीर्घ’को घोषित मितिभन्दा एक हप्ता पहिले नै प्रदर्शन हुने भएको छ । निर्माण टीमले फिल्म सुरुमा आगामी असोज ११ गते प्रदर्शन गर्ने मिति घोषणा गरेको थियो । साे मिति हेरफेर गरेर फिल्मलाई एक हप्ता पहिले संविधान दिवसको अवसर पारेर असोज ३ गते प्रदर्शन गर्ने निर्माण टीमले जनाएको हो ।

निर्मात्री नीता ढुंगानाले वितरण कम्पनी र निर्माण टीमको सल्लाहमा फिल्मको रिलिज डेट अगाडि ल्याइएको बताइन् ।

‘हाम्रो प्रोडक्ट कुन मितिमा ल्याउने विषयमा हामी जिम्मेवार हुने कुरा रहन्छ, असोज ३ प्रदर्शनको लागि उपयुक्त दिन ठानेर उक्त मिति रोजिएको हो’, उनले भनिन् ।

फिल्मको यतिबेला डबिङको काम चलिरहेको छ । अभिनेत्री विपना थापा फिल्मको डबिङ गर्न यतिबेला नेपालमा छिन् ।

चन्द्र पन्तको निर्देशन रहेको फिल्म ‘ह्रस्व दीर्घ’मा निर्मात्री रहेकी अभिनेत्री नीतासँगै अभिनेता हरिहर अधिकारी, चर्चित दक्षिण भारतीय कलाकार ब्रह्मानन्दम र बलिउड कलाकार प्रदीप रावतसँगै विपना थापा, गरिमा शर्मा, प्रशान्त ताम्राकार, सरोज खनाललगायत नाम चलेका दर्जन बढी कलाकारको अभिनय छ ।

सोसियल ड्रामासहितको प्रेमकथामा आधारित यस फिल्मलाई भारतको रामोजी स्टुडियोदेखि मुम्बई, चितवन र काठमाडौंमा छायांकन गरिएको छ । अभिनेता हरिरहर अधिकारीको कथा रहेको फिल्ममा बलिउडका स्थापित सिनेमाटोग्राफर कविरलालको छायांकन छ ।

फिल्ममा मित्र डी गुरुङको सम्पादन छ । कास्टिङ निर्देशक धनञ्जय घलानी रहेको फिल्ममा कोरियोग्राफी रामजी लामिछाने र बलिउड कोरियोग्राफर शुष्मा सुमनको छ । नीता फिल्मसको ब्यानरमा फिल्म बनेको हो ।