समर्थकले हुटिङ गरेपछि चतुरले भने- तपाईंले वेष्टइन्डिजमा सन्दीपलाई देख्ने मौका पाउन सक्नुहुनेछ

काठमाडौं । नेपाल क्रिकेट संघ (क्यान) का अध्यक्ष चतुरबहादुर चन्दले अमेरिकाको भिसा अस्वीकृत भएका नेपाली क्रीकेटर सन्दीप लामिछानेले वेष्ट इन्डिजमा हुने खेलमा सहभागी हुन सक्ने संकेत गरेका छन् । अमेरिकामा रहेका अध्यक्ष चन्दले एक कार्यक्रममा सन्दीपको भिसा प्रक्रिया अझै जारी बताएका हुन् ।

अमेरिकाले लगातार दुईपटक सन्दीपको भिसा अस्वीकृत गरेको थियो । नेपालले समूह चरणका दुई खेल अमेरिका र दुई खेल वेष्ट इन्डिजमा हुनेछ ।

एक कार्यक्रममा समर्थकले सन्दीप, सन्दीप भन्दै हुटिङ गरेपछि अध्यक्ष चन्दले सन्दीप वेष्टइन्डिजमा हुने खेलमा सहभागी हुन सक्ने दाबी गरे ।

‘… क्यानको अध्यक्ष बोल्दै छ । आस मारेको छैन । प्रयास जारी छ । सभ्य भएर बस्नुस् । धैर्य भएर बस्नुस् । शुभकामना दिन चाहन्छु । तपाइँहरुले वेष्ट इन्डिजमा सन्दीपलाई देख्ने मौका पाउन सक्नुहुनेछ,’ हुटिङपछि चन्दले भने ।

नेपालले वेस्ट इन्डिजको भिन्सेन्टमा जुन १४ दक्षिण अफ्रिका र जुन १६ मा बङ्गलादेशसँग खेल्नेछ । पहिला दुई खेल भने नेपालले अमेरिकामा खेल्नेछ । पहिलो खेल मंगलबार अमेरिकाको डलासमा नेदरल्यान्डससंग र दोस्रो खेल जुन ११ मा श्रीलङ्कासँग अमेरिकाको फ्लोरिडामा हुनेछ ।