विश्वकपमा नेदरल्यान्ड्सविरुद्ध भिड्दै नेपाल: कसकाे पल्ला भारी ?

काठमाडौँ । नेपालले आइसीसी टी–२० विश्वकप अन्तर्गत आज नेदरल्यान्ड्ससँग खेल्दै छ । दोस्रो पटक टी–२० विश्वकप खेल्न लागेको नेपाल र पाचौं पटक विश्वकप खेल्न लागेको नेदरल्यान्ड्सबिचको खेल अमेरिकाको डलासस्थित ग्रान्ड प्रेरी मैदानमा आज राती सवा ९ बजेबाट सुरु हुनेछ ।

विश्वकपमा पहिलो पटक भिड्न लागेका यी दुई टोलीबीच यसअघि मिश्रित नतिजा आउने गरेको छ । गत मार्चमा नेपालमा भएको त्रिदेशीय टी–२० सिरिजमा घरेलु टोलीलाई हराउँदै नेदरल्यान्ड्सले उपाधि जितेको थियो ।

फाइनलमा नेपाललाई ४ विकेटले पराजित गर्दै नेदरल्यान्ड्सले उपाधि जितेको हो । उक्त सिरिजमा पहिलो खेलमा नेदरल्यान्ड्सँग २ रनले पराजित भएको नेपालले दोस्रो खेलमा ६ विकेटले पराजित गरेको थियो ।

त्यसअघि २०२१ मा टी–२० क्रिकेटमा नेपाल र नेदरल्यान्ड्सको भेट भएको थियो । मलेसिया, नेदरल्यान्ड्स र नेपालबिच भएको त्रिदेशीय टी–२० को सिरिजको उपाधि घरेलु टोली नेपालले जितेको थियो । फाइनलमा नेदरल्यान्ड्सलाई १४२ रनले पराजित गर्दै नेपालले उपाधि जितेको हो । सोही सिरिजको समूह चरणका खेलमा नेपाल र नेदरल्यान्ड्सले एक एक खेल आफ्नो पक्षमा पारेका थिए ।

नेदरल्यान्ड्स र नेपालबीच सन् २०१५ को जुन ३० मा पहिलो टी–२० खेल भएको थियो । उक्त खेलमा नेदरल्यान्ड्स १८ रनले विजयी भएको थियो । त्यसयता टी–२० खेलमा नेपाल र नेदरल्यान्ड्स १२ पटक आमनेसामने भएका छन् । जसमा नेपालले ५ खेल र नेदरल्यान्ड्सले ६ खेलमा जित निकालेको छ । भने एक खेल नतिजाविहीन छ ।

टी–२० क्रिकेटमा १३ औँ पटक आमनेसामने हुन लागेका नेपाल र नेदरल्यान्ड्स दुवै विश्वकपमा सुखद सुरुआत गर्न चाहन्छन् । तुलनात्मक रूपमा समूहका केही कमजोर मानिएका दुई टोलीले एक अर्कालाई हराउने दाउमा देखिन्छन् ।

एसोसियट राष्ट्रको शीर्ष टोली नेदरल्यान्ड्स विश्वकपअघि राम्रो लयमा छ । नेदरल्यान्ड्सका खेलाडीहरू पनि उत्कृष्ट लयमा छन् । नेदरल्यान्ड्सका म्याक्स ओडिड र युवा माइकल लेभिट नेपालका लागि घातक हुन सक्छन् । तीव्र गति बलर भिभियन किंग्मामा र स्पिनर आर्यन दत्तले उच्च लयमा छन् ।

सन् २०१९ बाट नेदरल्यान्ड्सबाट खेल्न थालेका ओपनिङ ब्याटर म्याक्सले ४६ खेलमा १४०३ रन जोडेका छन् । युवा ब्याटर माइकलले ९ खेलमा ३ सय ४९ रन जोडेका छन् । उनले त्रिवि क्रिकेट मैदानमा नामिबियाविरुद्ध गत फेरब्रुरीमा १ सय ३५ रन बनाएका थिए । नेपालसँगको दुई खेलमा उनले अर्धसतक प्रहार गरेका थिए ।

विश्वकपको वार्मअप खेलमा क्यानडासँग पराजित भएको नेपाल विश्वकपमा सुखद सुरुआत गर्दै उच्च मनोबलका साथ विश्वकप खेल्न चाहन्छ । विश्वकपअघि खास प्रदर्शन गर्न नसकेको नेपालले १० वर्षपछि खेल्न लागेको विश्वकपमा राम्रो प्रदर्शन गर्ने अपेक्षा गरिएको छ । नेपालका कप्तान रोहित पौडेल, दीपेन्द्रसिंह ऐरी र कुशल भुर्तेल नेदरल्यान्ड्सका लागि घातक हुन सक्छन् ।

रोहित उच्च फर्ममा छन् । थ्रिडी प्लेयरको नाममा चिनिएका दीपेन्द्र र ओपनर कुशल भुर्तेलले पनि उत्कृष्ट प्रदर्शन गर्ने सम्भावना छ । यीबाहेकका खेलाडीले पनि राम्रो प्रदर्शन गर्ने सम्भावना उत्तिकै छ । सन्दीप लामिछानेको अनुपस्थितमा ललित राजवंशीले स्पिनरको पाटो सम्हाल्नेछन् । उनलाई दीपेन्द्र र कुशलले साथ दिनेछन् ।

नेपालले दोस्रो पटक टी–२० विश्वकप खेल्न लाग्दा नेदरल्यान्ड्स भने पाचौं पटक विश्वकप खेल्न लागेको हो । सन् २०२२ को टी–२० विश्वकपमा नेदरल्यान्ड्स सुपर १२ सम्मको यात्रा तय गरेको थियो । उक्त विश्वकपमा दक्षिण अफ्रिकालाई पराजित गर्दै नेदरल्यान्ड्सले आफूलाई प्रमाणित गरेको थियो ।

गत वर्ष भारतमा भएका एकदिवसिय क्रिकेटमा नेदरल्यान्ड्सले दक्षिण अफ्रिका र बङ्गलादेशलाई पराजित गर्न सफल भएको थियो । केही दिनअघि भएको विश्वकप वार्मअप खेलमा श्रीलङ्कालाई पराजित गरेको थियो ।