नेदरल्याण्ड्ससँग खेल्नुअघि नेपाली टोलीले गरे युलेसस्थित पशुपतिनाथ र बौद्ध विहारको दर्शन (भिडिओ)

काठमाडौं । आईसीसी टी २० विश्वकपमा नेदरल्याण्ड्ससँग भिड्नुअघि नेपाली राष्ट्रिय क्रिकेट टीमले अमेरिकाको टेक्सासमा रहेको युलेसस्थित पशुपतिनाथ मन्दिर तथा बौद्ध विहारको दर्शन गरेको छ ।

नेपाली राष्ट्रिय क्रिकेट टीमले टी २० विश्वकपअन्तर्गत आज नेदरल्याण्ड्ससँग खेल्दैछ । खेल नेपाली समयानुसार राति सवा ९ बजेबाट सुरू हुनेछ । पूजाआराधनापछि सञ्चारकर्मीसँग कुरा गर्दै नेपाल क्रिकेट संघ (क्यान) का अध्यक्ष चतुरबहादुर चन्दले नेपालले राम्रो तयारी गरिरहेको बताए । नेपालले वेस्टइण्डिज र अमेरिकामा करिब एक महिना तयारी गरिसकेको भन्दै राम्रो नतिजा निकाल्नेमा आशावादी रहेको भन्दै २०१४ को भन्दा धेरै गुणा राम्रो तयारी रहेको चन्दले बताए ।

उनले भने, ‘एक महिनाको तयारी छ । रिजल्ट राम्रै दिन्छ भन्ने छ । २०१४ को भन्दा धेरै गुणा राम्रो तयारी छ । त्यो बेलामा यस्तो खालको तयारी कम हुने गर्दथ्यो । अहिलेको टीमले पनि उत्कृष्ट प्रदर्शन गर्ने आशा छ । खेलाडीहरूले खेलेर उत्कृष्ट प्रदर्शन गरेपछि मात्रै सबैतिरको ढोका खुल्ने हो । उच्च मनोबलका साथ खेल्नुस् भनेका छौं । सब खेलाडी उत्साहित हुनुहुन्छ । टीयूकै झल्को दिनेगरी दर्शकहरूको उपस्थिति हुनेछ ।’

खेलाडीहरूलाई उच्च मनोबलका साथ खेल्न आग्रह गरेको र सबै खेलाडी उत्साहित रहेको उनले बताए ।