नेपालका लागि खतरा हुन सक्ने नेदरल्यान्ड्सका ५ खेलाडी

काठमाडौं । आइसिसी टी-२० विश्वकप अन्तर्गत आफ्नो पहिलो खेलमा नेपालले आज नेदरल्यान्ड्ससँग खेल्दै छ । नेपाल र नेदरल्यान्ड्सबीच खेल अमेरिकाको डलासस्थित ग्रान्ड प्रेरी मैदानमा आज राती सवा ९ बजेबाट सुरु हुनेछ ।

सोसियट राष्ट्रको शीर्ष टोली नेदरल्यान्ड्स विश्वकपअघि राम्रो लयमा छ । नेदरल्यान्ड्सका धेरै खेलाडी उत्कृष्ट लयमा छन् । यी हुन् नेपालका लागि खतरा हुन सक्ने नेदरल्यान्ड्सका ५ खेलाडी ।

१. म्याक्स ओडाउड

नेदरल्यान्ड्सका ओपनिङ ब्याटर म्याक्स ओडाउड सबैभन्दा अनुभवी खेलाडी हुन् । सन् २०१९ बाट नेदरल्यान्ड्सबाट खेल्न थालेका ओपनिङ ब्याटर म्याक्सले ४६ खेलमा १४०३ रन जोडेका छन् ।

विभिन्न फेन्चाइज क्रिकेट खेलेको अनुभव भएका म्याक्स नेपालका लागि खतरा बन्न सक्ने मध्ये एक खेलाडी हुन् । उनी सन् २०२२ मा भएको टी-२० विश्वकपमा नेदरल्यान्ड्सबाट सर्वाधिक रन लिने खेलाडी बनेका थिए ।

उनले ८ खेलमा २ अर्धशतक सहित २ सय ४२ रन बनाएका थिए । उनी आक्रामक ब्याटिङमासमेत उक्तिकै खप्पिस छन् ।

२. माइकल लेभिट

नेदरल्यान्ड्सका युवा ब्याटर माइकल लेभिट पनि नेपालका लागि खतरा बन्न सक्छन् । २१ वर्षीय माइकल नेदरल्यान्ड्सका उदाउँदा र उत्कृष्ट ब्याटर हुन् । टप अर्डर ब्याटर माइकल गत फेब्रुअरीमा नेदरल्यान्ड्सबाट डेब्यु गरेका हुन् ।

उनले त्रिवि क्रिकेट मैदानमा नामिबियाविरुद्ध गत फेरब्रुरीमा १ सय ३५ रन बनाएका थिए । नेपालसँगको दुई खेलमा उनले अर्धशतक प्रहार गरेका थिए ।

हालसम्म ९ खेल खेलेको उनले ३ सय ४९ रन जोडेका छन् । ब्याटर माइकलले पार्ट टाइम बलिङ पनि गर्छन् । उनी तीव्र गतिमा दायाँ हाते बलर हुन् ।

३. बास डी लिडे

पछिल्लो ६ वर्षदेखि नेदरल्यान्ड्सबाट खेल्दै आएका ब्याटिङ अलराउन्डर बास डी लिडे उच्च लयमा छन् । उनले ब्याटिङसँगै बलिङमा पनि शानदार प्रदर्शन गर्दै आएका छन् ।

उनले हालसम्म ३४ टी-२० आई खेलमा ६७७ रन जोडेका छन् भने बलिङतर्फ ३० विकेट लिएका छन् । उनले चौथो नम्बरमा ब्याटिङ र अन्तिम ओभरतिर बलिङ गर्ने छन् ।

४. भिभियन किंग्मा

तीव्र गति बलर भिभियन किंग्मा पनि नेपालका लागि खतरा हुन सक्ने खेलाडी हुन् । २९ वर्षीय अनुभवी खेलाडी किंग्मा पछिल्लो समय राम्रो लयमा छन् ।

हालसम्म १८ टी-२० खेल खेलेका उनले २० विकेट लिएका छन् । गत मार्चमा कीर्तिपुरमा भएको खेलमा किंग्माले नेपालविरुद्ध ३ विकेट लिएका थिए । गत मेमा स्कटल्यान्डसँग भएको खेलमा किंग्मा एक्लैले ४ विकेट लिएका थिए ।

५. आर्यन दत्त

टी-२० विश्वकपको वार्मअप खेलमा श्रीलंकाविरुद्ध ३ विकेट लिएका नेदरल्यान्ड्सका स्पीनर आर्यन दत्त पनि राम्रो लयमा छन् । २१ वर्षीय स्पिनर दत्तले ११ टी-२० खेलमा ८ विकेट लिएका छन् ।