सिके राउतले उद्घोष गरेको ‘नौलो गणतन्त्र’ कस्तो हुन्छ ? यी हुन् मुख्य तीन विशेषता

काठमाडौं । जनमत पार्टीका उपाध्यक्ष अब्दुल खानले संविधान संशोधन गरी आर्थिक नीतिको रूपमा सामाजिक लोकतन्त्रको संविधानमै व्यवस्था गरिने बताएका छन्।

पार्टीका अध्यक्ष डा‍. सीके राउत गणतन्त्र दिवसको अवसरमा उद्घोष गरेको ‘नौलो गणतन्त्र’ आन्दोलनबारे प्रतिनिधिसभाको बैठकमा बोल्दै नौलो गणतन्त्र र सामाजिक लोकतन्त्रको विचार नयाँ नभएको बताए।

यस्तो छ उनको भनाइ छ:

हाम्रो देश चरम आर्थिक, राजनीतिक, भुमरीमा फसेको बेला जताततै जनतामा कार्यपालिका, व्यवस्थापिका र न्यायपालिकाप्रति आघात असन्तुष्टि र अविश्वासको अवस्थामा जनमत पार्टी र अध्यक्ष डा सिके राउतले देश विकास र निकासको निम्ति यही ज्येष्ठ १५ गते नौलो गणतन्त्र र सामाजिक लोकतन्त्रको अवधारणा अघि सारी देशमा निकासको लागि मार्ग प्रशस्तको उद्घोष काठमाडौंको भृकुटीमण्डपबाट गर्नुभएको छ।

नौलो गणतन्त्र र सामाजिक लोकतन्त्रको विचार नयाँ होइन, नेपालमा पनि विभिन्न कालखण्डमा भिन्न भिन्न नेताहरूले नीतिका रूपमा कुनै न कुनै रूपमा ई विचारहरूलाई अघि सारेका छन्।

-नेपाली कांग्रेसको चौधौँ महाअधिवेशनमा महामन्त्रीका उम्मेदवार गगनकुमार थापाले सामाजिक लोकतन्त्रलाई आधार मान्दै समुन्नत नेपालका लागि सैद्धान्तिक रूप रेखा १५ बुँदाहरूमा चर्चा गर्दै नेपाली कांग्रेसलाई नवउदारवाद बाट रूपान्तरणका प्रस्ताव अघि सारेका थिए।

-एमाले पाँचौँ महाअधिवेशनमै सी।पी। मैनालीको नौलो जनवाद र रघुजी पन्तको सामाजिक जनवाद अर्थात् (सामाजिक लोकतन्त्रकै) विचार पनि अघि सारिएको थियो।

-माओवादी आन्दोलनका नेतृत्व गरेका र वैचारिक आधारशिला तयार गरेका डा। बाबुराम भट्टराई नेतृत्वले नेपालमा साम्यवादी आन्दोलनको सान्दर्भिकता सकिएको घोषणा गर्दै नेपाल समाजवादी पार्टी गठन गरेर बस्नुभएको छ। यस पार्टीले अबको निकास आर्थिक विकास र अबको राष्ट्र सङ्कल्प नयाँ समाजवादी विकल्प जस्ता नारा राख्दै समुन्नत समाजद्वारा निर्देशित शिक्षा, स्वास्थ्य, रोजगारीलाई प्राथमिकता दिँदै उज्यालो समतामूलक भविष्यको निर्माणको लक्ष्य लिइएको छ।

-राष्ट्रिय प्रजातन्त्र पार्टी (राप्रपा) ले २०८० ज्येष्ठ १ गते पेश गरेको राजनीतिक प्रतिवेदनमा जनताबाट प्रत्यक्ष निर्वाचित कार्यकारी प्रधानमन्त्री, कल्याणकारी राज्य, निःशुल्क र गुणस्तरीय शिक्षा र स्वास्थ्यसहितका विषयहरू राखेको छ। तसर्थ मुलुकको समृद्धि, रोजगारी र हितको निम्ति नौलो गणतन्त्र र सामाजिक लोकतन्त्रको विकल्प छैन।

सामाजिक लोकतन्त्र एउटा संशोधनवादी विचारधारा हो जसले जनताको स्वतन्त्रता र समानतालाई प्रदान गर्ने सामूहिक प्रयास हो। यसले नत पूर्णरूपमा पुँजीवाद र नतपूर्ण रूपमा समाजवादलाई अंगिकार गर्दछ। यसले अहिंसात्मक मार्गबाट समाजवादी मूल्य र मान्यताहरूलाई स्थापित गर्न चाहन्छ।

मुख्य विशेषता:

१. लोक कल्याणकारी योजनाहरू प्रदान गरिने।

२. आर्थिक क्षेत्रहरूलाई गम्भीर राज्यको नियन्त्रणमा राखिने।

३. आय र व्ययमा सन्तुलन कायम गरी सामाजिक न्याय प्रदान गरिने।

संविधान संशोधन गरी आर्थिक नीतिको रूपमा सामाजिक लोकतन्त्रलाई व्यवस्था गरी समाजवाद उन्मुख व्यवस्था हटाउने।