प्रचण्ड-ओलीसँग नेकपा एसको अडान : हामीलाई अपमानजक व्यवहार भयो, प्याकेजमै सहमति चाहिन्छ

काठमाडौं । नेकपा एकीकृत समाजवादीले सत्ता समीकरणमा संघदेखि प्रदेशसम्म प्याकेजमै सहमति खोजेको छ । मधेश सरकार गठनमा निर्णायक भएपछि नेकपा एसका अध्यक्ष माधव नेपालले प्रधानमन्त्री पुष्पकमल दाहाल प्रचण्ड र एमालेका अध्यक्ष केपी शर्मा ओलीसँग प्याकेजमै सहमति खोजेका हुन् ।

यद्यपी, मधेश सरकार गठनमा सहयोग गर्न नेकपा एस तयार भइसकेको छ । नेकपा एसका प्रवक्ता जगन्नाथ खतिवडाले सरकारमै भएकाले तत्काल अर्को विकल्प खोज्ने पक्षमा नरहेको बताए ।

उनले भने, ‘हामी सरकारमा छौं । यो गठबन्धनलाई भत्काउने कुनै उद्देश्य छैन । त्यसैले मधेश सरकारमा सहयोग गरेरै जानुपर्छ भन्ने हाम्रो निष्कर्ष छ ।’

आफ्नो पार्टीको नेतृत्वको सुदूरपश्चिम प्रदेश सरकारलाई एमाले र माओवादीले सहयोग नगरेपछि आफूहरुले प्याकेजमै सहमति खोजेको अर्का एक नेताले बताए ।

ती नेताले नेपाल प्रेससँग भने, ‘सुदूरपश्चिमा हाम्रो नेतृत्वको सरकार छ । एमाले माओवादी दुवैले मन्त्री दिएका छैनन् । उहाँहरुले मन्त्री नदिएर मुख्यमन्त्रीलाई काम गर्न समस्या भएको छ । यो त असहयोग हो नि । कर्णालीमा गठबन्धन सरकार भनेका छन् तर हाम्रो पार्टीलाई सांसदलाई मन्त्री बनाएका छैनन् । कोशी प्रदेशमा पनि हामीले विश्वासको मत दिनुपर्ने तर हामीलाई मन्त्री नदिने उनीहरुको बहुमत पुगेको ठाउँमा हामी नचाहिँने अहिले अफ्ठ्यारो पर्दा मधेशमा हामीलाई खोज्नुभयो ।’

सत्ता समीकरणमा आफूहरु एमाले र माओवादीको दादागिरीमा नचल्ने अडान सुनाए ।

ती नेता थप्छन्, ‘सहकार्य गरेपछि व्यवहार त मिल्दै जानुपर्छ सरकारले नीति तथा कार्यक्रम र बजेट ल्याउनुभयो हामीलाई सम्बोधन छैन। मधेशमा आफ्नो खुसीले सरकार छाड्नुभयो अनि हामीले छाड्दिनुपर्ने हामीसँग सल्लाह नगर्ने ? उनीहरुले छाडेपछि हामी छिर्सिदै आउनुपर्ने ? एउटै सहकार्यमा भएपछि हामीसँग सल्लाह किन नगर्ने? अहिले बहुमत नपुगेपछि पछ्याउँन थाल्नुभएको छ ।’

सत्ता समीकरणमा नेकपा एसलाई अपमानजनक ढंगले व्यवहार भइरहेको ती नेताको आरोप छ ।

ती नेताले थपे, ‘हामीलाई यी सबै विषयमा कुरा गरेर प्याकेजमै छलफल गरौं भनेका हौं । मधेशमा समर्थनको कुरा मात्रै होइन ल हामी समर्थन दिन्छौं त्यहाँ पनि कति मन्त्रालय दिने कति मन्त्री बनाउने छलफल हुनुपर्छ कि पर्दैन। हामीले मधेश मात्रै होइन, सुदुरपश्चिम, कोशी, कर्णालीको कुरा पनि राखेका छौं ।’

यही बिषयलाई केन्द्रमा राखेर हिजो अध्यक्ष माधव नेपालले प्रधानमन्त्री प्रचण्ड र ओलीसँग छलफल गरेका थिए । तर, प्रचण्ड र ओलीबाट सहयोग गर्ने आश्वासन आएपनि विश्वस्त हुने आधार नदेखिएको नेताहरु बताउँछन् । नेकपा एसले प्रदेश सरकारमा मात्रै नभएर नियुक्तिमा पनि आफ्नो पार्टीलाई सम्मानजनक हिंसा हुनुपर्ने अडान राखेको छ ।