माओवादीविरूद्धका गतिविधिलाई रचनात्मक ढंगले कमजोर पार्नुपर्छ : प्रधानमन्त्री प्रचण्ड

काठमाडौं । प्रधानमन्त्री पुष्पकमल दाहाल ‘प्रचण्ड’ ले समाजवादको आधार तयार पार्नको लागि माओवादीले सबै क्षेत्रबाट संघर्ष गर्ने नीति अख्तियार गरेको बताएका छन् । माओवादीनिकटको समाज कल्याण विभागको कार्यक्रमलाई सम्बोधन गर्दै पार्टीविरुद्धको गतिविधिहरूलाई रचनात्मक ढंगले कमजोर पार्ने गतिविधिमा लाग्न निर्देशन दिए ।

उनले भने, ‘समाजवादको आधार तयार पार्नको लागि पार्टीले शान्तिपूर्ण प्रतिस्पर्धाबाट सरकार, सदन र सडकका सबै क्षेत्रबाट संघर्ष गर्ने नीति अख्तियार गर्दै आइरहेको छ । अतिवादी प्रवृत्तिबाट बच्दै सामाजिक क्षेत्रलाई राजनीतिक र समाजिक रुपान्तरण र समाजवादको लक्ष्यसँग जोड्ने प्रवृत्ति नै सही प्रवृत्ति हो ।’

सरकारी संस्थाहरूलाई राज्यको प्राथमिकताको आधारमा नियमन निर्देशन र परिचालन गर्ने नीति लिनुपर्ने उनको भनाइ छ ।

प्रचण्डले भने, ‘हाम्रो पार्टीले सबै कमिटीमा गैरसरकारी तथा सामाजिक संघ संस्थाहरूको विभाग गठन गर्नुपर्छ । यसले पार्टीको पुनर्गठन र रुपान्तरणको प्रक्रियामा समेत योगदान गर्छ । पार्टीविरुद्धको गतिविधिहरूलाई रचनात्मक ढंगले कमजोर पार्ने, पार्टीको पक्षमा जनमत निर्माण गर्ने र निर्मित जनमतलाई पार्टीमा संगठित गर्नुतिर लाग्नुपर्छ ।’