तत्काल एमालेसँग एकताको सम्भावना छैन: अध्यक्ष नेपाल (भिडिओ)

काठमाडौं । नेकपा एकीकृत समाजवादीका अध्यक्ष माधवकुमार नेपालले तत्काल एमालेसँग एकताको सम्भावना नरहेको बताएका छन् ।

नेकपा एकीकृत समाजवादी कोशी कमिटीद्वारा पार्टी केन्द्रीय कार्यालय आलोकनगरमा आयोजित प्रशिक्षण कार्यक्रमलाई सम्बोधन गर्दै उनले विगतको कुरा छोडेर कुनै समीक्षा नगर्दा पनि एमालेसँग तत्काल एकताको सम्भावना नरहेको बताए ।

एमालेसँग एकताका लागि एमालेले पनि चाहना देखाउन आवश्यक रहेको उनको भनाइ थियो ।

अध्यक्ष नेपालले एमाले अध्यक्ष केपी शर्मा ओलीलाई आफ्नो पार्टीप्रति सकारात्मक हुनसमेत आग्रह गर्दै प्रधानमन्त्री पुष्पकमल दाहाल भने सकारात्मक रहेको बताए ।

‘मैले केपी ओली कमरेडसँगको भेटमा भनेको थिएँ । ल हेर्नुस्, प्रचण्डजीको भूमिका पोजेटिभ छ, तपाईंको पनि यस्तै पोजेटिभ हुनुपर्छ । उहाँ सुनेर बस्नुहुँदो रहेछ ज्यादा, चित्त नबुझेर होला, भित्रभित्रै मुर्मुरिएर पनि होला । मुर्मुरिने काम गर्नुहुँदैन’, उनले भने, ‘हिजोको कुरा पनि बिर्सौं, ठीक छ, तर अहिले एमालेसँग एकताको कुनै सम्भावना देखिएन । विगतको समीक्षा नगर्दा पनि त्यो देखिएको छैन । किनभने चाहना त हुनुपर्छ नि !’

समाजवादी मोर्चाको पुनर्गठन गरेर अघि बढ्ने सोच आफूहरुको रहेको र सोहीअनुसार अघि बढिरहेको उनको भनाइ छ ।

‘मधेश प्रदेशमा हामीलाई मुख्यमन्त्री दिन प्रस्ताव आयो । यही पुरानै गठबन्धनमा बस्नुुस्, मुख्यमन्त्री लिनुस् । हिजो आइदिएको भए कति राम्रो हुन्थ्यो । बिहान पनि त्यही फोन, बेलुका पनि त्यही फोन आउँछ’, फरक प्रसंगमा उनले भने, ‘अहिले यसो गर्नु उचित हुँदैन भन्ने हामीले सोच्यौं । केन्द्रमा एउटा र प्रदेशमा अर्को सरकारमा बस्नु उपयुक्त हुँदैन भन्ने हामीले सोच्यौं । त्यसैले हामीले सम्बन्ध सबैसँग सुमधुर राख्न चाहन्छौं । परिस्थितिअनुसार हामीले केन्द्रीय गठबन्धनलाई कायम राखेर जानुपर्ने अवस्था छ ।’

अध्यक्ष नेपालले राष्ट्रको आवश्यक पहिचान गरेर अघि बढ्न जरुरी रहेको बताए ।