आगामी निर्वाचनमा जसले मोर्चा कसे पनि काठमाडौंमा एमालेलाई कसैले हराउन सक्दैन: ओली (भिडिओ)

काठमाडौं । नेकपा एमालेका अध्यक्ष केपी शर्मा ओलीले आगामी निर्वाचनमा काठमाडौं जिल्लाका सबै क्षेत्रमा एमालेले जित्ने दाबी गरेका छन् ।

एमाले काठमाडौं जिल्ला कमिटीको सातौं अधिवेशन उद्घाटन सत्रलाई सम्बोधन गर्दै उनले एमालेसँग कसैको तुलना हुन नसक्ने बताए ।

अध्यक्ष ओलीले भने, ‘काठमाडौंमा स्थानीय तहको निर्वाचनमा हामीले अपेक्षित परिणाम ल्याउन सकेनौं । संसदीय निर्वाचन हामीले हार्‍यौं । विभिन्न ठाउँको मेयर र प्रदेशसभा हारेका हौंला । हामीले एउटा निर्वाचन हारेका हौं । त्यो पनि हामीलाई हराउन खोज्नेभन्दा राम्रो गरेका छौं । कांग्रेस माओवादी र नेकपा एसको काँधमा टेकेर अग्लो देखिएको हो । हामी विरोधी शक्तिलाई पनि भन्छौं, आगामी निर्वाचनमा काठमाडौं जिल्ला एमालेको हुन्छ, सबैले कान खोलेर सुने हुन्छ । मोर्चा कसे हुन्छ ।’

उनले अधिवेशनबाट नेतृत्व चयनमा सहमति गर्न निर्देशन दिए । सहमति नभए पनि व्यक्तिगत प्रतिस्पर्धा भए पनि संगठन बिगारे राम्रो नहुने उनले चेतावनीसमेत दिए ।