विराटनगरमा गृहमन्त्रीको पत्रकारलाई जवाफ- अनुसन्धान नटुङ्गिई पत्रकार सम्मेलन गरिन्छ र ? (भिडिओ)

विराटनगर । उपप्रधान तथा गृहमन्त्री रवि लामिछानेले संसदमा आफूले कसैको पनि नाम तोकेर मुलुुकको गोप्य सूचना बेचेको विषयमा नबोलेको बताएका छन् ।

विराटनगर विमानस्थलमा पत्रकारसँग कुरा गर्दै उनले मिडियामा आएको समाचारका विषयमा कुरा उठाएको बताए । उनले मुलुकका गोप्य सूचना विदेशीलाई बेच्नेमाथि कारबाही र अनुसन्धानको विषय के भइरहेको छ भनेर जिज्ञासाको विषयमा भने कुनै जवाफ दिएनन् । यो पुरानो कुरा भएको भन्दै उनी तर्किएर हिँडेका छन् ।

विराटनगर विमानस्थलमा आइतबार सञ्चारकर्मीसँग संक्षिप्त कुराकानी गर्ने क्रममा देशका गोप्य सूचना विदेशीलाई बेच्नेमाथि कारबाही र अनुसन्धानको विषय कहाँ पुग्यो ? भनेर पत्रकारले प्रश्न गरेका थिए ।

जवाफमा उनले ‘सञ्चार माध्यममै आएका कुरा मैले संसदमा उठाएको’ भन्ने जवाफ दिए । सांसदलाई सम्बोधन गर्ने क्रममा लामिछानेले देशका गोप्य सूचना विदेशीलाई बेच्ने एजेन्ट र एसेट्सलाई पनि बाहिर पठाऔँ भनेर बोलेका थिए ।

गृहमन्त्री लामिछानेले संसदमा बोल्ने सन्दर्भमा आफूले कसैको नाम लिएको थाहा नभएको बताए। ‘सञ्चार माध्यममा यस्ता कुरा पनि आउँछन् नि भन्ने कुरा गरेको हुँ ।पत्रपत्रिका र सञ्चार माध्यममा आएकै कुराले गर्दा खेरी हो,’ लामिछानेले भने, ‘अरू प्रश्न पनि छन् होला नि साथीहरू? तपाईँहरूका आफ्ना प्रश्न पनि भइदिएको भए हुन्थ्यो । कसैले खडा गरिदिएको प्रश्न महिनौँसम्म सोध्नु भयो भने कसरी हुन्छ? अनुसन्धानका विषय यसरी पत्रकार सम्मेलन गर्दै अगाडि गइन्छ र?

लामिछानेले संसदमा प्रतिपक्षीले जवाफ मागेमा दिन आफू तयार रहेको बताए । संसदीय मर्यादा विपरीत बोलेकाले गृहमन्त्री वा प्रधानमन्त्रीले जवाफ दिनुपर्छ भनेर काँग्रेसले भनिरहेको छ नि भनेर सोधिएको प्रश्नमा उनले भने, भने ‘जवाफ दिन पर्ने भए दिउँला नि ।’ लामिछाने आजदेखि सुरु हुने दुई दिने राष्ट्रिय सुरक्षा बैठकमा सहभागी हुन विराटनगर आएका हुन् ।