विश्वकपको ‘हाइभोल्टेज’ खेल : रवाफिलो भारतविरुद्ध अविश्वसनीय पाकिस्तान

काठमाडौं । अमेरिकामा जारी टी-२० विश्वकपमा आज चिर प्रतिद्वन्द्वी भारत र पाकिस्तान भिड्दैछन् । यो ‘हाइभोल्टेज’ न्यूयोर्कको नासाउ काउन्टी इन्टरनेसनल क्रिकेट स्टेडियम भरिभराउ हुने अपेक्षा छ ।

भारतले आफ्नो पहिलो खेलमा आयरल्यान्डविरुद्ध सहज जित हासिल गरेको थियो भने पाकिस्तान घरेलु टिम अमेरिकासँग स्तब्ध बनेको थियो । पाकिस्तानको लागि आजको खेल प्रतिष्ठाको विषय मात्र नभएर अर्को चरणमा उक्लिनका निम्ति अत्यन्त महत्त्वपूर्ण छ । आज पनि पराजित भए पाकिस्तानको गणितीय सम्भावना मात्रै बाँकी रहन्छ । उसले आफू जितेर मात्र पुग्दैन, अरू टिमको नतिजामा पनि भर पर्नुपर्छ । भारतलाई यस्तो दबाब छैन ।

म्याचअगाडि नै कन्डिसनलाई आफ्नो अनुकूल पार्नलाई भारतले सक्दो प्रयास गरिरहेको छ । नासाउ स्टेडियमको ड्रप इन पिचमा खेल हुँदैछ, जुन ब्याटिङका लागि कठिन मानिन्छ । अघिल्लो खेल भारतले यही मैदानमा आयरल्यान्ड विरुद्ध खेलेको थियो । अभ्यास म्याच पनि बंगलादेशविरुद्ध भारतले यहीँ खेलेको हो । त्यसैले भारतले पिचको व्यवहार चिनिसकेको छ ।

भारतीय टीम एक सातादेखि न्यूयोर्कमा नै छ । आईसीसीले भारतीय टीमलाई रंगशालाबाट १० मिनेटको दुरीमा रहेको होटलमा बस्ने प्रबन्ध मिलाएको थियो । पाकिस्तानी टिम भने ७ तारिखमा मात्रै न्यूयोर्क आएको हो । रंगशालाबाट डेढ घण्टाको दुरीमा रहेको होटलमा पाकिस्तानी टिमलाई राखिएको थियो । तर, टीम म्यानेजमेन्टले बारम्बार कम्प्लेन गरेपछि भर्खरै स्थानान्तरण गरेर नजिकैको होटलमा राखिएको छ । पाकिस्तानका लागि न्यूयोर्कको पीच नौलो हुने छ ।

भारतले पाकिस्तानविरुद्धको म्याच अगाडि पीचलाई आफ्नो बलिङका लागि अनुकूल हुने गरी सुधार गर्न लगाएको थियो । भारतीय क्रिकेट बोर्ड बीसीसीआइको दबाबपछि आईसीसीले पीचको गुणस्तर राम्रो नदेखिएको भन्दै ‘सुधार भइरहेको’ जनाएको छ । भारतीय प्रशिक्षक राहुल द्रविण स्वयम् उपस्थित भएर क्युरेटरलाई निर्देशन दिएका थिए । भारतले स्पिनरलाई सहयोग गर्ने गरी पीचलाई तोडमोड गरेको बुझिएको छ । पाकिस्तानसँग गतिला स्पिनर नभएको र फास्ट बलरमा भर पर्ने भएकाले भारतले यस्तो रणनीति अवलम्बन गरेको हो ।

भारत–पाकिस्तानका हरेक खेलहरू तनावपूर्ण हुन्छन् नै । द्विपक्षीय प्रतियोगिताहरू नभए पनि यी दुई देश पछिल्ला १३ वर्षमा १२ पटक भिडिसकेका छन् । यसमध्ये १० पटक भारतले जितेको छ र २ खेलको नतिजा मात्रै पाकिस्तानको पक्षमा गएको छ । आजको म्याचमा पनि भारतलाई हराउन पाकिस्तानलाई सजिलो छैन ।

भारतीय टीम निकै सन्तुलित र स्थिर छ । ब्याटिङ, बलिङ र फिल्डिङ तीनै पक्षमा भारत पाकिस्तानभन्दा बलियो देखिन्छ । भारतसँग ब्याटिङमा विराट कोहली, रोहित शर्मा, सूर्यकुमार यादव, हार्दिक पाण्ड्या, रिसव पन्तजस्ता कहलिएका नामहरू छन् । यद्यपि, बलिङ मैत्री पीचमा भारतको सशक्त ब्याटिङ पङ्ति तहसनहस भएका उदाहरण पनि थुप्रै छन् ।

पाकिस्तानको ब्याटिङ त्यति सुदृढ छैन । मोहम्मद रिजवान र बाबर आजमको ओपनिङ जोडीमा पाकिस्तानले धेरै भर पर्नुपर्ने हुन्छ । उनीहरू दुवैको ब्याटिङ शैलीमा पनि प्रश्न उठ्दै आएको छ । पाकिस्तानको मध्यक्रम अपरिपक्व छ । फकार जमानबाहेकका ब्याट्सम्यानहरू अहिले पनि अन्तर्राष्ट्रिय प्रतिस्पर्धामा आफूलाई प्रमाणित गरिसकेका छैनन् । आजको खेलमा पाकिस्तानले आजम खानको स्थानमा इमाद वसिमलाई खेलाउन सक्छ ।

बलिङतर्फ पनि फास्ट र स्पिनको राम्रो सन्तुलन भारतसँग छ । पाकिस्तानले भने फास्ट बलरमा बढी भर पर्नुपर्ने हुन्छ । भारतीय टिममा फास्ट बलिङको नेतृत्व जसप्रित बुमराहले गर्ने छन् । उनी कुनै पनि ब्याट्सम्यानका लागि सबैभन्दा कठिन बलर हुन् । पाकिस्तानसँग साहिन अफ्रिदी, मोहम्मद अमिर, ह्यारिस रफ र नसिम साह गरी ४ फास्ट बलर छन् ।

पाकिस्तान अन्तर्राष्ट्रिय क्रिकेटमा ‘अविश्वसनीय’ टीमका रूपमा परिचित छ । पाकिस्तानले कहिले उत्कृष्ट खेल्छ त कहिले साह्रै झुर । भारतविरुद्ध पाकिस्तानको कुन रूप प्रकट होला, त्यसमै आजको नतिजा निर्भर हुने देखिन्छ ।

३४ हजार दर्शक क्षमताको नासाउ रंगशालाका सस्ता टिकटहरू बिकिसकेका छन् । महँगो दरका प्रिमियम टिकटहरू भने अझै उपलब्ध रहेको अन्तर्राष्ट्रिय सञ्चारमाध्यमले जनाएका छन् । यस्ता टिकटको मूल्य १५०० डलरदेखि १० हजार डलरसम्म राखिएको छ । टिकट रिसेल गर्ने वेबसाइटहरूले मूल्य बढाएर १७ हजार ४७५ डलरसम्ममा बेचिरहेको अल जजिरामा प्रकाशित समाचारमा उल्लेख छ ।

आजको खेलमा टस एकदमै महत्त्वपूर्ण हुन सक्ने ठानिएको छ । टस जित्ने टिमले पहिलो बलिङ रोजेर विपक्षी टिमलाई सस्तैमा अलआउट गर्ने रणनीति लिनेछन् । दोस्रो ब्याटिङ गर्ने टिमलाई सानो लक्ष्य पछ्याउँदाको फाइदा मिल्न सक्छ ।