उपेन्द्र यादवलाई माधव नेपालको प्रस्ताव- हामी मिलेर अगाडि बढौं

जनकपुरधाम । नेकपा एकीकृत समाजवादीका अध्यक्ष माधवकुमार नेपालले जसपा नेपालका अध्यक्ष उपेन्द्र यादवलाई मिलेर अगाडि बढ्न प्रस्ताव गरेका छन् ।

जसपा नेपालको जनकपुरधाममा भएको महाधिवेशनको उद्घाटन सत्रमा शुभकामना मन्तव्य राख्दै अध्यक्ष नेपालले उक्त प्रस्ताव राखेका हुन् ।

उनले भने, ‘हामी सहयात्री हौं । केन्द्र र प्रदेश सरकारमा संगै थियौं । संसदमा पनि साथै हो । सँगसँगै काम गर्दै आएका हौं । हामी मिलेर अगाडि बढ्नुपर्छ । विचार र मन मिलेको छ भने त्यसपछि मिलेर अगाडि बढ्ने कुरामा केही बाधा हुन सक्दैन ।’

अध्यक्ष नेपालले हरेक चुनौतीलाई सामना गर्दै बुलन्दीका साथ अगाडि बढ्न उपेन्द्र यादवलाई सुझाव दिए ।

उनले भने, ‘उपेन्द्र यादवले खुट्टा कमाउनु भएन, जसरी सबै चुनौतीको सामना गर्नुभयो । त्यही बुलन्दीको साथ अगाडि बढ्नुस् ।’

उनले जसपा नेपालले लिएको संकल्प र अठोट पूरा हुनुपर्नेमा जोड दिए । पार्टी विभाजन सन्दर्भमा उनले जसपा चुनौतीको बीचबाट अगाडि बढिरहेको आफूलाई ज्ञात रहेको बताए ।

‘चुनौतीको बीचबाट अगाडि बढ्दा तपाईंहरुको क्षमताको परीक्षा भइरहेको छ’, अध्यक्ष नेपालले भने, ‘समाजवादको ध्येयमा अगाडि बढ्नु छ । देशको विकास र जनताको सेवा गर्न इमानदारिता चाहिन्छ ।’

अहिले राजनीतिमा भ्रष्टाचार र स्वार्थी तथा व्यक्तिवादी प्रवृत्ति बढेको उनको भनाइ थियो ।

‘मैने क्या पाया ? यो प्रश्न मान्छेले मात्रै गर्छन्’, उनले भने, ‘हमने क्या दिया ? यो प्रश्न गर्दैनन् । त्यसो हुनाले क्या पाया नही, हमने क्या दिया ? यो प्रश्न गरौं हामी आफैंलाई । त्यो भावना महाधिवेशनले जगाउन सकोस् ।’