शेखर कोइरालाको आरोप- सरकारले मुलुकमा सुशासन दिन सकेको छैन (भिडिओ)

काठमाडौं । प्रमुख प्रतिपक्ष दल नेपाली काँग्रेसका नेता डा. शेखर कोइरालाले सरकारले मुलुकमा सुशासन दिन नसकेको बताएका छन् ।

कांग्रेस नेता कोईरालाले अहिले मुलुकमा आर्थिक विकास हुने सम्भावना पनि नरहेको जिकिर गरे । शैलजा आचार्यको १५ औं स्मृति दिवसको अवसर पारेर सोमवार काठमाडौंमा आयोजित एक कार्यक्रममा बोल्दै उनले सबै लोकतन्त्रवादीहरुले सरकारको स्थायित्वको लागि सोच्नुपर्ने बेला आएको पनि बताए ।

नेता कोईरालाले विपी र शैलजा आचार्यलाई स्मरण गरेर अघि बढ्नसके मुलुकमा राजनीतिक स्थायित्व, भ्रष्टचारको अन्त्य र सुशासनको पक्षमा काँग्रेसले काम गर्न सक्ने दाबी समेत गरे । उनले केन्द्रमा मात्रै ३ पटक सरकार परिवर्तन भएको र अझै कति हुने हो भन्ने कुरा टुंगो नभएकाले यसको स्थायित्वको लागि सबै लोकतन्त्रवादीहरुले सोच्नुपर्ने तर्क गरे ।

त्यस अवसरमा नेता कोईरालाले नेपालको राजनीतिक इतिहासमा शैलजा आचार्य एक साहशिक राजनीतिज्ञको रुपमा रहनुभएको पनि स्मरण गराए ।

यस्तो छ कोइरालाको भनाइः

यो कृषि मन्त्रालयमा त भ्रष्टाचारको जालो छ भनेपछि उहाँले राजीनामा गर्नुभएको कुरा तपाईहरु धेरैलाई थाहा होला, धेरैलाई थाहा नहोला पनि । अहिले देशको जुन परिस्थिति छ । यो परिस्थितिमा शैलजा दिदी भएको भए के गर्नुहुुन्थ्यो ? कसरी हिँड्नु हुन्थ्यो, कसरी अगाडि बढ्नु हुन्थ्यो ? भनेर हामीहरुले सोच्नपर्ने अवस्था छ ।

किनभने उहाँको बानी भीडसँग हिँड्ने होइन, एक्लै हिँडने उहाँले आफू बाँचुञ्जेल त्यसलाई अनुशरण गरेर हिँड्नुभयो । र अहिले जुन राजनीतिक परिस्थिति छ ।

राजनीतिक स्थायित्व, सरकारको स्थायित्व छ कि छैन ? भन्दा छैन । आर्थिक विकासका हामी कुरा गर्छौं । त्यो आर्थिक विकास हुनसक्ने अवस्था हामी छैनौ अहिले । सुशासन दिन सकेको छैन । भ्रष्टाचारले हामीलाई गाँजी सकेको अवस्था छ ।

यस्तो बेलामा हामीहरुले विपीलाई, शैलजा दिदीलाई सम्झेर काम गरेर अघि बढ्न सक्यौँ भने नेपाली काँग्रेसलाई फेरि पुरानै अवस्थामा फर्काउन सक्छौँ भन्ने मलाई लाग्छ । शैलजा दिदीलाई सम्झिदाखेरी हामीले राजनीतिक स्थिरता अहिले देशमा जुन छैन ।

त्यसमा कसरी राजनीतिक स्थिरता ल्याउने, सरकारको स्थिरता ल्याउने भन्ने कुरा सबै लोकतन्त्रवादीहरुले सोच्नुपर्ने अवस्था आएको छ । यो डेढ वर्षमा ८ वटा सरकार छ । ७ वटा प्रदेशको सरकार छ । एउटा केन्द्रको सरकार छ । २३ पटक ८ वटा सरकार चेन्ज भएको रहेछ । केन्द्रमा पनि तीन पटक भईसक्यो । अब अझ कति पटक हुने हो ? यसरी कसरी अगाडि जान्छ ?यो कुरालाई मनन गरि हामी अगाडि बढौं ।