ईंग्ल्याण्डलाई नकआउट गर्न स्कटल्यान्डसँग मिलेमतो गर्न सक्ने अष्ट्रेलियाकाे संकेत, मार्समाथि प्रतिबन्धको खतरा

काठमाडौं । पछिल्लो खेलमा नामिबियालाई सहजै हराएर सुपर ८ मा स्थान बनाएपछिको प्रेस मिटमा अष्ट्रेलियाका बलर जोस हेजलउडले एउटा ‘खेल भावना विपरीत’ को टिप्पणी गरे । उनले भने, ‘अब हामी ईंग्ल्यान्डलाई विश्वकपबाट नकआउट गराउन स्कटल्यान्डसँगको खेलमा जितको अन्तराललाई म्यानुपुलेट गर्न प्रयास गर्नेछौं ।’

हेजलउडको यो अभिव्यक्तिले विश्वकपमा तरङ्ग उब्जेको छ भने आईसीसी पनि झस्किएको छ । हेजलउडको दाबीजस्तै के अष्ट्रेलियाले स्कटल्यान्डविरुद्धको खेलमा मिलेमतो गर्छ ? यदि साँच्चै त्यस्तो गरेको पाइएमा अष्ट्रेलियाका कप्तान मिचेल मार्स प्रतिबन्धमा पर्न सक्नेछन् ।

अमेरिका र वेस्ट इन्डिजमा जारी टी २० विश्वकपको एउटा बलियो दाबेदार ईंग्ल्यान्ड पनि हो । तर विश्वकपको पहिलो चरणमा दुई म्याच खेल्न बाँकी रहेको ईंग्ल्यान्ड पहिलो जितको खोजीमा छ । स्कटल्यान्डविरुद्ध ईंग्ल्यान्डको पहिलो खेल वर्षाले बिथोलिएको थियो । उक्त खेलमा पहिलो ब्याटिङ गरेको स्कटल्यान्डले बिना विकेट क्षति ९० रन बनाएको थियो । त्यसपछि वर्षाका कारण खेल हुन सकेन ।

दोस्रो खेलमा अष्ट्रेलियासँग ईंग्ल्यान्ड ३६ रनले पराजित भयो । यसरी दुई खेलबाट एक अंक मात्र जोड्न सकेको ईंग्ल्यान्डले अब बाँकी ओमान र नामिबियाविरुद्धको खेलमा फराकिलो जित निकाल्नुपर्ने चुनौती छ । अष्ट्रेलियाले लगातार तीन खेल जितेर सुपर ८ मा स्थान बनाइसक्दा दोस्रो स्थानका लागि स्कटल्यान्ड र ईंग्ल्यान्ड दौडमा छन् । नामिबिया र ओमान समूह चरणबाट नकआउट भइसकेका छन् ।

ईंग्ल्यान्डले अब ओमान र नामिबियामध्ये एक टीमसँग हार्‍यो भने उसको सुपर ८ मा पुग्ने सम्भावना समाप्त हुनेछ । तर दुवै खेल जित्यो भने नेट रनरेटका आधारमा ईंग्ल्यान्ड र स्कटल्यान्डमध्ये एउटा सुपर ८ मा जान्छन् । यी दुई टिमको भवितव्य अष्ट्रेलियाको हातमा छ । यदि अष्ट्रेलियाले स्कटल्यान्डमाथि फराकिलो जित हासिल गर्‍यो भने ईंग्ल्यान्डको भाग्य खुल्न सक्छ । यदि अष्ट्रेलियाले साँघुरो जित निकाल्यो भने स्कटल्यान्डको सम्भावना बढ्छ । यदि अष्ट्रेलिया हार्‍यो भने ईंग्ल्यान्ड सोझै नकआउट हुन्छ ।

यस्तो सिनारियोमा हेजलउडले स्कटल्यान्डसँग खेल मिलेमतो गर्न सक्ने संकेत गरेका हुन् । इंग्ल्यान्ड टी २० मा बलियो टीम भएकाले उ समूह चरणबाटै आउट हुँदा आफूहरूलाई फाइदा हुने हेजलउडको भनाइ छ ।

प्रेसमिटमा उनले भने, ‘यो प्रतियोगितामा हामीले फेरि एक दिन ईंग्ल्यान्डसँग भिड्नुपर्ने हुन सक्छ । ईंग्ल्यान्ड यस्तो टीम हो जसले आफ्नो दिनमा जसलाई पनि पराजित गर्न सक्छ । हामी टी २० क्रिकेटमा ईंग्ल्यान्डबाट धेरैपटक मात खाएका छौँ । त्यसैले यदि हामी ईंग्ल्यान्डलाई प्रतियोगिताबाट बाहिर पठाउन सक्यौँ भने त्यो हाम्रो साथसाथै अन्य टीमहरुको पनि हितमा हुन सक्छ ।’
हेजलउड यतिमा रोकिएनन् ।

उनी थप्छन्, ‘यो रोचक हुनेछ । हामी यसअघि एउटा टिमको रूपमा यो परिस्थितिमा पहिले कहिल्यै थिएनौँ । यो विषयमा हाम्रो टीमभित्र छलफल हुन्छ कि हुँदैन थाहा छैन । यो निर्णय अरूले गर्नेछन्, मैले होइन ।’

कसरी साँघुरो जित निकाल्ने भनेर पनि हेजलउडले व्याख्या गर्न भ्याए ।

‘सुरुमा आक्रामक खेलेर जित निश्चित गर्ने, त्यसपछि बिस्तारै खेलेर सानो अन्तरको जित निकाल्ने उपायमा जान सकिन्छ,’ उनले भने, ‘अरू पनि उपाय छन् । तर राम्ररी जितेरै जाँदा टीमको मनोबल उच्च हुन सक्छ भन्ने लाग्छ । उनीहरू (ईंग्ल्यान्ड) ले पनि आफ्नो पाटोबाट धेरै गर्नुपर्ने छ ।’

हेजलउड टिमका कप्तान नभएर एक खेलाडी मात्र हुन् । तर, प्रेसमिटमा अष्ट्रेलिया टिमकै तर्फबाट बोल्न उपस्थित थिए उनी । उनको अभिव्यक्तिले अष्ट्रेलियाले कतै ईंग्ल्यान्डलाई घर पठाउने चक्करमा खेल भावना विपरीतको रणनीति बनाएको त होइन भन्ने आशंका उब्जेको छ ।

यदि साँच्चै नै अष्ट्रेलियाले स्कटल्यान्डसँग हारेमा वा साँघुरो जित निकालेमा गम्भीर प्रश्न खडा हुन सक्छ । म्याच अफिसियलहरुले कारबाहीका लागि सिफारिस गर्न सक्नेछन् । त्यसो भयो भने अष्ट्रेलियाका कप्तान मिचेल मार्समाथि दुई खेलको प्रतिबन्ध लाग्न सक्ने क्रिकइन्फोले जनाएको छ । उनले सुपर ८ का ३ मध्ये दुई खेल गुमाउने खतरा हुन्छ ।

आईसीसी आचारसंहिताको आर्टिकल २.११ अनुसार मार्स कारबाहीका भागीदार बन्नेछन् । उक्त धारामा एउटा टीमले आईसीसीको कुनै पनि प्रतियोगितामा एउटा टीमले समूहको अर्को टीमलाई फाइदा पुर्‍याउने उद्देश्यले जानाजान म्याच हारेको खण्डमा अथवा नेट रनरेट म्यानुपुलेट गरेको खण्डमा कारबाहीको भागिदार हुनुपर्ने उल्लेख छ । यस्तो अवस्थामा कप्तान जिम्मेवार हुनेछन् ।

उनलाई लेभल २ अफेन्स अन्तरगत ४ डिमेरिट प्वाइन्टसहित ५० प्रतिशत म्याच फि जरिवाना र २ सस्पेन्सन प्वाइन्ट सजाय गरिनेछ । त्यो भनेको मार्सले सुपर ८का दुई खेल खेल्न पाउने छैनन् ।

तर, खेलमा साँच्चै मिलेमतो भएको हो कि होइन भनेर निर्णय लिनु अम्पायरहरूको लागि अप्ठेरो काम हो । राम्ररी खेल्दाखेल्दै पनि हार्न सकिने वा कठिन जित निकाल्ने सम्भावना हुन्छ नै ।

नियतवश नै त्यसो गरेको हो भनेर ठहर्‍याउने काम चुनौतीपूर्ण हुन्छ । त्यसमाथि अष्ट्रेलियाले आफू सुपर ८ मा पुगिसकेको हुँदा अन्तिम खेलमा केही प्रमुख खेलाडीलाई रेस्ट दिने सम्भावना पनि छ ।