माओवादी केन्द्रीय पदाधिकारी बैठक चलिरहेको बेला पेरिसडाँडामा विद्यार्थी नेता कार्यकर्ताको खबरदारी

काठमाडौं । नेकपा (माओवादी केन्द्र) निकट अखिल (क्रान्तिकारी)को पदाधिकारी बैठक माओवादी पार्टीको मुख्यालय पेरिसडाडामा सुरु भइरहँदा बाहिर भने विद्यार्थीले प्रर्दशन गरेका छन् ।

लामो समयदेखि संगठनको सम्मेलन हुन नसकेको भन्दै सम्मेलनको सुनिश्चिता गर्न र विद्यार्थी संगठनमा ३२ वर्षे उमेरहद कायम गर्न भन्दै संगठनको पदाधिकारी बैठक चलिरहँदा बाहिर सोहि संगठनका विद्यार्थीले प्रर्दशन गरेका हुन् ।

लामो समयदेखि नियमित आवधिक सम्मेलन नभइरहेको अवस्थामा अहिले पनि विभिन्न बहानामा सम्मेलन टार्न खोजिएको र २३ औँ राष्ट्रिय सम्मेलनको सुनिश्चित हुनुपर्ने मागसहित आफुहरुले प्रदर्शन गरेको नेपाल ल क्याम्पसका स्ववियु सभापति विष्णु ढुंगेलले नेपाल प्रेससँग बताए ।

उनका अनुसार आफूहरुका मुख्यगरी चार वटा माग रहेको र त्यसमा पनि असोज अघि नै विद्यार्थी संगठनको २३ औँ राष्ट्रिय सम्मेलनको मिति शुक्रबार बस्ने केन्द्रीय समितिले तय गर्नुपर्ने र सम्मेलनमा प्रत्यक्ष निर्वाचन प्रणालीबाट नेतृत्व चयन गर्नुपर्ने रहेको छ ।

साथै लामो समयदेखि गैर विद्यार्थीले विद्यार्थी संगठनको नेतृत्व गरिरहेकाले ३२ वर्षे उमेर हदबन्दी लगाएर विद्यार्थी संगठनको नेतृत्व विद्यार्थीले नै गर्नुपर्ने सुनिश्चिता गर्नका लागि शुक्रबारको बैठकमा एजेण्डा हुनुपर्ने सभापति ढुंगेलले बताए ।

प्रदर्शनका क्रममा ढुंगेलले भने, ‘यो विद्यार्थीको संगठन हो । विद्यार्थीलाई बुझाउने हो र विद्यार्थीलाई काम गर्न दिने हो । विद्यार्थीको संगठनमा गैर विद्यार्थीको कुरा सुनेर धारण बनाउने हैन । फेरि पनि भन्दै छौं, अखिल (क्रान्तिकारी) कसैको राजनीतिक सेटलमेन्टको थलो हैन । कसैले मैले यति गरे उति गरे मेरो भाग खै भन्ने हो भने पार्टी तिर लड्न जानुस् । वाईसीएलको जस्तो संरचनाको परिकल्पना विद्यार्थी संगठनमा गरेर हुँदैन । प्रष्ट कुरा दायाँ बायाँ छैन ३२ वर्षे उमेर हदसहित प्रत्यक्ष चुनावको विधिद्वारा असोजसम्म राष्ट्रिय सम्मेलन गरौ र संगठनलाई निकास दिउँ । केन्द्रीय पदाधिकारीलाई अन्तिम अपील, तपाईहरुले यो संगठनमा फेरि यो त्यो बहानामा महिनौ सम्मेलन लम्ब्याउने र संगठनको गतिरोध अन्त्य नगर्ने हो भने तपाई पनि यो गल्तीको जिम्मेवारी लिन तयार हुनुहोला । भोलिका दिन वास्तविक विद्यार्थीले यो कुराको हिसाबकिताब राख्ने छन् ।’

संगठनको पदाधिकारी बैठक बसिरहेको पार्टी कार्यालय अगाडि प्ले कार्डसहित विद्यार्थीले प्रदर्शन गरेपछि पार्टीको तर्फबाट जनवर्गीय संगठन हेर्ने जिम्मेवारी पाएका पार्टीका उपाध्यक्ष पम्फा भुसाल र फ्याक्सन इन्चार्ज हिमाल शर्माले उनीहरुका माग अनुसारका एजेण्डा शुक्रबारबारको बैठकमा पेश गर्ने प्रतिवद्धता जनाएपछि प्रदर्शन रोकेर विद्यार्थी फर्किएका थिए ।

प्रर्दशनमा नेपाल ल क्याम्पसका स्ववियू सभापति ढुंगेल, अस्कल क्याम्पसका स्ववियू सभापति प्रेम जैशी र सानोठिमी क्याम्पसका स्ववियू सभापति रेशमलाल श्रेष्ठसँगै ति क्याम्पसका स्ववियु पदाधिकारी तथा सदस्य र काठमाडौं उपत्यकाका सबै क्याम्पसमा संगठनको नेतृत्व गरिरहेका अध्यक्ष, पदाधिकारी एवम सदस्य सहभागि भएका थिए ।