विश्वकपमा ब्याट्सम्यानको ‘सातो’ लिइरहेका अफगान फजालहक

काठमाडौं। फजालहक फारुकीको शानदार बलिङसँगै अफगानिस्तान जारी आईसीसी टी–२० विश्वकपमा एक खेल खेल्न बाँकी रहँदै सुपर ८ पुगेको छ।

शुक्रबार भएको खेलमा पपुआ न्युगिनीलाई ७ विकेटले हराएको अफगानिस्तानले वेस्ट इन्डिजसँगको खेल बाँकी रहँदै पहिलो चरण पार गर्ने पक्का गरेको हो। पीएनजीविरुद्ध ओपनिङ बलर फजालहकले ४ ओभरमा १६ रन दिएर ३ विकेट लिए।

जारी विश्वकपमा अफगानिस्तानको बलिङ प्रभावशाली देखिएको छ। उसले कुनैपनि टोलीलाई एक सय रन कटाउन दिएको छैन। पहिलो खेलमा युगान्डालाई ५८ रनमा अलआउट गरेको अफगानिस्तानले न्युजिल्यान्डलाई पनि ७५ रनमा सिमित गरेको थियो।

विपक्षीलाई यसरी धरासायी बनाउने बलर हुन् फजालहक। उनी पावरप्लेमै भरपर्दा ब्याट्सम्यानको विकेट लिएर विपक्षीलाई दबाबमा राख्छन् र अन्य बलरलाई सजिलो बनाई दिन्छन्। उनी कम रन दिएर धेरै विकेट लिन सफल छन् जुन टी-२० क्रिकेटमा दुर्लभ मानिन्छ।

फजालहकले जारी विश्वकपका ३ खेलमा १२ विकेट लिएका छन्। उनी सर्वाधिक विकेट लिने बलर हुन्। दोस्रो स्थानमा रहेका दक्षिण अफ्रिकाका एनरिच नोर्त्याले ८ विकेट लिएका छन्। फजालहकलाई उनले लिएका विकेट संख्यामा मात्र चर्चा गर्नु उनीमाथि अन्याय हुन्छ। उनले ३.७ को बलिङ इकोनोमीमा बलिङ गरेका छन्। हरेक औसत ५।६६ बलमा विकेट लिइरहेका छन्। एकै इनिङमा ९ रन खर्चिएर ५ विकेटसम्म लिएका छन्।

फजालहकले जारी विश्वकपमा लिएका विकेटमध्ये ७ वटा पावर प्ले अर्थात इनिङका सुरुका ६ ओभर भित्र उनलाई प्राप्त भएका हुन्। उनी विश्वकप इतिहासमा एकै विश्वकपमा पावर प्लेमा सर्वाधिक विकेट लिने बलरको सूचीमा तेस्रो स्थानमा उक्लिसकेका छन्। सन् २०१० मा अस्ट्रेलियाका डिर्क नेन्सले १० र सन् २०२२ मा जिम्बावेका ब्लेसिङ मुजराबानीले ८ विकेट लिएका थिए।

फजालहकले प्राप्त गरिरहेको सफलता यत्तिमै सिमित छैन। उनी कुनै एक विश्वकपको पावर प्लेमा कम्तिमा ५ विकेट लिएका बलरमध्ये ‘बेस्ट बलिङ एभरेज’ भएका बलर बनेका छन्। उनको बेस्ट बलिङ एभरेज ४.९ रहेको छ। यस्तै पावर प्लेमा उनी हरेक ६.९ बलमा विकेट लिइरहेका छन् भने बलिङ इकोनोमी ४।३ रहेको छ।

फजालहक अगाडि रसिद खानजस्ता बलर ओझेलमा परेका छन्। रसिदले ३ खेलमा ६ विकेट लिएका छन् भने बलिङ इकोनोमी ४।५ रहेको छ। २४ वर्षीय फजालहक बायाँ हाते फास्ट बलर हुन्। टी-२० अन्तर्राष्ट्रिय क्रिकेटमा सन् २०२१ को मार्चमा डेब्यु गरेका फजालहकसँग आईपिएल र बिग बासजस्ता ठुला व्यावशायीक प्रतियोगिता खेलेको अनुभव छ। उनले टी-२० अन्तर्राष्ट्रियमा ३७ खेल खेल्दै ४९ विकेट लिएका छन् भने बलिङ इकोनोमी ६.४९ रहेको छ।