दक्षिण अफ्रिकी बलर रवाडा भन्छन्- सन्दीप ‘मिस्ट्री स्पिनर हुन्, तर हाम्रो टीम उनको लागि तयार छ

काठमाडौं । नेपालसँगको खेलअघि दक्षिण अफ्रिकाका प्रमुख बलर कंगिसो रवाडा आत्मविश्वासी देखिएका छन् । यद्यपि, नेपाललाई हल्का रुपमा नलिने उनले बताए ।

रवाडाले अघिल्ला प्रतियोगिताहरुको तुलनामा नेपालविरुद्ध अझै राम्रो खेल्न चाहेको उल्लेख गरे । समूह चरणको अन्तिम खेलमा अर्को जितका लागि आफूहरु कटिवद्ध र भोको रहेको उनको भनाइ छ ।

‘यो अर्को एउटा अन्तर्राष्ट्रिय म्याच हो र हामी यसलाई हलुकारुपमा लिँदैनौं । हामी प्रतियोगितामा जसरी खेलिरहेका छौं, त्यही वा त्योभन्दा राम्रो क्रिकेट खेल्न प्रयास गर्नेछौं ।’

रवाडाले नेपाली टीमले कस्तो क्रिकेट खेल्छ भन्ने बारेमा धेरै थाहा नभएको स्वीकारोक्ति गरे ।

उनले भने, ‘इमान्दारीपूर्वक भन्नुपर्दा मलाई त्यति धेरै थाहा छैन, तर हाम्रो एनालिस्टहरु छन् । र, हामी ले आफ्नो गृहकार्य गर्नेछौं । हामी पटक्कै हल्कारुपमा लिने छैनौं ।’

रवाडाले नेपालका स्पिनर सन्दीप लामिछानेको चर्चा गरे । सन्दीप विरुद्ध खेल्न सहज नहुने उनको आँकलन छ ।

उनले भने, ‘सन्दीप मिस्ट्री स्पीनर हुन् । यस्तो मिस्ट्री स्पिनरलाई खेल्न गाह्रो हुन्छ । तर, हाम्रो टीम उनको बलिङ सामना गर्न तयार छ ।’

रवाडा थप्छन्, ‘यो प्रतियोगितामा धेरै रन बनिरहेको छैन, त्यसमा एउटा बलरको रुपमा म निकै रमाइरहेको छु ।’

उनले वेस्ट इन्डिजको पिचमा बलर र ब्याटर दुवैलाई मौका रहेको पनि उल्लेख गरे ।