सन्दीप १०० विकेट नजिक, दक्षिण अफ्रिकाविरुद्ध दुई विकेट लिए बन्नेछ कीर्तिमान

काठमाडौं । नेपाली टीमका लेग स्पिनर सन्दीप लामिछाने करिब ६ महिनापछि क्रिकेट खेल्न मैदान उत्रिँदै छन् । गत पुस १३ गते जिल्ला अदालत काठमाडौंबाट बलात्कार मुद्दामा दोषी ठहर भएसँगै सन्दीप क्रिकेटबाट टाढिएका थिए ।

त्यसपछि उच्च अदालत पाटनले जेठ २ गते सन्दीपलाई बलत्कार मुद्दामा सफाई दिएको थियो । सफाईसँगै सन्दीपको क्रिकेट खेल्ने बाटो खुलेको थियो । तर, अमेरिकाले भिषा नदिँदा अमेरिका र वेष्ट इन्जिडमा जारी आईसीसी टी–२० विश्वकपका पहिला दुई खेल सन्दीपले गुमाएका थिए ।

वेष्ट इन्डिजमा हुने दुई खेलमा सहभागी हुन सन्दीप टीममा सहभागी भइसकेका छन् । सन्दीपले पुस १३ पछि पहिलोपटक औपचारिक खेल खेल्दै छन् । उनी शनिबार बिहान हुने दक्षिण अफ्रिकाविरुद्ध खेलमा मैदान उत्रिनेछन् । ६ महिनापछि मैदान उत्रिन लागेका सन्दीप किर्तिमान नजिक छन् । उनले ५२ टी–२० आई खेलमा ९८ विकेट लिएका छन् ।

दक्षिण अफ्रिकासँग २ विकेट लिएमा उनी टी–२० आई क्रिकेटमा एक सय विकेट पूरा गर्ने पहिलो नेपाली खेलाडी बन्नेछन् । हालसम्म कुनै खेलाडी खेलाडीले टी–२०आई क्रिकेटमा एक सय विकेट पूरा गरेका छैनन् । सन्दीपपछि नेपालका करण केसीले ६९ खेलमा ९० र अभिनास बोहराले ६० खेलमा ७५ विकेट लिएका छन् ।

यस्तै टी–२० आई क्रिकेटमा छिटो एक सय विकेट पूरा गर्ने अफगानिस्तानका रसिद खानको किर्तिमानसँग बराबरी गर्नेछन् । सन् २०२१ मा रसिदले ५३ खेलमा एक सय रन पूरा गर्दै टी–२० आई क्रिकेटमा सर्वाधिक छिटो एक सय विकेट पूरा गर्ने किर्तिमान आफ्नो नाममा बनाएका थिए ।