गौरवपूर्ण प्रदर्शन, नमिठो पराजय

काठमाडौं । खेलमा हारजित स्वभाविक हो, तर कुनै कुनै हार पचाउन असाध्यै कठिन हुन्छ र त्यसले लामो समय पिडा दिइरहन्छ । आज नेपालले साउथ अफ्रिकाविरुद्ध व्यहोरेको १ रनको पराजय पनि सम्भवतः त्यही कोटीमा पर्छ ।

एउटा बलियो टेस्ट राष्ट्रलाई नेपालले बलियो टक्कर दियो । टक्कर मात्र दिएको होइन, नेपाल सहज जितको बाटोमा उन्मुख थियो । १७ ओभरको खेल समाप्त हुँदा नेपाललाई चाहिएको थियो केवल १८ रन र हातमा थिए ७ विकेट । टी- २० क्रिकेटमा यो भनेको जितको औपचारिकता मात्रै बाँकी रहेको अवस्था हो ।

ओपनर आसिफ शेख सुरुदेखि क्रिजमा डटिरहेका थिए । अर्को इन्डमा थिए, नेपालका फिनिसर दिपेन्द्र सिंह ऐरी । कुशल मल्ल, गुल्शन झा, सोमपाल कामी, करण केसी, सन्दीप लामिछानेसहितको लामो ब्याटिङ पंति नेपालसँग सुरक्षित नै थियो । एक ओभर अगाडि नै जित हासिल गर्न सक्ने स्थितिमा थियो नेपाल । समर्थकहरु उत्साव मनाउन ठीक्क परिसकेका थिए । तर, १८ औं ओभरमा नसोचेको ट्विस्ट आइदियो ।

दक्षिण अफ्रिकाका कप्तानले नेपाललाई रोक्ने अन्तिम प्रयासस्वरुप ताब्राइज साम्सीलाई बल थमाए । स्पिनलाई सहयोग गरिरहेको पीचमा साम्सीले यसअघि दुई विकेट लिइसकेका थिए । उनलाई झेल्न नेपाली ब्याट्सम्यानलाई कठिन भइरहेको थियो । अन्ततः उनले नै खेल दक्षिण अफ्रिको पक्षमा मोडे ।

१८ औं ओभरको तेस्रो बलमा दिपेन्द्रले विकेट गुमाए । साम्सीले लेग तिर फ्याकेको बललाई स्वीप गर्न खोज्दा दिपेन्द्र बिट भए र बल विकेट किपर क्वीनटन डिकको हातमा पुग्यो । उनले कट बिहाइन्डको अपिल गरे र अम्पायरले औंला उठाए । दीपेन्द्रले भाग्य परिक्षणका लागि रिभ्यू लिए । तर, उनी जोगिन सकेनन् ।

नेपाललाई सबैभन्दा ठूलो झट्का लाग्यो सोही ओभरको अन्तिम बलमा । नेपालका लागि एंकर रोल खेलिरहेका ओपनर आसिफ शेखलाई साम्सीले शिकार बनाए । उनले अफ साइडमा फ्याकेको बल सार्प स्पिन भयो र आसिफको ब्याटलाई बिट गर्दै स्टम्पलाई चुम्न पुग्यो । नेपाली डगआउट स्तब्ध बन्यो ।

साम्सीको यो ओभरले खेल रोमाञ्चक मोडमा पुग्यो । नेपाललाई जितका लागि १२ बलमा १६ रन चाहियो । नेपालको ब्याटिङ लामो भएकाले आशा अझै मजबुत नै थियो । गुलशन झा क्रिजमा आए । कुशल मल्ल र गुल्शन झाको विष्फोटक जोडी एक–दुई छक्का चौका निकाल्नु बडी बात थिएन । तर एनरिच नार्ट्जेले दोस्रो बलमै कुशललाई बोल्ड गरे । आजको खेलमा फास्ट बलरले लिएको पहिलो विकेट यही नै थियो । यो विकेटले खेलमा नेपालको पकड फुत्किएको महसुस गरायो । यद्यपि, झै पनि सोमपाल कामी, करण केसी र सन्दीप लामिछाने बाँकी थिए ।

आठांै नम्बरमा सोमपाल आए । उनले दुई बल डट खेले । ओभरको चार बलसम्म कुनै पनि रन बन्न नसक्दा नेपाल चरम दवावमा पर्यो । ८ रनमा नेपाललाई जितका लागि १६ रन ल्याउनुपर्ने भयो । यो चुनौतिपूर्ण स्थिति हो । तर, पाचौं बलमा सोमपालले साहसिक छक्का प्रहार गरे । छैटौं बलमा २ रन दौडिए । अब अन्तिम ओभरमा ८ रन चाहिने सहज समिकरणमा फर्कियो नेपाल ।

दक्षिण अफ्रिकी कप्तानले ओर्टनिल बार्टम्यानलाई बल थमाए । क्रिजमा गुल्शन थिए । नेपाललाई थुप्रै खेलमा अप्ठेरो स्थितिबाट बचाएका गुल्शनलाई आज हिरो बन्ने अवसर थियो । तर, उनी चुके ।

सुरुका दुई बललाई उनले ब्याटसँग सम्पर्क गराउन सकेनन् । तर तेस्रो बलमा उनले शानदार सट हान्दै चौका निकाल्न सफल भए । बार्टम्यानले फ्याकेको वाइड योर्करलाई उनले आत्मविश्वासपूर्वक कभरको दिशामा प्रहार गरेपछि नेपाली समर्थकमा खुशीयाली छायो । चौंथो बलमा पनि उनले दुई रन जोड्न सफल भए । खेल नेपालको पक्षमा मोडियो ।

नेपाललाई अन्तिम दुई बलमा दुई रन चाहिएको थियो । गुल्शनले कम्तिमा एउटा राम्रो सट हानेको भए नेपाल विजयउत्सव मनाउन पाउने थियो । तर, दुवै बलमा उनी बिट भए । अन्तिम बलमा उनीसँग एक रन पूरा गरेर खेललाई सुपरओभरमा धकेल्ने अवसर थियो । तर, उनको रनिङ विटविन दि विकेट कमजोर रह्यो । डाइभ नहान्दा उनले रन पूरा गर्न सकेनन् ।

आजको म्याच यदि जितेको भए त्यो नेपालका लागि अभूतपुर्व सफलता हुने थियो । यो विश्वकप मात्र नभएर टी २० विश्वकपको इतिहासमै यसलाई एउटा ठूलो उलटफेर मानिने थियो । नेपालले सुपर ८ मा पुग्ने सम्भावना जिवित राख्न सक्थ्यो । तर, केवल एक रनले नेपाल चुक्यो ।

यद्यपि, यो पराजयले नेपालको शानदार प्रदर्शनलाई पक्कै बिर्साउन सक्ने छैन । खासगरि नेपालको बलिङ अविस्मरणीय रह्यो । दक्षिण अफ्रिकाजस्तो टोलीलाई ११५ रनमा अलआउट गर्नु चानचुने कुरा होइन ।

नेपालले आज अत्यन्त बुद्धिमत्तापुर्वक साउथ अफ्रिविरुद्ध स्पिन केन्द्रित आक्रमण गरेको थियो । विकेटको अवस्था हेरेर कप्तान रोहित पौडेलले १४ ओभर स्पिनरलाई र ६ ओभर मात्र फास्ट बलरलाई दिएका थिए । सबै स्पिनरले डेलिभरि दिए ।

पार्ट टाइम स्पिनर कुशल भुर्तेल र अलराउन्डर दिपेन्द्रसिंह ऐरीले उत्कृष्ट बलिङ गरे । खेलमा उनीहरुले सात विकेट आपसमा बाँडेर लिएका थिए । नेपालका ओपनिङ ब्याट्सम्यान भुर्तलले पछिल्लो आफूलाई एउटा विकेट टेकिङ बलरको रुपमा विकास गरिरहेका छन् । आजको म्याचमा उनले पुन आफूलाई प्रमाणित गरे । उनले एक्लै चार विकेट लिएपछि साउथ अफ्रिका सामान्य स्कोरमा खुम्चिएको थियो । भुर्तेलले कप्तान एडियन म्याक्रमसँगै साउथ अफ्रिकाका सर्वोत्कृष्ट टी २० ब्याट्म्यान हेनरिच क्लासेनलाई सस्तैमा पेभिलयन फर्काउन सफल भए ।

दिपेन्द्रले उत्तिकै सुन्दर बलिङ गरे । पावरप्लेमै बलिङ गर्न आएका दिपेन्द्रले आफ्नो दोस्रो ओभरमा नेपाललाई पहिलो सफलता दिलाएका थिए । दक्षिण अफ्रिकाका ओपनरद्वय क्वीन्टन डिकक र रिजा हेन्ड्रिक्स तथा मध्यक्रमका विष्फोटक ब्याट्सम्यान डेभिड मिलरलाई उनले आफ्नो शिकार बनाए ।

लामो समयपछिको कमब्याक खेलमा सन्दीप लामिछानेले उत्कृष्ट प्रदर्शन गरे । उनको बलिङ झेल्न साउथ अफ्रिकाका ब्याट्सम्यानलाई गाह्रो परेको थियो । उने विकेटबाट निकै स्पिन प्राप्त गरे । सन्दीपले विकेट लिन सकेनन् तर, खेलमा ठूलो प्रभाव पारे । उनले रनगतिमा अंकुश लगाइदिएपछि साउथ अफ्रिकाका ब्याट्सम्यानहरु दवावमा परेका थिए र अन्य बलरहरुमाथि रिस्क लिन वाध्य भएका थिए ।

समग्रमा नेपालले आज गौरवपूर्ण प्रदर्शन गर्यो । हारका बाबजुत नेपालको क्षमता विश्व क्रिकेटसामू उजागर भएको छ । नेपाल विश्वकप खेल्न लायक राष्ट्र हो भन्ने खेलाडीहरुले प्रमाणित गरेका छन् । अब कुनै पनि राष्ट्रले नेपाललाई कमजोर आँक्न सक्ने छैनन् ।

साउथ अफ्रिकाविरुद्ध नेपालको हारको सबैभन्दा ठूलो कारण अनुभवको कमि नै हो । जब कमजोर टिम बलिया टिमविरुद्ध जित नजिक पुगेको महसुस गर्छन्, त्यसले एकप्रकारको आतेश र बेचैनी पैदा गर्छ । हड्बडिएर ब्याट्सम्यानहरुले गलत सट हान्न पुग्छन् । अनुभवी टीमहरु यस्तो सिचुयसनका निम्ति अभ्यस्त हुन्छन् । त्यसमाथि सुपर ८मा पुगिसकेको दक्षिण अफ्रिकालाई आज कुनै दवाव थिएन । नेपालविरुद्धको म्याच उनीहरुका लागि प्रतिष्ठाको विषय मात्र थियो । त्यसैले हारको सम्मुख पुग्दा पनि उनीहरु हड्बडाएनन् ।

नेपालले विश्वकपका चार खेलमध्ये एउटा खेल वर्षाका कारण गुमाएको थियो । श्रीलंकासँग खेल्न नपाउँदा नेपाल एउटा टेस्ट राष्ट्रसँगको प्रतिस्पर्धाबाट वञ्चित भएको छ । त्यो खेल रद्द हुँदा श्रीलंकाले आपूmलाई घाटा परेको महसुस गरेको थियो । तर, आज नेपालको प्रदर्शन हेर्दा श्रीलंकालाई पक्कै सहज हुने थिएन नेपालसँग खेलर दुई अंक बटुल्न ।

अब अन्तिम खेल नेपालले बंगलादेशसँग खेल्दैछ । सुपर ८को प्रतिस्पर्धाबाट नेपाल बाहिरिइसकेको छ । तर, फेरि एकपटक एउटा टेस्ट राष्ट्रलाई अपसेट गर्ने मौका नेपालसँग छ । यदि बंगलादेशविरुद्ध जित निकाल्न सके आलो घाउमा अलिकति मल्हमपट्टी लाग्न सक्छ । तर, दक्षिण अफ्रिकाविरुद्ध हारको घाउ विसेक हुन लामो समय लाग्नेछ ।