डेल स्टेनको विश्लेषण- नेपाल-दक्षिण अफ्रिकाको खेल ‘म्याच अफ दि टुर्नामेन्ट’, नेपाल जीतको हकदार थियो

काठमाडौं । टी-२० विश्वकप क्रिकेटमा आज नेपालले दक्षिण अफ्रिकाविरुद्ध गरेको प्रदर्शनको विश्वभर सराहना भएको छ । नेपालले खेल जित्न नसके पनि मन जितेको टिप्पणी क्रिकेटका हस्तीहरुले गरिरहेका छन् ।

विश्वकपमा कमेन्टेटरको भूमिकामा रहेका दक्षिण अफ्रिका पूर्वफास्ट बलर डेल स्टेनले खेलपछि नेपालको खुलेर तारिफ गरे । उनको भनाइमा नेपाल जीतको हकदार थियो, तर दक्षिण अफ्रिका भाग्यशाली ठहरियो ।

नेपालको प्रदर्शनका विषयमा उनले भने, ‘बेजोड खेल भयो । म अन्डरडगको ठूलो फ्यान हुँ । दक्षिण अफ्रिकाको खेल भए पनि मेरो नेपालप्रति सहानुभूति थियो । उनीहरु जीतका हकदार पनि थिए, तर फिनिसिङ लाइनसम्म पुग्न सकेनन् । यदि नेपालले जितेको भए उनीहरु टक अफ दि टाउन हुने थियो । नेपाल टक अफ दि टुर्नामेन्ट हुन्थ्यो । त्यसपछि बंगलादेशविरुद्ध नेपालको म्याच विस्फोटक हुन सक्थ्यो । मैले मनमनै त्यही चाहेको थिएँ ।’

उनले आजको खेललाई ‘म्याच अफ द टुर्नामेन्ट’को संज्ञासमेत दिए ।

स्टेनले थपे, ‘हामीले यहाँ १६० देखि १८० रनसम्मको अपेक्षा गरेका थियौं, तर लो स्कोरिङ खेल भयो । नेपालले उत्कृष्ट बलिङ गर्‍यो ।

ब्याट्सम्यानहरुलाई गुगलीले अप्ठेरोमा पारिरहेको थियो । खेलको अन्तिम बलमा एक रन लिन सकेको भए खेल सुपर ओभरमा जान सक्थ्यो । जे भए पनि मेरो लागि यो म्यान अफ दि टुर्नामेन्ट हो ।’

उनले आजको पीचमा दक्षिण अफ्रिकाको रणनीति गलत भएको पनि टिप्पणी गरे । पीचअनुसार आज दक्षिण अफ्रिकाले दुई जना स्पिनर खेलाउनुपर्ने उनको राय छ ।

‘उनीहरुले नेपाललाई गतिले नै हराउन सकिन्छ भन्ठानेर न्यूयोर्कमा जस्तै चार जना पेसरलाई निरन्तरता दिए, तर विकेटमा स्पिन थियो । साउथ अफ्रिकाले गलत रणनीति बनायो, तर पनि भाग्यवस उनीहरुले जिते’, स्टेनले भने ।