यी पाँच बंगलादेशी खेलाडी, जो नेपाललाई पर्न सक्छन् भारी

काठमाडौं । अमेरिका र वेष्ट इन्डिजमा जारी आईसीसी टी-२० विश्वकपमा नेपालले सोमबार बंगलादेशसँग खेल्दैछ । उक्त खेल वेष्ट इन्डिजको किङ्सटाउनस्थित आर्नोस भेल स्टेडियममा सोमबार बिहान सवा ५ बजे सुरु हुनेछ ।

सुपर-८ को दौडबाट बाहिरिएको नेपालका लागि अर्को चरणमा पुग्ने सम्भावना बलियो रहेको बंगलादेशसँगको खेल प्रतिष्ठाका लागि मात्र हुनेछ । नेपाललाई पराजित गरेमा बंगलादेशले सुपर-८ को यात्रा तय गर्नेछ, तर बंगलादेश पराजित भएमा भने नेदरल्यान्ड्स र श्रीलंकाबीचको खेलको नतिजाले सुपर-८ मा जाने टोलीको टुंग्गो लाग्नेछ ।

यसअघि बंगलादेशमा सन् २०१४ मा आयोजना भएको टी-२० विश्वकपमा यी दुई टोली आमनेसामने भएका थिए । नेपाललाई दोस्रो चरणमा पुग्न त्यो समयमा बंगलादेश बाधक बनेको थियो । ३ खेल खेलेको नेपालले अफगानिस्तान र हङकङलाई पराजित गर्दा बंगलादेशसँग पराजित भएको थियो ।

बंगलादेशले पनि दुई खेलमा जीत र एक खेलमा हार व्यहोरेको थियो । समान अंक रहेका नेपाल र बंगलादेश रनरेटका आधारमा बंगलादेश दोस्रो चरणमा प्रवेश गरेको थियो । समूह चरणमा बंगलादेशले नेपाललाई ८ विकेटले पराजित गरेको थियो । नेपालले दिएको १२६ रनको लक्ष्य पछ्याएको बंगलादेशले २ विकेट गुमाएर पूरा गरेको थियो ।

नेपाललाई पराजित गर्दा १८ बलमा अविजित ३७ रन जोडेका सकिब अल हसन जारी विश्वकपमा पनि बंगलादेशबाट खेलिरहेका छन् । यस्तै २०१४ मा नेपालसँग खेलेका महमुदुल्लाह पनि अहिले बंगलादेशको टोलीमा छन् ।

यी हुन् नेपाललाई खतरा हुनसक्ने बंगलादेशका ५ खेलाडी

सकिब अल हसन

सन् २०१४ मा नेपालविरुद्ध खतरनाक बनेका बंगलादेशका खेलाडी सकिब अल हसन यस पटक पनि नेपालविरुद्ध उत्रिँदैछन् । १० वर्षपछि नेपालसँग खेल्न लागेका हसन यस पटक पनि नेपालको टाउको दुखाइ बन्ने सम्भावना देखिन्छ । उनले सन् २०१४ मा नेपालविरुद्ध १८ बलमा अविजित ३७ रन जोडेका थिए ।

सन् २००६ मा बंगलादेशबाट खेल्न सुरु गरेका अनुभवी खेलाडी हसनले हालसम्म पनि उत्कृष्ट प्रदर्शन गर्दै आएका छन् । उनी जारी विश्वकपमा नेदरल्यान्ड्सविरुद्ध उत्कृष्ट प्रदर्शन गर्दै प्लेयर अफ द म्याच चुनिएका थिए । उनले १२५ टी-२० आई खेलमा २ हजार ५१५ रन र १४६ विकेट लिएका छन् ।

तौहिद हृदोय

टप अर्डर ब्याटर तौहिद हृदोय बंगलादेशका उदयीमान खेलाडी हुन् । २३ वर्षीय तौहिदले अघिल्लो वर्षमात्रै बंगलादेशको राष्ट्रिय टोलीबाट डेब्यु गरेका थिए ।

उनले डेब्यु ओडीआई खेलमै शतक नजिक पुगेका उनले टी-२० आईमा पनि उत्तिकै राम्रो प्रदर्शन गर्दै आएका छन् । उनले जारी विश्वकपमा श्रीलंकाविरुद्ध ४०, दक्षिण अफ्रिकाविरुद्ध ३७ र नेदरल्यान्ड्सविरुद्ध ७ रन जोडेका थिए ।

महमुदुल्लाह

बंगलादेशको सर्वाधिक अनुभवी अलराउन्डर खेलाडी महमुदुल्लाहले सन् २०१४ मा पनि नेपालविरुद्ध खेलेका थिए । सन् २००९ बाट राष्ट्रिय टोलीबाट खेल्न थालेका उनी हालसम्म पनि बंगलादेशको प्रतिनिधित्व गरिरहेका छन् ।

उनी विकेट गइरहेको खण्डमा टिकेर खेल्न खप्पिस मानिन्छन् । उनले १ सय ३४ टी-२० आई खेलमा २ हजार ३६० रनसहित ४० विकेट लिएका छन् ।

मुश्ताफिजुर रहमान

बंगलादेशका तीब्र गतिका बल मुश्ताफिजुर रहमान पनि नेपालका लागि घातक हुनसक्ने खेलाडीमध्ये पर्छन् । सन् २०१५ देखि बंगलादेशको राष्ट्रिय टोलीबाट खेल्दै आएका रहमानले ९९ टी-२०आई खेलमा १२४ विकेट लिएका छन् ।

उनले जारी विश्वकपमा श्रीलंकाविरुद्ध ३ र नेदरल्यान्ड्सविरुद्ध एक विकेट लिएका थिए । रहमान भारतमा सञ्चालन हुने इन्डियन प्रिमियर लिगमा ५ टीमबाट खेलिसकेका छन् । यस्तै उनीसँग विश्वका धेरै फेन्चाइच लिग खेलेको अनुभव छ ।

रिशाद हुसेन

२१ वर्षीय युवा स्पिनर रिशाद हुसेन नेपालका लागि घातक हुनसक्ने खेलाडी हुन् । जारी विश्वकपमा उत्कृष्ट प्रदर्शन गरिरहेका हुसेन नेपालविरुद्ध पनि खतरनाक हुनसक्ने सम्भावना देखिन्छ । उनले ३ खेलमा ७ विकेट लिइसकेका छन् । श्रीलंका र नेदरल्यान्ड्सविरुद्ध ३-३ र दक्षिण अफ्रिकाविरुद्ध एक विकेट लिएका हुन् ।

उनले गत वर्षको मार्चमा बंगलादेशको राष्ट्रिय टोलीबाट टी-२०आईमा डेब्यु गरेका थिए । उनले २० खेलमा २२ विकेटका साथै ८९ रन बनाएका छन् ।