कठिन पिच र स्तरीय बलिङसँग नेपालका ब्याट्सम्यानको संघर्ष, कसको प्रदर्शन कस्तो ?

काठमाडौं । वेस्ट इन्डिज र अमेरिकामा जारी आईसीसी टी-२० विश्वकपमा नेपालको यात्रा सकिएको छ । चारमध्ये तीनवटा खेलमात्र खेल्न पाएको नेपालले जित हासिल गर्न सकेन, तर थुप्रै सकारात्मक अनुभवहरू संगालेको छ ।

नेपालको श्रीलंकासँगको खेल वर्षाका कारण रद्द हुनु नेपालका निम्ति दुर्भाग्यपूर्ण थियो । एउटा टेस्ट राष्ट्रसँग भिड्ने अवसर नेपालले गुमायो । बाँकी खेलमा नेपालले तीन राष्ट्रलाई कडा टक्कर दियो, जसमध्ये दुईवटा टेस्ट कन्ट्री थिए । साउथ अफ्रिकालाई त नेपालले पराजयको संघारमै पुर्याएको थियो, तर अन्तिम क्षण चुक्यो । पछिल्ला तीन ओभरमा सम्हालिन नसक्दा नेपालले अत्यन्त सहज अवस्थाबाट नतिजा सुम्पिन बाध्य भयो ।

समग्रमा नेपालका बलरहरूले तीनवटै खेलमा उत्कृष्ट प्रदर्शन गरे, तर ब्याटिङ सन्तोषजनक भएन । हुन त अमेरिका र वेस्ट इन्डिजको कठिन पिचमा शक्तिशाली टीमहरू पनि लड्खडाइरहेका छन् । यो विश्वकपमा सयभन्दा माथिको स्कोरलाई सम्मानजनक मानिन्छ । त्यस हिसाबले नेपालको ब्याटिङ पनि औसत हो । यद्यपि, विश्वस्तरीय बलिङसँग जुझ्ने अनुभवको कमीले नेपाल चुक्यो । यदि ब्याटिङमा अलिकति परिपक्वता देखिएको भए नेपाल सुपर ८ मा पुग्न सक्थ्यो भन्ने महसुस गर्न सकिन्छ । तीव्र गति र उछाल भएको बलमा नेपालका ब्याट्सम्यानहरू डगमगाए ।

नेपालले खेलेका तीनवटै खेलहरू लो स्कोरिङ थिए । ३ वटै खेलमा नेपालले १ सय १५ रन कटाउन सकेन । नेपालका कुनै पनि ब्याट्सम्यानले अर्धशतक बनाउन सकेनन् । साउथ अफ्रिकाविरुद्ध आसिफ शेखले बनाएको ४२ रन प्रतियोगितामै नेपाली ब्याट्सम्यानको ठूलो स्कोरका रुपमा रह्यो । बलिया राष्ट्रविरुद्ध कसिलो बलिङ गरेको नेपालले कमजोर ब्याटिङका कारण तीनवटै खेलमा हार बेहोर्नुपर्‍यो ।

यहाँ नेपालका ब्याट्सम्यानहरूको व्यक्तिगत प्रदर्शन कस्तो रह्यो भन्ने चर्चा गरिएको छ :

१. कुशल भुर्तेल

नेपालका आक्रामक ओपनर कुशल भुर्तेल तीनवटै म्याचमा चल्न सकेनन् । विश्वकपअघि नै खराब फर्मबाट गुज्रिरहेका कुशलमा आत्मविश्वासको कमी थियो । उनले तीन खेलमा जोडेको स्कोर हो ७, १३ र ४ रन । कुल मिलाएर २४ रन बनाएका कुशलले जम्माजम्मी तीन चौका र एक छक्का प्रहार गरे । कुनै पनि खेलमा उनले १०० भन्दा माथिको रनरेट कायम गर्न सकेनन् । बरु उनले साथ अफ्रिकासँगको खेलमा शानदार बलिङ गर्दै चार विकेट लिएका थिए ।

२. आसिफ शेख

नेपालका विकेट किपर ब्याट्सम्यान आसिफ शेखको ब्याटिङ तुलनात्मकरुपमा सन्तोषजनक रह्यो । पहिलो म्याचमा चार रनमा आउट भएका उनले साउथ अफ्रिकाविरुद्धको म्याचमा ४२ रन बनाउँदै नेपाललाई जितको आशा जगाएका थिए । तर, गलत समयमा विकेट गुमाउन पुगे । बंगलादेशविरुद्ध उनी १७ रनमा आउट भए । दुईवटा म्याचमा उनले केही शानदार सटहरु हानेका थिए । कुल मिलाएर आसिफले नेपालका लागि ६३ रन जोडे, जसमा ९ चौका र एक छक्का समावेश छन् ।

३. अनिलकुमार साह

वैकल्पिक ओपनरका रुपमा टिममा समावेश गरिएका अनिलकुमार साहले तीनवटै खेलमा अवसर पाए । उनले पहिलो म्याचमा नेदरल्यान्ड्सविरुद्ध ११ रन बनाएर आउट भएका उनले साउथ अफ्रिकासँगको खेलमा राम्रो ब्याटिङ गर्दै २७ रन जोडे । अनिल र आसिफको साझेदारीले नेपाललाई जितको बाटोमा डोहोर्‍याएको थियो । उनीहरूको साझेदारी टुटेपछि नेपाल धराशयी भयो । बंगलादेशविरुद्ध भने अनिल शून्यमा आउट भए । तीन खेलमा उनले ३८ रन जोडका छन् ।

४. रोहितकुमार पौडेल

यो विश्वकपमा नेपालले कप्तान रोहितकुमार पौडेलबाट धेरै अपेक्षा गरेको थियो । उनी विश्वकपअगाडि उत्कृष्ट फर्ममा थिए । कठिन पिचमा रोहितले जिम्मेवारी लिएर खेल्नुपर्थ्यो, त्यसमा उनी चुके । पहिलो खेलमा उनले नेदरल्यान्ड्सविरुद्ध रोहितले ३५ रनको महत्वपूर्ण पारी खेलेका थिए । तर, साउथ अफ्रिका र बंगलादेशविरुद्ध उनको ब्याट चलेन । क्रमशः शून्य र १ रनमा आउट भए । साउथ अफ्रिकाविरुद्ध सुरूमै आक्रमण सट प्रहार गर्न खोज्दा उनले विकेट गुमाएका थिए । रोहितले ३ खेलमा ३६ रन जोड्दा ४ वटा चौका प्रहार गरे ।

५. कुशल मल्ल

नेपालका विष्फोटक ब्याट्सम्यान कुशल मल्लले आज बंगलादेशविरुद्धको खेलमा निकै सुझबुझपूर्ण ब्याटिङ गरे । परिस्थितिको मागअनुसार उनले सिंगल-डबलमा रन बटुलेका थिए । तर, जब उनले हात खोल्ने निर्णय गरे, छिट्टै विकेट पनि गुमाए । कुशल र दीपेन्द्रसिंह ऐरीको अर्धशतकीय साझेदारीले नेपाललाई खेलमा फर्काएका थियो । रन रेटको प्रेसरमा परेपछि कुशलले ठूलो सट खेल्ने चक्करमा विकेट गुमाउन पगे । अघिल्ला दुई खेलमा कुशल चलेका थिएनन् । उनी नेदरल्यान्ड्सविरुद्ध ९ रनमा र साउथ अफ्रिकाविरुद्ध १ रनमा आउट भएका थिए । तीन म्याचमा कुशलले ३७ रन जोडे ।

६. दीपेन्द्रसिंह ऐरी

नेपालका भरपर्दा अलराउन्डर दिपेन्द्रसिंह ऐरीले बलिङमा उत्कृष्ट प्रदर्शन गरे पनि ब्याटिङ औसत रह्यो । दुईवटा खेलमा डबल डिजिटमा रन बनाउन नसकेका उनले बंगलादेश विरुद्धको खेलमा भने संघर्षपूर्ण इनिङ गरेका थिए । २६ रनमै पाँच विकेट गुमाएपछि कुशल मल्लसित मिलेर उनले रेस्क्यू प्रयास गरे । उनीहरूबीच ५२ रनको बहुमूल्य साझेदारी भएको थियो । कुशल आउट भएपछि सबै अभिभारा दीपेन्द्रको काँधमा आयो । रनरेटको प्रेस बढ्दो थियो । १९ औं ओभरमा मुस्तफिजुर रहमानले दीपेन्द्रलाई हराभरा खेलाए । यो ओभरमा एक रन पनि नदिइकन रहमानले दीपेन्द्रको विकेट लिएपछि नेपालको सम्भावना समाप्त भएको थियो ।

७. गुल्शन झा

नेपाल उदीयमान अलराउन्डर गुल्शन झाका लागि यो विश्वकप बिर्सनलायक रह्यो । खासगरी साथ अफ्रिकाविरुद्धको म्याचले उनलाई लामो समयसम्म पीडा दिइरहन सक्छ । अन्तिम दुई बलमा दुई रन लिएर हिरो हुने अवसर उनीसँग थियो । तर, गुल्शन चुके । अन्तिम बलमा कमजोर रनिङका कारण सुपर ओभरमा धकेल्ने अवसर खेर फालेको भनेर पनि उनको आलोचना भयो । बंगलादेशविरुद्धको खेलमा पनि उनी निकै संवेदनशील समयमा क्रिजमा आएका थिए । चार/चार डट बल खेलेर आउट भए ।

८. सोमपाल कामी

नेपालका प्रमुख फास्ट बलर सोमपाल कामीबाट ब्याटिङमा पनि आशा राखिन्छ । उनी तल्लो क्रममा आएर उपयोगी रन बटुल्न सक्छन् । राम्रा सटहरु हान्न सक्छन् । जुन क्षमताको झलक उनले साउथ अफ्रिकाविरुद्धको म्याचमा प्रस्तुत गरे । नेपालले सय रनमा ६ विकेट गुमाएपछि क्रिजमा आएका सोमपालले ४ बलमा ८ रन बनाए । उनले १९ औं ओभरको पाचौं बलमा हानेको १०५ मिटर लामो छक्काले नेपालको जित सम्भावना ह्वात्तै बढाएको थियो । तर, अन्तिम ओभरमा उनी ब्याटिङमा आउनै पाएनन् ।