झलनाथको प्रश्न- नेतृत्वमा सहमति टाउकाे जोडेर हुन्छ कि अंकमाल गरेर ? (भिडिओ)

काठमाडौं । नेकपा एकीकृत समाजवादीका सम्मानित नेता झलनाथ खनालले महाधिवेशनमा वैचारिक कार्यदिशा, नीति र सिद्धान्तमा आधारित भए सहमतिमा नेतृत्व चयन गर्न सकिने बताएका छन् ।

अनेमसंघ (समाजवादी) को मुखपत्र विमोचन कार्यक्रममा उनले महाधिवेशनबाट राजनीतिक, संगठनात्मक प्रतिवेदन र विधान पारित गर्ने बताए ।

उनले भने, ‘दस्तावेजमा छलफल भइरहेको छ, सुझाव आइरहेका छन् । अहिलेका मस्यौदा दस्तावेजलाई परिस्कृत गरेर पारित गर्छौं । सहमतिको साथ नेतृत्व निर्माण गर्नुपर्छ । सहमति केका आधारमा हुन्छ ? हामीले टाउका जोडेर हुन्छ कि ? अंकमाल गरौं कमरेडहरू भनेर हुन्छ कि ? केले एकता गर्छ ? हामी एउटा वैचारिक राजनीतिक कार्यदिशाको आधारमा जुटेका छौं । नीति, सिद्धान्त र लक्ष्यको आधारमा अघि बढेका छौं ।’

उनले नेतृत्व चयनमा एकताबद्ध भएर सहमतिको नेतृत्व चयनको पहल गर्न सबैलाई आग्रह गरे ।