पहिलो चरणबाटै बाहिरिएपछि समर्थकलाई इंगित गर्दै पाकिस्तानी कप्तान बाबरले भने- हामी अझ बढी निराश छौं

काठमाडौं । टी-२० विश्वकपको पहिलो चरणबाटै बाहिरिएपछि पाकिस्तानका कप्तान बाबर आजमले टीम समर्थकभन्दा आफूहरु बढी निराश भएको बताएका छन् । उनले टीमले राम्रो खेल्न नसकेको स्वीकार गरे ।

‘टीममा ११ खेलाडी हुन्छन् र हरेकको भूमिका हुन्छ । म हरेक खेलाडीको ठाउँबाट खेल्न सक्दिनँ । मलाई लाग्छ, टीमका रुपमा हामीले आफूलाई पेश गर्न, फलो गर्न र अन्त्य गर्न सकेनौं । हामी एक ठाउँमा बसेर टीमका रुपमा राम्रो खेल्न नसकेको स्वीकार्नैपर्छ । यो १५ जना खेलाडीको कमजोरी हो । हामीले कार्यान्वयन गर्न सकेनौं । हामी बसेर यस विषयमा कुरा गर्नेछौं’, उनले भने ।

कप्तान बाबरले कुनै एक खेलाडीको कमजोरी औंल्याएनन् । ‘हामीले कुनै एक खेलाडीका कारण हारेका हैनौं, टीमकै रुपमा हामी पराजित भयौं’, अन्तिम खेलमा आयरल्यान्डलाई हराएपछि बाबरले भने ।

पाकिस्तानले सुरुका दुई खेलमा अमेरिका र भारतसँग हार व्यहोरेको थियो । त्यसपछि लगातार दुई खेल जिते पनि अगाडि बढ्न सकेन । आयरल्यान्डसँग भिड्नुअघि नै पाकिस्तान अघिल्लो चरण नपुग्ने पक्का भइसकेको थियो । भारतलाई ११९ रनमा समेटेर पनि पाकिस्तानले लक्ष्य पूरा गर्न सकेन ।

कप्तानी छाड्ने विषयमा बाबरले आफ्नो नियन्त्रणको विषय नभएको जवाफ दिए ।

‘मैले आफूले यसबारे अझै सोचेको छैन’, उनले भने, ‘जब हामी पाकिस्तान फर्कन्छौं, यहाँ भएका सबै कुरामा छलफल हुनेछ । जतिबेला मलाई कप्तानी दिइएको थियो, त्यो पाकिस्तान क्रिकेट बोर्ड (पीसीबी)को निर्णय थियो । अब पनि उनीहरुकै हो ।‘

पाकिस्तान टी-२० विश्वकपको पूर्वविजेता टीम हो ।