नयाँ युगका लागि ‘चिनियाँ विशेषतासहितको समाजवाद’

चीनको राष्ट्रिय व्यवस्थापिकाले संविधानमा नयाँ युगका लागि चिनियाँ विशेषतासहितको समाजवादसम्बन्धी सी जिनपिङ विचारधारालाई समावेश गर्दै संवैधानिक संशोधनहरू पारित गरेपछि विश्वको ध्यानाकर्षण भएको छ । यो विचारले मार्क्सवादलाई चिनियाँ सन्दर्भमा समयानुकूल गर्ने पछिल्लो उपलब्धिलाई प्रतिनिधित्व गर्छ । चिनियाँ कम्युनिष्ट पार्टी (सीपीसी-CPC)ले जनताको व्यवहारिक अनुभव र सामूहिक क्षमतालाई समेट्न अधिकतम पहलकदमीसमेत गरेको छ । सीपीसीले सन् २०१७ को अक्टोबरमा आफ्नो १९औं राष्ट्रिय महाधिवेशनमा पहिलो पटक विचारको गठनको घोषणा गर्‍यो र महाधिवेशनको समापनमा कार्यको लागि नयाँ मार्गनिर्देशनका रूपमा सी जिनपिङ विचारलाई पार्टीको संविधानमा लेख्यो ।

‘नयाँ युगका लागि चिनियाँ विशेषतासहितको समाजवाद’ सी जिनपिङ विचार सामान्यतया चीन बाहिर संक्षिप्त रूपमा सी जिनपिङ विचार एक बहुप्रचारित वैचारिक सिद्धान्त हो । सीपीसीका महासचिव सी जिनपिङको नेतृत्वमा चिनियाँ मार्क्सवाद भनिने नयाँ राष्ट्रिय पुनर्जागरण योजनाका रूपमा यसलाई प्रचारप्रसार गरिएको पाइन्छ । सीसीपीका अनुसार सी जिनपिङ विचारले अघिल्लो पार्टी विचारधाराहरूलाई ‘निर्माण र थप समृद्ध’ गरेर जाने बृहत योजना यसमा समावेश छ । यसलाई ‘समकालीन चीन र २१औं शताब्दीको मार्क्सवाद’ भनेर पनि व्याख्या गरिएको छ ।

सन् २०१२ मा भएको चिनियाँ कम्युनिष्ट पार्टीको १८औं राष्ट्रिय महाधिवेशनदेखि नै सीले कला, पत्रकारिता, दर्शन र सामाजिक विज्ञान तथा संस्कृतिलगायतका विषयमा निर्देशन दिँदै सार्वजनिक सञ्चार र संस्कृतिको कामलाई प्रमुख स्थानमा राखेका छन् । सी चिनफिङले नयाँ युगका लागि चिनियाँ विशेषतासहितको समाजवादको विचारधारा ‘सी विचार’ अगाडि बढाएका छन् । राजनीतिक र आर्थिक सिद्धान्तहरू सम्मिलित यो दस्तावेज जुन सन् २०१२ मा पदभार ग्रहण गरेदेखि उनको नेतृत्वमा प्रवर्द्धन गरिएको छ । सी विचारले निम्न मुख्य तत्वहरूलाई जोड दिन्छ–

चिनियाँ विशेषतासहितको समाजवाद

‘चिनियाँ विशेषतासहितको समाजवाद’ चीनमा समाजवाद र बजारोन्मुख आर्थिक नीतिहरूको अद्वितीय मिश्रणलाई वर्णन गर्न प्रयोग गरिने शब्द हो । यो विचार सन् १९७० को दशकको उत्तरार्द्धमा देङ सियाओपिङले ल्याएका थिए र त्यसपछि यो चिनियाँ राजनीति र अर्थशास्त्रको आधारभूत सिद्धान्त बनेको छ । सी जिनपिङले चिनियाँ समाजवादको मोडेललाई कायम राख्ने र यसलाई थप विकास गर्ने कुरामा जोड दिएका छन् । यो मोडेलले एक दलीय राजनीतिक प्रणालीका तत्वहरूलाई बजारोन्मुख अर्थतन्त्रसँग जोड्छ, जसमा प्रमुख क्षेत्रहरूमा राज्यको लागि बलियो भूमिका हुन्छ ।

‘चिनियाँ विशेषतासहितको समाजवाद’ले शासन र आर्थिक विकासको एक विशिष्ट मोडेललाई प्रतिनिधित्व गर्छ, जुन चीनको लागि विशिष्ट छ र समाजवाद र पूँजीवादको परम्परागत पश्चिमी अवधारणाभन्दा नितान्त फरक छ ।

राजनीति र शासनमा चिनियाँ कम्युनिष्ट पार्टीको निरन्तर प्रभुत्व र समाजवादी बजार अर्थतन्त्रको प्रयोग, जहाँ बजार शक्तिहरूले स्रोत बाँडफाँट र आर्थिक विकासमा महत्त्वपूर्ण भूमिका हुनेछ । वैदेशिक व्यापार र लगानीसहित विश्व अर्थतन्त्रसँग संलग्न हुने चीनले नीति तय गरेको छ । चिनियाँ जनताको जीवनस्तर सुधार गर्न र राष्ट्रिय कायाकल्प प्राप्त गर्ने माध्यमको रूपमा द्रुत आर्थिक वृद्धि र विकासमा केन्द्रित रहने अठोट गरेको छ, तर राज्यले अर्थतन्त्रका प्रमुख क्षेत्रहरू र रणनीतिक उद्योगहरूमा नियन्त्रण राखिरहने छ । परिवर्तनशील घरेलु र अन्तर्राष्ट्रिय परिस्थितिहरूलाई सम्बोधन गर्न समाजवादी नीतिहरूको निरन्तर अनुशरण र समयानुकूल सुधारको वकालत पनि गरेको छ ।

‘चिनियाँ विशेषतासहितको समाजवाद’ले शासन र आर्थिक विकासको एक विशिष्ट मोडेललाई प्रतिनिधित्व गर्छ, जुन चीनको लागि विशिष्ट छ र समाजवाद र पूँजीवादको परम्परागत पश्चिमी अवधारणाभन्दा नितान्त फरक छ ।

‘चिनियाँ सपना’

सी जिनपिङले चिनियाँ राष्ट्रको कायाकल्प र चिनियाँ जनताको जीवनस्तर र हितलाई समेट्ने ‘चिनियाँ सपना’को अवधारणा अगाडि बढाएका छन् । यो आर्थिक विकास र राष्ट्रिय बलसँग घनिष्ट सम्बन्धित छ । यो अवधारणा पहिलो पटक सीद्वारा सन् २०१२ मा प्रमुख रूपमा उल्लेख गरिएको थियो र अहिले उनको नेतृत्वको एक केन्द्रीय विषय भएको छ ।

‘चिनियाँ सपना’मा धेरै मुख्य तत्व समावेश छन् । यसले चिनियाँ राष्ट्रको महान कायाकल्प हासिल गर्ने आकांक्षालाई जनाउँछ । यसमा आर्थिक विकासमात्र नभई विश्वस्तरमा राष्ट्रिय गौरव, शक्ति र प्रतिष्ठाको भावना पनि समावेश छ । ‘चिनियाँ सपना’ चिनियाँ जनताको जीवनस्तर र कल्याणसँग घनिष्ठ रूपमा जोडिएको छ । यसले मध्यम समृद्ध समाज निर्माण गर्ने र गरिबी हटाउने विचारलाई समेट्छ । सी जिनपिङले ‘चिनियाँ सपना’ साकार पार्न प्राविधिक आविष्कार र वैज्ञानिक प्रगतिको महत्त्वलाई जोड दिएको पाइन्छ । यसमा आर्टिफिसियल इन्टेलिजेन्स, प्राविधिक उद्योग र अन्तरिक्ष अन्वेषण जस्ता क्षेत्रमा लगानी समावेश छ । अवधारणाले चिनियाँ सपना हासिल गर्न दिगो विकास र वातावरण संरक्षणको आवश्यकतालाई विशेष महत्त्व दिन्छ । यसले सामाजिक स्थायित्व, सांस्कृतिक सम्पदा र राष्ट्रिय एकताको महत्त्वलाई सपना साकार पार्ने अत्यावश्यक अंगका रूपमा प्रकाश पार्छ ।

चिनियाँ नागरिकहरूलाई यी लक्ष्य र आदर्शमा मिलेर काम गर्न प्रोत्साहित गर्ने चिनियाँ सपनालाई आह्वानका रूपमा हेरिएको छ । यसले समृद्ध, बलियो र प्रभावशाली राष्ट्रको रूपमा चीनको भविष्यका लागि सी जिनपिङको अग्रगामी दृष्टिकोणलाई झल्काउँछ । यो अवधारणा आधिकारिक चिनियाँ नीति र बयानमा समावेश गरिएको छ र यसले देशको विकास र विदेश नीतिको दिशालाई नवीन आकार दिन महत्त्वपूर्ण भूमिका खेल्ने विश्वास गरिएको छ ।

पार्टीको नेतृत्व सुदृढीकरण

सी विचारधाराले चिनियाँ समाज, राजनीति र अर्थतन्त्रका सबै पक्षमा चिनियाँ कम्युनिष्ट पार्टीको केन्द्रीय र प्रमुख भूमिकालाई जोड दिन्छ । यसले कडा पार्टी अनुशासन र शासनको महत्त्वलाई जोड दिन्छ । सी जिनपिङको राजनीतिक विचारधारा र नेतृत्व दर्शनमा ‘पार्टीको नेतृत्वलाई सुदृढ पार्नु’ एउटा आधारभूत सिद्धान्त हो, जसलाई प्रायः ‘सी विचार’ भनिन्छ । यसले चिनियाँ समाज र शासनका सबै पक्षहरूमा चिनियाँ कम्युनिष्ट पार्टीको भूमिका र नियन्त्रण बढाउने कुरामा केन्द्रित छ ।

सन् २०१२ मा सीपीसीको महासचिवको पद ग्रहण गरेदेखि नै यो सिद्धान्त सी जिनपिङको नेतृत्वको आधारशीला भएको छ । सी जिनपिङको नेतृत्वमा पार्टीको नेतृत्वलाई सुदृढ पार्ने प्रमुख तत्वहरू समावेश छन् । सी जिनपिङले एक बलियो र केन्द्रीकृत नेतृत्व संरचना कायम राख्ने उद्देश्यले सीपीसीभित्र आफ्नो अधिकार सुदृढ पारेका छन् ।

सन् २०१२ मा सीपीसीको महासचिवको पद ग्रहण गरेदेखि नै यो सिद्धान्त सी जिनपिङको नेतृत्वको आधारशीला भएको छ । सी जिनपिङको नेतृत्वमा पार्टीको नेतृत्वलाई सुदृढ पार्ने प्रमुख तत्वहरू समावेश छन् । सी जिनपिङले एक बलियो र केन्द्रीकृत नेतृत्व संरचना कायम राख्ने उद्देश्यले सीपीसीभित्र आफ्नो अधिकार सुदृढ पारेका छन् ।

पार्टी सदस्यहरूको निष्ठा सुनिश्चित गर्न सीपीसीभित्र कडा पार्टी अनुशासन र भ्रष्टाचारविरोधी प्रयासहरूमा जोड दिइएको पाइन्छ । मार्क्सवादी-लेनिनवादी विचारधारा, ‘सी जिनपिङ विचार’ र सीपीसीको मूल मूल्यहरूको पालनालाई कडाइका साथमा लागू गरिएको छ । पार्टी निर्देशनहरू अनुरूप र वैचारिक शुद्धता कायम राख्न मिडिया, इन्टरनेट र सार्वजनिक प्रवचनमा कडा नियन्त्रण राखिएको छ । सीपीसी र राज्यको स्थायित्व र हितको रक्षा गर्न राष्ट्रिय सुरक्षा सरोकारहरूमा ध्यान केन्द्रित गर्दै आन्तरिक र अन्तर्राष्ट्रिय दुवै क्षेत्रमा थप निगरानी बढाइएको पाइन्छ ।

स्थानीय सरकारहरू, उद्यमहरू र सामाजिक संगठनहरूसहित तल्लो तहसम्म पार्टी नियन्त्रण र प्रभाव विस्तार बढाइएको पाइन्छ । चीनको विदेश नीति र अन्तर्राष्ट्रिय सम्बन्धलाई आकार दिन पार्टी नेतृत्वलाई विशेष जोड दिएको पाइन्छ । पार्टीको नेतृत्वलाई सुदृढ बनाउने कुरामा चीनको विकास र राजनीतिक स्थायित्व कायम राख्न सीपीसीको केन्द्रीय भूमिका रहेको विश्वास गर्न सकिन्छ । यो ‘नयाँ युगका लागि चिनियाँ विशेषतासहितको समाजवाद’को दृष्टिकोणसँग पनि जोडिएको छ, जहाँ सीपीसीले चीनको राष्ट्रिय बृहत्तर विकास लक्ष्यहरू हासिल गर्न केन्द्रीय भूमिका खेलिरहेको छ ।

आर्थिक सुधार र नवप्रवर्तन

सी जिनपिङले चीनको आर्थिक विकासलाई उच्च गुणस्तरीय वृद्धि, प्राविधिक आविष्कार र वातावरणीय दिगोपनतर्फ लैजान आर्थिक सुधारको आह्वान गर्नुभएको छ । ‘नयाँ युगका लागि चिनियाँ विशेषतासहितको समाजवाद’को दृष्टिले सी जिनपिङको नेतृत्वमा आर्थिक सुधार र नवप्रवर्तन प्रमुख प्राथमिकतामा परेको छ । सी जिनपिङले चीनमा दिगो आर्थिक वृद्धि र प्राविधिक नवप्रवर्तनलाई प्रवर्द्धन गर्ने उद्देश्यले विभिन्न आर्थिक सुधारहरूको वकालत गरेका छन् ।

सी जिनपिङको नेतृत्वमा आर्थिक सुधार र नवप्रवर्तनका प्रमुख पक्षहरू समावेश छन् । सबैतिर उच्च वृद्धिको मोडेलबाट उच्च गुणस्तरीय आर्थिक विकासमा ध्यान केन्द्रित गरिहेको पाइन्छ । यसमा निर्यात सञ्चालित अर्थतन्त्रबाट घरेलु उपभोग र सेवाहरूमा जोड दिने अर्थतन्त्रमा सर्ने योजना पनि समावेश छ । प्राविधिक आविष्कारलाई प्रोत्साहन गर्दै मूल्य श्रृङ्खलामाथि सार्न उद्योगहरूलाई स्तरोन्नति गर्ने समग्र योजना समाहित हुन आउँछ । आर्टिफिसियल इन्टेलिजेन्स, बायोटेक्नोलोजी र नवीकरणीय ऊर्जा जस्ता सहयोगी उद्योगहरू पनि समावेश छन् ।

विदेशी व्यवसाय र लगानीका लागि चिनियाँ बजारहरू क्रमशः खोल्दै, स्वदेशी र विदेशी उद्यमहरूका लागि थप स्तरको वातावरण बनाउन जोड दिइएको छ । चीनको वित्तीय प्रणालीलाई थप पारदर्शी र प्रभावकारी बनाउने प्रयास, वित्तीय जोखिम व्यवस्थापन र ऋण घटाउने कदमहरू अनि ग्रामीण क्षेत्रहरूमा जीवनस्तर सुधार गर्न, गरिबी घटाउन र कृषिलाई आधुनिकीकरण गर्न नयाँ पहलका लागि पार्टी पङ्क्तिलाई निर्देशन गरिएको छ । आर्थिक विकासको अभिन्न अंगको रूपमा पर्यावरण संरक्षण र दिगोपनलाई प्रवर्द्धन गर्ने नीति अंगीकार गरिएको छ ।

चीनको विदेश नीति र अन्तर्राष्ट्रिय सम्बन्धलाई आकार दिन पार्टी नेतृत्वलाई विशेष जोड दिएको पाइन्छ । पार्टीको नेतृत्वलाई सुदृढ बनाउने कुरामा चीनको विकास र राजनीतिक स्थायित्व कायम राख्न सीपीसीको केन्द्रीय भूमिका रहेको विश्वास गर्न सकिन्छ ।

सी जिनपिङको आर्थिक सुधार र नवप्रवर्तनको दृष्टिकोणलाई प्रायः ‘दोहोरो परिसंचरण’ रणनीति भनिन्छ । यस रणनीतिमा आन्तरिक उपभोग (आन्तरिक परिसंचरण) र अन्तर्राष्ट्रिय व्यापार (बाह्य परिसंचरण) दुवैलाई बढावा दिने कुरा समावेश हुन्छ । यसले चीनलाई थप आत्मनिर्भर बनाउने र आन्तरिक नवप्रवर्तनलाई बढावा दिँदै बाह्य बजारमा कम निर्भर बनाउने लक्ष्य राखेको छ । यी सुधारहरू चिनियाँ अर्थतन्त्रको स्थायित्व कायम राख्दै प्रविधि, नवप्रवर्तन र दिगो विकासमा चीनलाई विश्व नेताको रूपमा स्थापित गर्ने बृहत प्रयासका हिस्सा हुन् । तिनीहरूले चीनको आर्थिक भविष्यका लागि सीको दृष्टिकोणलाई प्रतिविम्बित गर्छन् । बुढ्यौली जनसंख्या, परिवर्तनशील विश्वव्यापी आर्थिक गतिशीलता र वातावरणीय सरोकारहरूसहित विभिन्न चुनौतीहरूलाई सम्बोधन गर्न वैचारिक योजना सहितको डिजाइन समावेश गरिएको छ ।

राष्ट्रिय सार्वभौमिकता र अन्तर्राष्ट्रिय प्रभाव

सी विचारधाराले अन्तर्राष्ट्रिय मामिलामा चीनको अधिकार र सार्वभौमसत्तालाई जोड दिन्छ । विश्वव्यापी मञ्चमा चीनको लागि थप प्रभावशाली भूमिकाको लक्ष्य राख्छ । राष्ट्रिय सार्वभौमसत्ता र अन्तर्राष्ट्रिय प्रभाव सी जिनपिङको नेतृत्वमा चीनको विदेश नीतिका प्रमुख तत्वहरू हुन् । यी सिद्धान्तहरूले आफ्नो राष्ट्रिय सार्वभौमसत्ताको रक्षा गर्न र अन्तर्राष्ट्रिय मामिलामा आफ्नो प्रभाव बढाउने चीनको संकल्पलाई जोड दिन्छन् ।

यी सिद्धान्तका मुख्य पक्ष

क्षेत्रीय अखण्डता : चीनले आफ्नो क्षेत्रीय अखण्डतालाई जोड दिन्छ । विशेष गरी ताइवान, हङकङ र तिब्बत जस्ता संवेदनशील मुद्दाहरूको सम्बन्धमा चीनले विशेष महत्त्व दिएको छ । यसले यी क्षेत्रहरूलाई चीनको अभिन्न अंग मान्छ र कुनै पनि बाह्य हस्तक्षेपको विरोध गर्छ ।

साउथ चाइना सी : छिमेकी देशहरुसँगको क्षेत्रीय विवाद रहेको दक्षिण चीन सागरमा चीन दृढतापूर्वक उपस्थिति बढाइरहेको छ । यसले दक्षिण चीन सागरको एक महत्त्वपूर्ण भाग दाबी गरेको छ, जसले यस क्षेत्रका अन्य राष्ट्रहरूसँग निरन्तर तनाव निम्त्याउँछ ।

बेल्ट एण्ड रोड इनिसिएटिभ (बीआरआई) : चीनको बीआरआई एक प्रमुख विदेश नीति र आर्थिक विकास पहल हो, जसको उद्देश्य एसिया, अफ्रिका र युरोपमा पूर्वाधार र व्यापारिक सम्बन्धहरू निर्माण गरेर चीनको प्रभाव बढाउने नै हो ।

बहुपक्षीय संगठनहरू : चीनले संयुक्त राष्ट्रसंघ, विश्व व्यापार संगठन र अन्तर्राष्ट्रिय मुद्रा कोष जस्ता अन्तर्राष्ट्रिय संस्थाहरूमा बढी प्रमुख भूमिका खोजेको छ । यसले परिवर्तनको विश्वव्यापी सन्तुलन प्रतिविम्बित गर्ने सुधारहरूको वकालत गर्छ, जसले चीनलाई थप प्रभावशाली बनाउन सहयोग पुर्‍याओस् ।

आर्थिक र व्यापार कूटनीति : चीनले विश्वव्यापी रूपमा आफ्नो आर्थिक र व्यापारिक हितलाई बढावा दिन्छ, धेरै देश र क्षेत्रहरूसँग व्यापार सम्झौता र साझेदारीमा वृद्धि चाहन्छ ।

सफ्ट पावर : चीनले आफ्नो सफ्ट पावर बढाउन र विश्वव्यापी मञ्चमा आफ्नो छवि सुधार्न सांस्कृतिक आदानप्रदान, मिडिया र शिक्षामा लगानी गरिरहेको छ ।

ग्लोबल गभर्नेन्स : चीनले थप बहुध्रुवीय विश्व व्यवस्थाको आफ्नो दृष्टिकोण प्रस्तुत गर्दै विश्वव्यापी शासनलाई आकार दिन थप महत्त्वपूर्ण भूमिका खेल्ने लक्ष्य राखेको छ ।

चीनको बीआरआई एक प्रमुख विदेश नीति र आर्थिक विकास पहल हो, जसको उद्देश्य एसिया, अफ्रिका र युरोपमा पूर्वाधार र व्यापारिक सम्बन्धहरू निर्माण गरेर चीनको प्रभाव बढाउने नै हो ।

सी जिनपिङको नेतृत्वले अन्तर्राष्ट्रिय मामिलामा चीनको भूमिकाप्रति थप दृढ र विश्वस्त दृष्टिकोण राखेको छ । यो विचारधारा चीनको एक प्रमुख विश्व शक्तिको हैसियतसँग मिल्दोजुल्दो छ । यी सिद्धान्तहरूले चीनको आफ्नो सार्वभौमसत्ताको रक्षा गर्ने, आफ्नो आर्थिक हितलाई अगाडि बढाउने र अन्तर्राष्ट्रिय प्रणालीको नियम र मापदण्डहरूलाई चिनियाँ स्वार्थमा अगाडि बढाउन वैचारिक आकार प्रदान गर्ने कुरामा चिनियाँ विश्वास बुझ्न सकिन्छ ।

उपसंहार

यो विचारधारा चिनियाँ विशेषतासहितको समाजवादलाई कायम राख्ने र विकास गर्ने मुख्य लक्ष्य समाजवादी आधुनिकीकरण र राष्ट्रिय समृद्धिलाई साकार पार्नु हो । सबै हिसाबले मध्यम समृद्ध समाजको निर्माण सम्पन्न गर्ने आधारमा चीनलाई समृद्ध, बलियो, प्रजातान्त्रिक, सांस्कृतिक रूपमा उन्नत, सामञ्जस्यपूर्ण र सुन्दर राष्ट्रको रूपमा निर्माण गर्न चाहन्छ । नयाँ युगमा चिनियाँ समाजले सामना गरिरहेको मुख्य अन्तरविरोध भनेको असन्तुलित र अपर्याप्त विकास र राम्रो जीवनका लागि जनताको निरन्तर बढ्दो आवश्यकताबीचको हो भन्ने कुरा स्पष्ट हुन्छ । यसले विकासको जनकेन्द्रित दर्शन र सर्वांगीण मानव विकास र सबैको साझा समृद्धिलाई जोड दिएको छ ।

सी विचारधारा चिनियाँ विशेषतासहितको एकीकृत योजना हो, यसले चिनियाँ विशेषतासहितको समाजवादको मार्ग, सिद्धान्त, प्रणाली र संस्कृतिमा बलियो विश्वास बढाउने छ । यसको मूल मर्म समाजवादको प्रणालीलाई सुधार र विकास गर्नु तथा चीनको प्रणाली र शासनको क्षमतालाई आधुनिकीकरण गर्नु हो । अनि समाजवादी विधिको शासन प्रणाली स्थापना गर्नु र कानूनको समाजवादी शासनको देश निर्माण गर्नु हो ।

नयाँ युगमा बलियो सेना निर्माण गर्ने पार्टीको लक्ष्य पार्टीको आदेश पालना गर्ने, लड्न र जित्न सक्ने र उत्कृष्ट आचरण कायम राख्ने जनशक्तिलाई विश्वस्तरको सेनामा निर्माण गर्ने हो भन्ने स्पष्ट पार्छ । यसको कूटनीतिको उद्देश्य नयाँ प्रकारको अन्तर्राष्ट्रिय सम्बन्धलाई बढावा दिन र मानव जातिको साझा भविष्य भएको समुदाय निर्माण पनि हो । सीपीसी नेतृत्व चिनियाँ विशेषतासहितको समाजवादको परिभाषित विशेषता हो र चिनियाँ विशेषतासहितको समाजवाद प्रणालीको सबैभन्दा ठूलो शक्ति हो ।

चिनियाँ पार्टी राजनीतिक नेतृत्वको सर्वोच्च शक्ति हो । यो विचारले नयाँ युगमा पार्टी निर्माणका लागि बृहत आवश्यकता प्रस्तुत गर्छ र पार्टी निर्माणमा राजनीतिक कार्यको महत्त्वलाई जोड दिन्छ ।