यसरी चारवटै ओभर मेडन फ्याँके फर्गुसनले

काठमाडौं। टी-२० विश्वकप क्रिकेटमा सोमबार राती प्रतियोगिताबाट बाहिरिने पक्का भइसकेका न्युजिल्यान्ड र पपुआ न्युगिनी भिड्दै थिए। ट्रिनिडाड एन्ड टोबागोस्थित तारौबामा न्युजिल्यान्डले टस जितेपछि पीएनजीलाई ब्याटिङका लागि बोलाएको थियो।

बलिङ गरेको न्युजिल्यान्डका लागि लकी फर्गुसनले दुर्लभ विश्व कीर्तिमान बनाए। उनले बलिङ गरेका चारवटै ओभर मेडन राखे। टी-२० अन्तर्राष्ट्रिय क्रिकेटको कुनै एक खेलमा एउटा बलरले अधिकतम चार ओभरसम्म बलिङ गर्न पाउँछ। फर्गुसनको नाममा कुनै रन गणना नहुने गरी उनले बलिङ गरेका हुन्।

अझ उनले फर्गुसन पाचौँ ओभरमा बलिङमा आएका थिए जतिबेला पीएनजीले २ विकेट गुमाएर १४ रनमा खेल्दै थियो। उनले पहिलो बलमै विकेट लिए। ६ रनमा खेलिरहेका आसाद भाला क्याच आउट हुन पुगे। त्यसपछिका ५ बलमा उनले रन दिएनन्।

नयाँ ब्याट्सम्यान सेसे बाउले उक्त ओभरमा रन विहिन बने। टिम साउथीले छैटौँ ओभरमा केवल २ रन दिए। सातौँ ओभरमा फेरि बलिङमा आएका फर्गुसनलाई सामना गर्नुपर्ने थियो बाउले। बाउ ६ बलमा एक रन बनाएर खेल्दै थिए। तर उक्त ओभरमा बाउले रन जोड्न सकेनन्। बाँकी दुई ओभरका लागि फर्गुसनलाई केहीबेर विश्राम दिइयो। उनी १२ औँ ओभरमा बलिङमा आए जतिबेला पीएनजी २ विकेट गुमाएर ४१ रनमा खेल्दै थियो।

सेसे बाउ १२ र चार्ल्स अमिनी १७ रनमा खेल्दै थिए। दोस्रो बलमा अमिनी एलबिडब्लु धरापमा परे। पीएनजीले गुमाएको यो तेस्रो विकेट थियो। १३ औँ ओभरमा मिचेल सान्टनरको बलमा बाउ पनि आउट भएपछि पीएनजी ४३(४ को अवस्थामा पुग्यो। १४ औँ ओभरको दोस्रो बलमा फर्गुसनले १ रनमा खेलिरहेका चाड सोपरलाई बोल्ड गरे।

तेस्रो बलमा पीएनजीले २ रन लिएको थियो तर त्यो ‘लेग बाई’ थियो अर्थात बलरको नाममा गणना भएन। विकेटकिपर किपलिन दोलिगाले ब्याट नछोई आफ्नो शरिरमा लागेर गएको बलमा २ रन लिएपनि त्यसपछिका बाँकी ३ बलमा एक रन पनि जोड्न सकेनन् र टी‍-२० अन्तर्राष्ट्रिय क्रिकेटमा फर्गुसनले विश्व कीर्तिमान बनाउन पुग्यो।

३३ वर्षीय दायाँ हाते फास्ट बलर फर्गुसनले टी-२० अन्तर्राष्ट्रिय क्रिकेटमा हालसम्म ४२ खेल खेल्दै ६१ विकेट लिएका छन्। उनको बलिङ इकोनोमी ७।१५ छ। औसतमा हरेक १४.८ बलमा विकेट लिने गरेका छन्। जारी विश्वकपका अघिल्ला तीन खेलमा उनले १२ ओभर बलिङ गर्दै ६४ रन खर्चिएर ४ विकेट लिएका थिए। त्यसमा मेडन भने एउटा पनि थिएन।