शुक्रवारबाट प्रदर्शनमा आउने चलचित्र ‘दान्भी’ले कति पायो शो ?

काठमाडौं । शुक्रवारदेखि प्रदर्शनको तयारीमा रहेको चलचित्र ‘दान्भी’ ले थोरै शो पाएको छ। मल्टिप्लेक्स हलहरूले बुधवारदेखि नै फिल्मको अग्रिम टिकट बुकिङ खुल्ला गरेको छ।

चलचित्रलाई क्युएफएक्सनले पहिलो दिन काठमाडौंमा १६ र बाहिर ३१ शो उपलब्ध गराएको छ।

चलचित्रले आईएनआईमा १२, वान सिनेमाजमा ७, एफक्युबमा ३ गरी बिएसआर, बिग मुभीज, रन्जनालगायतका मल्टिप्लेक्स हलहरूमा पनि शो पाएको छ।

चलचित्र उपत्यका बाहिर बिर्तामोड, दमक, इटहरी, धरान, विराटनगर, हेटौँडा, चितवन, पोखरा, बुटवल, नेपालगञ्ज, दमौलीलगायतका प्रमुख सहरसहित ५५ वटा हलमा रिलिज हुँदैछ ।

रूपेश तामाङको निर्देशनमा बनेको चलचित्रमा नायिका पूजा शर्मा र कुन्साङ बम्जन मुख्य भूमिकामा फिचर्ड छन्।

पूजा र कुन्साङका अलावा चलचित्रमा किरण श्रेष्ठ, मोनालिसा खतिवडा, राजाराम पौडेल, कालु राणा, सीता तामाङ लगायतका कलाकारको अभिनय छ।

पवन राना मगर कार्यकारी निर्माता र देव मगर तथा अनुप गडाल निर्माता रहेको चलचित्रमा कमला लिम्बु, पन्चबहादुर तामाङ र आदर्श पौडेल सह–निर्माता छन् ।

चलचित्रमा संजोग राणाको पटकथा तथा संवाद, रविना थापा मगरको कथा, हरिप्रसाद घलेको छायांकन, बन्दे प्रसादको सम्पादन, श्री श्रेष्ठको एक्सन र कविराज गहतराज कोरियोग्राफी छ ।

चलचित्रलाई रिच इन्टरटेन्मेन्टले काठमाडौं उपत्यका र एफडी कम्पनीले उपत्यका बाहिर वितरण गर्दैछन्।