हजार वर्षको इतिहास भएको रुसलाई जित्न असम्भव : पुटिन

काठमाडौं । रुसी राष्ट्रपति भ्लादिमिर पुटिनले हजार वर्षको इतिहास भएको रुसलाई जित्न असम्भव भएको बताएका छन् ।

रुसी विश्व च्यानल आरटीका अनुसार भियतनामको राजकीय भ्रमणमा आएका पुटिनले राजधानी हानोइको पत्रकार सम्मेलनमा बोल्दै यस्तो बताएका हुन् ।

बिहीबारको पत्रकार सम्मेलनमा पुटिनले युक्रेन युद्धको तापक्रम पश्चिमा देशहरूले क्रमशः बढाइरहेको पनि आरोप लगाए । रुसी विश्व च्यानल आरटी अनुसार रुसी जनताको एकताको कारण रुस पराजित नहुने देश भएको बताए ।

उनले भने, ‘हेर्दाखेरि उनीहरू हामीलाई डर देखाउन खोजिरहेका छन् । फेरि अर्कोतर्फ उनीहरू रुसलाई युद्ध मैदानमा पराजित गरेर रणनीतिक हार चलाउनुपर्ने पनि भन्छन् । रुसको लागि यसको अर्थ के हो ? यो भनेको हजार वर्ष पुरानो रुसको इतिहास अन्त्य हुनु हो । यो सबैले बुझ्ने कुरा हो ।’