प्रियंका कार्की अभिनित वेब सिरिजमा अश्लीलता, कसले दियो न्यूड सीन ?

काठमाडौं । अचेल चलचित्रमा नायिकाले टु पिस वा ब्याकलेस पहिरन लगाउनु सामान्य भइसक्यो । सेन्सर पास भएको खण्डमा चलचित्रमा किस सीन र बेड सीन पनि देख्न पाइन्छ । तर, न्यूड सीन ?

केही समयअगाडि बलिउड चलचित्र ‘एनिमल’ मा नायिका तृप्ती डिम्रीले दिएको न्यूड सीनले भारतमा मात्र नभएर नेपालमा पनि तहल्का मच्चिएको थियो ।

‘एनिमल’ को लागि तृप्तीले दिएको न्यूड सीनमा संवेदनशील अंग ढाकिएको थियो र पनि निकै कन्ट्रोभर्सी भयो । यसले पक्कै पनि चलचित्रको व्यापारलाई फाइदा पुग्यो नै होला ।

अश्लीलता आफैमा एक विवादित विषय हो । अश्लील दृश्यहरू राख्दा कन्ट्रोभर्सी हुने र त्यसले चलचित्रको व्यापारमा मद्दत पुग्ने धारणा केही मेकर्समा पाइन्छ । तर, अहिलेसम्म कुनै पनि मेकरले नेपाली चलचित्रमा ‘फुल न्यूड सिन’ देखाउने दुस्साहस गरेका थिएनन् ।

सुजोय योङ निर्देशित वेभ सिरिज ‘साहु बा’ ले सम्भवतः पहिलोपटक यस्तो दुस्साहस गरेको छ । दुई दिनअघि सार्वजनिक भएको ‘साहु बा’ को ट्रेलरका दुईवटा सिनमा दर्शकले जिब्रो टोक्न बाध्य हुन्छन् । एउटा सीनमा महिला कलाकार र अर्कोमा पुरुष कलाकारलाई पछाडिबाट नांगो देखाइएको छ । दुवैको शरीरमा एउटा कपडाको धरो पनि छैन । यी दुई दृश्य पोर्न फिल्मको झल्को दिने खालका छन् ।

यो कुनै सी ग्रेडको चलचित्र भने होइन । प्रियंका कार्कीजस्तो चलेकै स्टारले अभिनय गरेकी छन् । चर्चित डान्सर कविता नेपाली, बिजु पार्की, चुल्ठिम गुरुङ, नम्रता श्रेष्ठ, अमित गिरी, अमितेष शाहको आदि लगायतको अभिनय रहेको यो सिरिजको ट्रेलर खासै गतिलो छैन । दुई न्यूड सीनका बलमा कारण भ्यूज बटुल्न खोजिएको छ ।

न्यूड सीन दिन तयार कलाकारहरू को हुन् भन्ने अहिलेसम्म खुलाइएको छैन । महिला कलाकार आफ्नो नांगो शरीरसहित पुरुष पात्रसँग यौनजन्य पोजसनमा बसेकी छन् । लगत्तैको दृश्यमा पुरुष कलाकारको पछाडि भाग नांगो देखाइएको छ । दुवै कलाकारहरू एक्सपोज भएपछि कन्ट्रोभर्सीको सामना गर्नुपर्ने देखिन्छ ।

कतिपयले उक्त न्यूड सीन नायिका प्रियंका कार्कीको भएको अनुमान लगाइरहेका छन् । दर्जनौँ फिल्ममा काम गरिसकेकी कुनै बेलाकी नम्बर एक कलाकार प्रियंका एउटा वेब सिरिजमा न्यूड हुन तयार बनिन् होला भनेर विश्वास गर्न गाह्रो हुन्छ ।

हालै चलचित्रले गरेको पत्रकार सम्मेलनमा प्रियंका आफैँले अघि सरेर न्यूड सीनका बारेमा बोलेकी थिइन् । उनले चलचित्रमा यो सिनको महत्व भएको बताइन् । निर्देशक सुयोग योङले यो सिनलाई सस्पेन्स राख्न चाहेको बताए ।

उनले भने, ‘यो हाम्रो सस्पेन्स भाग हो । त्यसैले अहिले नखुलाएको हो । सिरिज हेरेपछि थाहा पाइहाल्नु हुन्छ न्यूड सीन कसको हो भनेर ।’

‘साहु बा’ यहीँ अगस्टबाट रिलिज हुँदैछ । २४ एपिसोडको यो सिरिज राष्ट्रिय टेलिभिजनमा पनि आउने बताइएको छ । टिभीमा आउँदा भने यो दृश्यमा कैंची लाग्ने प्रबल सम्भावना छ ।