पार्टीबाट राजदूत सिफारिसका लागि रास्वपाले बनायो मापदण्ड

काठमाडौं । राष्ट्रिय स्वतन्त्र पार्टीले आफ्नो दलबाट राजदूत सिफारिस गर्न मापदण्ड बनाएको छ । रास्वपा अन्तर्राष्ट्रिय सम्बन्ध विभागका प्रमुख शिशिर खनालको संयोजकत्वमा गठित कार्यदलले मापदण्ड बनाएको हो ।

सोविता गौतम र प्रा.डा. अतिन्द्र दाहाल सदस्य रहेको कार्यदलले ३५ वर्ष पूरा भएको नेपाली नागरिक हुनुपर्ने, कालोसूचीमा नपरेको, भविष्यमा सरकारी सेवाका लागि अयोग्य ठहरिने गरी सेवाबाट बर्खास्त नभएको हुनुपर्ने मापदण्ड छन् ।

कुनै पनि विदेशी मुलुकको स्थायी वा अस्थायी आवासीय अनुमति पत्र वा सुविधा प्राप्त नगरेको, नियुक्ति हुँदा कुनै अन्तर्राष्ट्रिय वा विदेशी सहायताद्वारा सञ्चालित गैरसरकारी संस्थामा कार्यरत नरहेको हुनुपर्ने छ ।

त्यसै गरी भ्रष्टाचार वा नैतिक पतनदेखि फौजदारी कसुरमा अदालतबाट सजाय नपाएको, नियुक्त हुने मुलुकमा कुनै प्रकारको हित बाझिने अवस्था नरहेको र लाभको पद धारण गरी वन नगरी विदेशी राष्ट्रले नियुक्त गरेको जिम्मेवारीमा कार्यरत भए अवकाश लिएको १० वर्ष पूरा भएको हुनुपर्ने उल्लेख छ ।

यो मापदण्डमा रहेर असार १४ गतेसम्म फारम भरी आफ्नो इच्छा जाहेर गर्न वा व्यक्ति सिफारिस गर्न रास्वपाले आग्रह गरेको छ ।

यस्तै कूटनीतिक र राजनीतिक अनुभाव, नेतृत्व क्षमता, अध्ययन अनुसन्धान तथा विशेषज्ञताका आधारमा छनोट गरिने पनि रास्वपाले जनाएको छ ।