काठमाडौंमा चलचित्र ‘एक्टर’ को छायांकन सुरु, प्रदीप खड्कालाई भ्यानिटी भ्यान

काठमाडौं। दिलीप रायमाझीकी छोरी दिव्या रायमाझीको डेब्यू चलचित्र ‘एक्टर’को छायांकन धमाधम सुरु भएको छ । चलचित्रमा दिव्यासँगै नायक प्रदीप खड्का र नायिकाद्वय आना शर्मा मुख्य भूमिकामा छन् ।

यतिबेला ‘एक्टर’को टिम काठमाडौंको सेड्युलमा व्यस्त छ। थमन कुमार भण्डारीको लगानीमा निर्माण भइरहेको यो चलचित्रको टिमले नायक प्रदीप खड्कालाई छायांकन सेटमा ‘भ्यानिटी भ्यान’ उपलब्ध गराएको छ ।

विशेषतः भ्यानिटी भ्यान सुटिङस्थलमा कलाकारको पहिरन परिवर्तन, मेकअप, शौचालयलगायतका सुविधाका लागि प्रयोग गरिन्छ ।

बलिउड र हलिउडका कलाकारहरूले छायांकन सेटमा व्यक्तिगत भ्यानिटी भ्यान प्रयोग गर्दै आएका छन् । तर, नेपालमा भने भ्यानिटी भ्यानको प्रचलन खासै छैन ।

तर चलचित्रका निर्माता थमन कुमार भण्डारीले भने खड्काका लागि ‘भ्यानिटी रुम’ उपलब्ध गराएका हुन् । चलचित्रको लागि टेक भएको अवस्थामा बाहेक प्रदीपले त्यही भ्यानमा तयारी गरिरहेका छन् ।

आगामी कात्तिक १५ गते लक्ष्मीपूजाबाट प्रदर्शनमा आउने चलचित्रमा नायक राजवल्लभ कोइरालाको पनि मुख्य भूमिका छ । गत जेठ दोस्रो साता चलचित्रको छायांकनका लागि उनी अमेरिकाबाट काठमाडौं आइपुगेका थिए ।

करिब ९ वर्षपछि पर्दामा देखिन लागेको उनी चलचित्रको छायांकन सकाएर केही दिन अघि अमेरिका फर्किसकेका छन् ।

अदृत फिल्मसको प्रस्तुतिमा निर्माण भइरहेको ‘एक्टर’मा थमन कुमार भण्डारीको लगानी छ । निर्देशक राजन भुसालले निर्देशन गरेको चलचित्रमा नरेन्द्र मैनालीको छायांकन रहेको छ।