रास्वपा महामन्त्रीको प्रतिवेदन- अर्को विवेकशील बन्ने बाटोमा छौँ, म सहदेव बन्न सक्दिनँ

काठमाडौं । राष्ट्रिय स्वतन्त्र पार्टीका महामन्त्री डा. मुकुल ढकालले देशभर समीक्षा यात्रापछि निकालेको निचोडलाई प्रतिवेदनका रूपमा तयार पारेका छन् । उनले आफ्नो प्रतिवेदन आज सभापति रवि लामिछानेलाई हस्तान्तरण गर्ने कार्यक्रम छ ।

महामन्त्री डा. ढकालले निकालेको निचोड पार्टीका निम्ति सुखद छैन । उनले रास्वपाको जनमत निकै खस्किएको विश्लेषण प्रतिवेदनमै उल्लेख गरेका छन् । पार्टीले बोल्ड निर्णय लिएर अगाडि नबढेमा अर्को चुनावसम्म अस्तित्व रक्षा गर्न कठिन हुने उनको निष्कर्ष छ ।

प्रतिवेदनको अन्त्यमा डा. ढकालले भावुक सन्देश लेखेका छन् । आफ्नो महामन्त्री पदलाई दाउमा राखेर भए पनि सत्य बोल्ने आँट गरेको उनको भनाइ छ ।

प्रतिवेदनमा डा. ढकालको सन्देश:

महाभारतमा पाँच पाण्डवमध्ये सहदेवलाई पाण्डुको मृत्युपछि त्रिकालदर्शनको शक्ति प्राप्त भएको थियो । तर त्रिकालदर्शी सहदेवले भविष्यको घटना बताउलान् भनेर श्रीकृष्णले आफूलाई थाहा भएको केही कुरा कसैलाई बताए मृत्यु हुने श्राप दिए । त्यसैले महाभारतमा सबै थाहा भए पनि उनी चुप थिए । आज पार्टीको वर्तमान भनेको जनमत छैन । जनमत कति छ त्यसको आधारमा आज नै चुनाव हुने हो भने पार्टी हम्मेहम्मे तरिकाले राष्ट्रिय पार्टी बन्ला र प्रत्यक्षमा एक–दुई सिट जित्ला । भोलिका दिनहरूमा आजकै स्थिति अनुसार अघि बढे पार्टीको हालत विवेकशीलको जस्तो हुनेछ ।

यो भविष्यलाई नजिकबाट देखेपछि भन्नु वा लेख्नु उपयुक्त हुन्छ वा हुँदैन भन्ने प्रश्न ममा आयो । भागवत गीतालाई मैले सधैँ मानेको छु । श्रीकृष्णको बचनलाई सधैँ पछ्याएको छु । महाभारतमा श्रीकृष्णले सहदेवलाई नबोल्नु भनेका रहेछन् । तर मलाई मेरो पार्टीको माया छ र चिन्ता छ । भोलि दुर्घटना हुँदै छ भन्दा मेरो महामन्त्री पदको मृत्यु पनि हुन सक्छ वा मलाई घोक्र्याएर पार्टीबाट निकाल्न पनि सक्छन् । मेरो आगामी राजनीतिक जीवनको लागि यो घातक साबित हुनेछ । तथापि यो पटक कृष्णको वाणीभन्दा एउटा धुन मभित्र गुन्जियो- म मरे पनि मेरो पार्टी बाँचिरहोस् ।

डा. ढकालले आफ्नो प्रतिवेदन पार्टीले सार्वजनिक गर्नुपर्ने माग पनि अघि सारेका छन् । उनले प्रतिवेदनसँगै छुट्टै पत्र दिने तयारी गरेको बुझिएको छ । त्यसमा उनले आफ्नो व्यक्तिगत असन्तुष्टि पनि उजागर गरेका छन् ।

‘मैले नगरेका कामहरूमा पनि मेरो नाम लिएर पार्टीभित्र धेरै कुराकानी भयो । मेरा कुरा के के हुन् त भनेर मैले भन्नै पाइन । नराम्रा जति मेरा राम्रा जति सबै अरूका भए । मेरा कुरा के छन् जनताले थाहा पाउनु पर्छ । यो मेरो पनि राजनीतिक अधिकार हो । यो प्रतिवेदन सार्वजनिक नगर्नु ममाथि पार्टीले गरेको अन्याय हुनेछ । यो प्रतिवेदन जस्ताको तस्तै सार्वजनिक गरियोस्,’ ढकालले पत्रमा लेखेका छन् ।

रास्वपा महामन्त्री डा. ढकाललाई पार्टीले निर्णय गरेर जनमत बुझ्नका लागि देश दौडाहामा पठाएको थियो । एक महिना लामो समीक्षा यात्रा पछि फर्केर उनले प्रतिवेदन तयार गरेका हुन् ।