पोखरा महानगरप्रति राप्रपा कास्कीको व्यंग्य- बेरुजुमा शीर्ष स्थान हासिल गरेकोमा मेयरलाई बधाई !

पोखरा । राष्ट्रिय प्रजातन्त्र पार्टी (राप्रपा) कास्कीले बेरुजुमा शीर्ष स्थानमा रहेको भन्दै पोखरा महानगरपालिकाका मेयर धनराज आचार्यलाई बधाई दिँदै व्यंग्य प्रहार गरेको छ ।

राप्रपा कास्कीले बुधबार विज्ञप्ती जारी गर्दै बेरुजुमा शीर्ष स्थानमा रहेको भन्दै बधाई दिँदै व्यंग्य प्रहार गरेको हो । महालेखा परीक्षकको प्रतिवेदनले पोखरा महानगरपालिकाको बेरुजु करिब ८० अर्ब देखाएको थियो ।

राप्रपा कास्कीका अध्यक्ष नारायण गुरुङले अनियमिततामा शीर्ष स्थान हासिल गरेका मेयरलाई बधाई दिईरहँदा खुशी भने नलागेको बताएका छन् ।

महानगर, नगर कार्यपालिकाको कार्यालयमा भैरहेका अनियमितता र मौलाउँदै गइरहेको बेथितिप्रति राप्रपाको गम्भीर ध्यानाकर्षण भएको अध्यक्ष गुरुङले उल्लेख गरे । महानगरबाट भएका अनियमिततालाई पार्टीले गम्भीर भएर नियालिरहेको उनको भनाइ छ ।

अनियमितता रोक्न, नियमित गर्न, अनियमितताको बारेमा जवाफदेही हुन र आवश्यक प्रमाण पेश गरी बेरुजु फछ्र्याेट गर्न राप्रपा कास्कीले माग गरेको छ । नेतृत्व जवाफदेही नभएको खण्डमा जस्तोसुकै खालको आन्दोलन गर्न पछाडि नपर्ने अध्यक्ष गुरुङले उल्लेख गरे ।