नेकपा एसमा प्रदेश कमिटी अध्यक्षको संयुक्त पत्र- सर्वसहमत नेतृत्व चयन हुनेमा विश्वस्त छौं

काठमाडौं । नेकपा एकीकृत समाजवादीका प्रदेश कमिटी अध्यक्षहरुले महाधिवेशनबाट सर्वसम्मत नेतृत्व चयन गर्न नेतृत्वलाई आग्रह गरेका छन्।

एमालेबाट विद्रोह गरेर पहिलो पटक महाधिवेशन गर्न लागेको हुनाले अध्यक्ष माधव नेपाल, सम्मानित नेता झलनाथ खनाल र महासचिव घनश्याम भुसाललाई सर्वसहमत नेतृत्व चयन गर्न आग्रह गरेका हुन्।

पत्रमा भनिएको छ, ‘विद्रोह गरेर गठन भएको करिव ३४ महिना पश्चात राष्ट्रिय महाधिवेशन सम्पन्न हुनु पार्टी जिवनका लागि गौरवको विषय पनि हो। सैद्धान्तिक, वैचारिक र कार्यक्रम सर्वसम्मत रुपमा तय भएको छ। तय भएको समाजवादी कार्यक्रमले आजको समाजका सबै खाले चुनौतिहरुको सामना गर्न सक्ने छ। साथै भन्ने पार्टी पंक्तिको भावना समेतलाई आत्मसात गर्दै हामी आठै प्रदेश कमिटीका अध्यक्षहरुको छलफलपछि सर्वसहमत नेतृत्व चयन गर्न सक्षम हुनेमा हामी विश्वस्त छौं।’

पार्टी एकताबद्ध भएर महाधिवेशनमा अघि बढोस् भन्ने चाहेको उल्लेख गरेका छन्। नेकपा एसका भावी नेतृत्वमा अध्यक्ष नेपालसहित नेता खनाल र महासचिव भुसालको दाबी छ। खनालले आफ्नो नाममा सहमति नभएर निर्वाचन भएको खण्डमा महासचिव भुसाललाई सघाउने बचन दिइरहेका छन्।

तर, अध्यक्ष नेपालले आफ्नै नेतृत्वलाई निरन्तरता दिएर सर्वसहमति नेतृत्व चयन गर्नेगरी छलफल गरिरहेका छन्।