विश्वकप उपाधि जितेसँगै विराट र रोहितले लिए टी २० अन्तर्राष्ट्रियबाट सन्न्यास

काठमाडौं । भारतका दुई क्रिकेटर विराट कोहली र रोहित शर्माले टी २० अन्तर्राष्ट्रियबाट सन्न्यास घोषणा गरेका छन् । हिजो भएको विश्वकप फाइनलमा भारतले उपाधि जितेसँगै उनीहरूले सुखद बहिर्गमन गरेका हुन् ।

रोचक प्रतिस्पर्धामा भारतले दक्षिण अफ्रिकालाई सात रनले हराएको थियो । खेलमा कोहली म्यान अफ द म्याच भए। उनले ५९ बलमा ७६ रन बनाएका थिए ।

पोस्ट म्याच प्रिजेन्टेसनमा कोहलीले यो म्याच आफ्नो अन्तिम भएको घोषणा गरे । उपाधिका साथ टी २० अन्तर्राष्ट्रिय क्रिकेटबाट विश्राम लिन पाएकोमा उनले सन्तोष व्यक्त गरेका थिए । कोहलीका अनुसार फाइनल हारेको भए पनि यही नै उनको अन्तिम खेल हुने थियो ।
कोहली भारतबाट टी- २० मा सर्वाधिक रन बनाउने दोस्रो खेलाडी हुन् ।

कोहलीलगत्तै रोहितले पनि सन्यास घोषणा गरेका छन् । उनी टी २० मा सर्वाधिक रन र सर्वाधिक शतक बनाउने खेलाडी हुन् । सन् २००७ देखि अहिलेसम्म भएका सबै टी २० विशणवकपमा उनले भारतका तर्फबाट सहभागिता जनाएका थिए ।