एमाले लक्षित माधव नेपालको टिप्पणी- हामीसँग अझै मिलेर काम गर्न तयार छैन (भिडिओ)

काठमाडौं । नेकपा एकीकृत समाजवादीका अध्यक्ष माधवकुमार नेपालले एमालेलाई लक्षित गर्दै आफूहरुसँग मिलेर काम गर्न तयार नभएको टिप्पणी गरेका छन् ।

आफ्नो पार्टीको महाधिवेशन उद्घाटन सत्रलाई सम्बोधन गर्दै उनले एमाले तयार नभएपछि अरु मिल्न सक्नेहरु समाजवादी मोर्चा बनाएर अघि बढेको बताए ।

उनले भने, ‘आत्तिनुपर्ने केही छैन, मिलौं । मिल्न मूल नेताहरुले पहल गर्नुपर्छ । हामीले अहिले समाजवादी मोर्चा बनाएका छौं । त्यसको संयोजन अहिले विप्लवले गर्दै हुनुहुन्छ । बीचमा केही समस्या आएका छन् । प्रधानमन्त्रीजीले पनि मिलेर अघि बढौं भनिराख्नुभएको छ, अरु घटकलाई ल्याउन फोन पनि गरिएको छ, अरु घटक अझै हामीसँग काम गर्न तयार भएका छैनन् । के भन्न खोजेको हो, बुझिसक्नुभएको छ । तर पनि केही छैन । जो जो मिलेर अगाडि मोर्चा बनाएर जानसक्छौं, मिलौं, अरु पनि विस्तारै आउँछन् ।’

नेकपा एसको आजबाट सुरु भएको महाधिवेशनमा अरु सबै दल शुभकामना दिन पुगे पनि एमालेका कोही नेता गएनन् ।