संविधान संशोधनका लागि कांग्रेस-एमाले सहकार्यको राप्रपाले गर्‍यो स्वागत (भिडिओ)

काठमाडौं । राष्ट्रिय प्रजातन्त्र पार्टीले संविधान संशोधनका लागि कांग्रेस-एमालेबीच भएको सहकार्य स्वागतयोग्य रहेको निष्कर्ष निकालेको छ ।

पार्टी कार्यालय धुम्वाराहीमा मंगलबार बसेको केन्द्रीय पदाधिकारी बैठकपछि अध्यक्ष राजेन्द्र लिङ्देनले कांग्रेस-एमालेबीच संविधान संशोधन गर्ने मूख्य बुँदामा सहमति भएको खबर सुनेको भन्दै त्यसो हो भने नयाँ सहकार्य स्वागतयोग्य रहेको निष्कर्ष निकालेको बताए ।

लिङ्देनले राप्रपाले लामो समयदेखि संविधानमा आमूल परिवर्तन गर्नुपर्ने अडान राखिरहेको अवस्थामा संविधान संशोधनलाई नै आधार बनाएर भएको नयाँ सहमति स्वागतयोग्य रहेको बताए । बैठकमा अहिले विकसित राजनीतिक घटनाका क्रममा विषयमा प्रारम्भिक छलफल भएको भन्दै तत्काल ठोस धारणा बनाएर जान उपयुक्त नहुने ठहर गरेको बताएका छन् ।

संविधान संशोधनको प्रक्रिया, नयाँ गठबन्धनको स्वरूप हेर्न बार्की रहेकाले सरकारका बारेमा आगामी दिनमा आवश्यक धारणा तय गर्ने लिङ्देनको भनाइ छ ।

अहिलेको जस्तो राजनीतिक प्रणाली, संसदीय गणित र दलहरुको चरित्रमा गठबन्धन फेरबदलको घटना भइरहने भन्दै उनले कांग्रेस-एमालेको गठबन्धन हेर्दा तीन वर्ष चल्नसक्ने जस्तो लागेपनि ६ महिनामा पनि परिवर्तन हुन सक्ने आशंकासमेत गरे ।